«وكىنىشكە قاراي, ەلوردادا كوروناۆيرۋس ينفەكتسياسىن جۇقتىرۋ دەڭگەيى باسەڭدەمەي تۇر. نۇر-سۇلتان قالاسى ەپيدەميالىق جاعدايعا بايلانىستى «قوڭىر قىزىل ايماقتان» شىعىپ, «قىزىل ايماققا» ءوتتى. 11 تامىزداعى جاعداي بويىنشا ينفەكتسيالىق ستاتسيونارلاردا 2 699 ناۋقاس جاتىر, وسىلايشا جۇكتەمە 69%-دى قۇراپ وتىر. ورتاشا ەسەپپەن تاۋلىك ىشىندە 300-گە دەيىن ادام اۋرۋحاناعا جاتقىزىلادى. ستاتسيونارلاردا 3 900-دان اسا توسەك-ورىن بار. قازىرگى ۋاقىتتا قالا بويىنشا 16 ينفەكتسيالىق ستاتسيوناردا 7 مىڭعا جۋىق مەديتسينا قىزمەتكەرى ىندەتپەن كۇرەسىپ جاتىر», دەدى ت.مۇراتوۆ.
سونداي-اق باسقارما باسشىسى بۇگىندە جەدەل جاردەم بريگادالارى, 103 قىزمەتى جانە باستاپقى مەديتسينالىق سانيتاريالىق كومەك بەرۋ ۇيىمدارىنداعى ءموبيلدى بريگادالاردىڭ جۇمىسى قارقىن الا تۇسكەنىن ايتتى. باستاپقى مەديتسينالىق سانيتاريالىق كومەك بەرۋ ۇيىمدارىندا 12 مىڭنان اسا ناۋقاس كوروناۆيرۋس ينفەكتسياسىنان ەم الىپ جاتىر. قالا اكىمنىڭ تاپسىرماسىمەن ءموبيلدى بريگادالاردىڭ سانى 300-گە دەيىن كوبەيتىلدى.
«ەرەسەكتەردەن بولەك, كوروناۆيرۋس اۋرۋى بالالاردىڭ اراسىندا دا كەزدەسەدى. قازىرگى تاڭدا ەلوردادا 74 بالا ستاتسيوناردا ەم قابىلداپ جاتىر, ونىڭ ىشىندە 7 بالانىڭ جاعدايى اۋىر. وتكەن تاۋلىكتە 12 بالا اۋرۋحاناعا ءتۇستى. ال 834 بالا امبۋلاتورلى تۇردە ەم الىپ جاتىر», دەدى تيمۋر مۇراتوۆ.
باسقارما باسشىسىنىڭ مالىمەتىنشە, ەلوردادا جىل باسىنان بەرى كوروناۆيرۋسپەن 10 مىڭنان اسا بالا اۋىرىپ شىقتى.
«ۆيرۋستى جۇقتىرۋشىلار جاز مەزگىلىندە كوبەيىپ وتىر. ماۋسىم ايىنان باستاپ بالالار ۆيرۋستىڭ ايقىن كلينيكالىق بەلگىلەرىمەن تۇسە باستادى. بۇل ۋلانۋ, قالتىراۋ, دەنە قىزۋىنىڭ كوتەرىلۋى سياقتى كورىنىستەر دە بولۋى مۇمكىن. بالالاردىڭ وتباسىنداعى ەكپە الماعان ادامدارمەن بايلانىستان سوڭ اۋىرا باستاعانىن اتاپ وتكىم كەلەدى. ياعني ۆاكتسينا الماعان ازاماتتار ۆيرۋستى ءوز بالالارى مەن جاقىندارىنا جۇقتىرادى», دەيدى ول.
ەلوردادا 366 مىڭنان اسا ادام كوروناۆيرۋس ىندەتىنە قارسى ۆاكتسينانىڭ ءبىرىنشى كومپونەنتىن الدى. بۇگىندە 284 مىڭنان استام ازامات تولىق يممۋنداۋدان ءوتتى. حالىقتىڭ ۆاكتسينا الۋىن قامتۋ ماقساتىندا مەديتسينا ۇيىمدارىندا, ساۋدا ورتالىقتارىندا ەكپە ەگۋ بەكەتتەرىنىڭ جۇمىس كەستەسى جەكسەنبى مەن مەرەكە كۇندەرىن قوسا العاندا ساعات 10.00-دەن 22.00-گە دەيىن ۇزارتىلدى. سونداي-اق ەلوردادا 8 ساۋدا ويىن-ساۋىق ورتالىعىندا (حان-شاتىر, MegaSilkWay, كەرۋەن, ابۋ-دابي پلازا, ازيا پارك, سارىارقا, ەۋرازيا, مەچتا دۇكەنى) ۆاكتسينا الۋ بەكەتتەرى جۇمىس ىستەپ تۇر. قازىرگى كەزدە ساۋدا جانە ويىن-ساۋىق ورتالىقتارىندا بارلىعى 60 مىڭعا جۋىق ادام ۆاكتسينا الدى.
ت.مۇراتوۆ سوڭعى ۋاقىتتا حالىقتىڭ ۆاكتسينا الۋ بەلسەندىلىگى بايقالاتىنىن, ادامدار ءوز دەنساۋلىعىمەن قاتار اينالاسىنداعىلاردىڭ دا ساۋلىعى تۋرالى سانالى تۇردە ويلانا باستاعانىن اتاپ ءوتتى.
