«كليماتتىڭ وزگەرۋى – جاھاندىق جىلىنۋدىڭ سالدارى. اۋا رايىنىڭ قازىرگى قۇرعاقشىلىق سياقتى كاتاكليزمدەرى كۇتىلدى, سايكەسىنشە, ءبىزدىڭ دايىن بولۋىمىز كەرەك ەدى. الايدا وسى جاعداي دايىن بولماعانىمىزدى كورسەتتى», دەدى ەربول قاراشوكەەۆ وكق بريفينگىندە.
ونىڭ ايتۋىنشا, ەلىمىزدە جىل سايىن زووتەحنيكالىق تالاپتان ەكى ەسە از جەم وندىرىلەدى. جالپى كولەمنىڭ 70%-عا جۋىعى نەگىزىنەن تابيعي شابىندىقتا جينالادى. ال ولاردىڭ ونىمدىلىگى تىكەلەي اۋا رايىنا بايلانىستى.
«ەلىمىزدە اۋىسپالى ەگىستىكتەگى جەم-ءشوپ داقىلدارىنىڭ ۇلەسى 15% دەڭگەيىندە, بۇل عىلىم ۇسىنعان كورسەتكىشتەن ەكى ەسە تومەن. وسىلايشا, مال شارۋاشىلىعىن دامىتۋدىڭ نەگىزگى پرينتسيپتەرى بۇزىلدى دەپ ايتۋعا بولادى. مال باسىن كوبەيتۋ كەزىندە جەم-ءشوپ قورى ەسكەرىلمەگەن», دەدى ءمينيستردىڭ م.ا ەربول قاراشوكەەۆ
ول ماڭعىستاۋ مەن قىزىلوردا وبلىستارىنىڭ قازىرگى جاعدايىنا دا وسى فاكتور اسەر ەتۋى مۇمكىن ەكەنىن اتاپ ءوتتى.
«ماڭعىستاۋ وبلىسىن الايىق. ستاتيستيكالىق مالىمەتتەرگە سۇيەنسەك, بۇل جەردە كەڭەس زامانىندا 732 مىڭعا جۋىق مال باسى بولعان. ولارعا ارنالعان جالپى ۇزىندىعى 60 كم بولاتىن 3400 قۇبىرلى قۇدىق, 43 توعان مەن سۋ قۇبىرى بولعان. مەملەكەت ارقىلى جايىلىمدىق جەرلەردى جاقسارتۋ شارالارى جۇزەگە اسىرىلىپ, ونىمدىلىگىن ساقتاپ قالدى. قازىر وبلىستا 840 مىڭعا جۋىق مال بار, ولاردىڭ جالپى سانى 15%-عا جۋىق ءوستى. 2014 جىلدان 2020 جىلعا دەيىن 400-گە جۋىق ۇڭعىما سالىندى جانە قالپىنا كەلتىرىلدى», دەپ ءتۇسىندىردى قاراشوكەەۆ.
بۇعان دەيىن ەربول قاراشوكەەۆ حالىققا ۇندەۋ جاساپ, قۇرعاقشىلىق پەن جەم-ءشوپتىڭ جەتىسپەۋشىلىگىنەن مالدىڭ جاپپاي قىرىلۋى ورىن العان ماڭعىستاۋ وبلىسىنىڭ شارۋالارىنا كومەك بەرۋدى سۇرادى. اشم قىزمەتكەرلەرى ءبىر كۇندىك جالاقىسىن مۇقتاج فەرمەرلەرگە كومەك رەتىندە اۋداردى.
