ايماقتار • 12 تامىز، 2021

ۇستازدار قاۋىمىنىڭ 92،6%-ى ۆاكتسينا الدى

30 رەت كورسەتىلدى

قاراعاندى وبلىسىندا ىندەتتىڭ ورشۋىنە بايلانىستى ءبىلىم بەرۋ قىزمەتكەرلەرىنىڭ جاڭا وقۋ جىلىنا دەگەن دايىندىعىنا ايرىقشا ءمان بەرىلگەن. سول سەبەپتى ءوڭىر مۇعالىمدەرىنىڭ كوروناۆيرۋس ينفەكتسياسىنا قارسى ۆاكتسينا الۋ ءىس-شاراسى كەڭ اۋقىمدا ۇيىمداستىرىلدى.

 

قازىرگى ۋاقىتتا ءداستۇرلى وقۋعا ورالۋ شارتتارىنىڭ بىرىنە جاتاتىن ەكپە الۋ ناۋقانى اياقتالۋعا جاقىن. بۇل تۋراسىندا ونلاين رەجىمدە وتكەن اپپاراتتىق كەڭەستە وبلىستىق ءبىلىم باسقارماسىنىڭ باسشىسى گۇلسىم قوجاحمەتوۆا ءمالىم ەتتى.

بيىلعى وقۋ ۇدەرىسىن ۇيىمداستىرۋ بويىنشا وقىتۋدىڭ ءتورت نۇسقاسى قاراس­تىرىلماقشى. ونىڭ ءبىرىنشىسى – قا­شىقتان وقىتۋ. ودان كەيىنگىسى – ارا­لاس وقىتۋ: مۇندا ساباقتاردىڭ 80%-ى شتاتتىق فورماتتا جانە 20%-ى قا­شىقتان وتكىزىلەدى. تاعى ءبىر ارالاس وقى­تۋدا 1-4-سىنىپتار شتاتتىق فور­ماتتا وقيدى. ال 5-11 سىنىپتاردى وقى­تۋ ءۇش كۇن وفلاين جانە ءۇش كۇن ونلاين رەجىمگە كوشىرىلەدى. وقىتۋدىڭ ءتورتىن­شىسى – شتاتتىق وقىتۋعا تولىق كوشۋ.

گ.قوجاحمەتوۆا مۇنداي شەشىمنىڭ ەپيدەميالىق جاعدايعا بايلانىستى قابىلدانعانىن ايتادى.

– بۇگىندە ءبىلىم بەرۋ ۇيىمدارىنىڭ 39 240 پەداگوگى مەن قىزمەتكەرى نەمەسە ۇستازدار قاۋىمىنىڭ 92،6%-ى كوروناۆيرۋس ينفەكتسياسىنا قارسى ۆاكتسينا الدى. سونداي-اق كوللەدجدەردىڭ 18 جاستان اسقان 4 389 ستۋدەنتى ەكپە جاساتتى، بۇل كورسەتكىش 55،6%-دى قۇ­رايدى. بارلىق ۇيىمدا پەداگوگتەر مەن قىزمەتكەرلەردىڭ، سونداي-اق اتا-انالاردىڭ دەنساۋلىق مارتەبەسىن تەكسەرۋ ءۇشىن Ashyq جۇيەسى ورناتىلعان. ءبىلىم بەرۋ ۇيىمدارى مەن ستۋدەنتتىك جاتاقحانالار تولىق كولەمدە ساني­تار­لىق قۇرالدارمەن قامتاماسىز ەتىلگەن، – دەپ اتاپ ءوتتى وبلىستىڭ باس مۇعالىمى.

سونىمەن قاتار باسقارما باسشى­سى ءبىلىم مەكەمەلەرىنىڭ جاڭا وقۋ جى­لىنا دايىندىعىن تەكسەرۋ ساني­تار­لىق-ەپي­دەميالىق باقى­لاۋ دەپار­تا­مەن­تىمەن بىرلەسىپ جۇرگىزىلەتىنىن مالىمدەدى.

قازىرگى تاڭدا مەكتەپتەردەگى بالالار ءۇشىن قاۋىپسىز ورتا قۇرۋ ماسەلەسى وتكىر تۇر. وسى ورايدا گ.قوجاحمەتوۆا وڭىردەگى ءبىلىم بەرۋ مەكەمەلەرىنىڭ جارتىسىنان كوبىندە دابىل تۇيمەلەرى پايدا بولعانىن ايتتى. سونداي-اق مەكتەپتەر مەن كوللەدجدەردە داۋىستىق ەس­كەرتۋ جۇيەلەرى دە ورناتىلۋدا. بۇ­دان بولەك، 92 ءبىلىم بەرۋ مەكەمەسىنىڭ كىرە­بەرىستەرىندە تۋرنيكەتتەر ورناتىلدى. باسقارما باسشىسى بۇل جۇمىستىڭ الداعى ۋاقىتتا دا جالعاسىن تاباتىنىن ايتتى.

بۇعان قوسا وبلىستىڭ باس مۇعالىمى مەكتەپتەردە، بالاباقشالاردا جانە بالالار ۇيلەرىندە اۋقىمدى جوندەۋ جۇمىستارى جۇرگىزىلگەنىن ايتىپ ءوتتى. مىسالى، بيىل 120 مەكتەپ، 26 بالا­باقشا، 19 كوللەدج جانە 1 بالالار ءۇيى جوندەۋدەن وتكەن. بۇل جۇمىستار ءالى دە جالعاسۋدا.

اپپارات جيىنىندا جوندەۋ جۇمىس­تارىن ۋاقىتىندا اياقتاپ، ونىڭ ساپاسىن قاداعالاۋدى تاپسىرعان وبلىس اكىمى جەڭىس قاسىمبەك ءبىلىم باسقارماسى سا­ني­تارلىق-ەپيدەميالىق با­قى­لاۋ دەپارتامەنتىمەن بىرلەسىپ، وقۋ­شى­لار مەن ستۋدەنتتەردى ءداستۇرلى جۇيەدە وقىتۋ ءۇشىن جاعداي جاساۋ جونىندە شارالار قابىلداۋى قاجەتتىگىن اتاپ ءوتتى.

– قورعانىس قۇرالدارىمەن جابدىق­تاۋدى تولىق كولەمدە قامتاماسىز ەتۋ كەرەك. ءبىلىم بەرۋ ۇيىمدارىنىڭ پەداگوگتەرى مەن پەرسونالىن ۆاكتسي­نا­لاۋ ءىسى جالعاستىرىلۋى ءتيىس. سونى­مەن قاتار كومپيۋتەرلەرمەن جانە وقۋ­­لىقتار­مەن قامتاماسىز ەتۋ باقى­لاۋ­­دا بولادى. از قامتىلعان مەكتەپ وقۋ­شىلارىن الەۋمەتتىك قولداۋعا ەرەكشە نازار اۋدارۋ كەرەك، – دەدى ج.قاسىمبەك.

وسى ورايدا قاراعاندى وبلىسىندا وقۋشىلاردى تەگىن وقۋلىقتارمەن قامتاماسىز ەتۋ بويىنشا جۇمىستاردىڭ جوسپارعا ساي جۇرگىزىلىپ جاتقانىن ايتا كەتكەن ءجون. وتكەندەگى ءبىر اپتا­نىڭ ىشىندە باسپا ونىمدەرىنىڭ جۇك كولىك­تەرىنە تيەلگەن ەكى ۇلكەن پارتياسى جەتكىزىلدى.

بۇل جونىندە ءوزىنىڭ فەيسبۋك پاراق­شاسىنا گ.قوجاحمەتوۆا بىلاي دەپ جازدى: «بۇگىندە مەكتەپ قورىنان 2–11-سى­نىپ وقۋشىلارىنا وقۋلىقتار بەرىل­دى. بيىل 1 جانە 2-11-سىنىپتار ءۇشىن توزعان كىتاپتاردى اۋىستىرۋ ءۇشىن قايتا شىعارىلعان وقۋلىقتارعا تاپسىرىس بەرىلدى. بۇل ماقساتتا 1 ملرد 766 ملن تەڭگەگە 16 باسپامەن كەلىسىمشارت جاسالدى. وبلىس بويىنشا بەس تاسىمالداۋشى انىقتالدى».

وقۋلىقتاردى جەتكىزۋ ءىسى 25 تا­مىز­­دا تولىعىمەن اياقتالادى دەپ جوس­پارلانعان. جالپى باسپا ونىم­دەرى­نىڭ ءبىرىنشى توپتاماسى 30 شىلدەدە، ەكىنشىسىنىڭ 5 تامىزدا جەتكىزىلگەن ەدى.

بيىل قاراعاندى وبلىسىندا 21 800 بالا مەكتەپ تابالدىرىعىن تۇڭعىش اتتايدى ەكەن. ال جاڭا وقۋ جىلىنداعى وقۋشىلاردىڭ جالپى سانى 209 مىڭدى قۇرايدى.

 

قاراعاندى وبلىسى

 

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ددسۇ QazVac-تى قاشان مويىندايدى؟

كوروناۆيرۋس • بۇگىن، 12:35

ۇقساس جاڭالىقتار