قازاقپارات سايتىنىڭ مالىمەتىنشە, ءۇش بولىمنەن تۇراتىن عىلىمي-زەرتتەۋ كىتابى وزبەكستان رەسپۋبليكاسىنىڭ جازۋشىلار وداعىنىڭ «ادابيەت» باسپاسىنان جارىق كورگەن. وزبەكستان رەسپۋبليكاسى تۇران عىلىمدار اكادەمياسىنىڭ جانە قازاقستان رەسپۋبليكاسىنىڭ گۋمانيتارلىق عىلىمدار اكادەمياسىنىڭ اكادەميگى قالدىبەك سەيدانوۆتىڭ اتالمىش ەڭبەگىنىڭ العاشقى بولىمىندە «قازاق-وزبەك حالىقتارىنىڭ ءوزارا ادەبي بايلانىستارىنىڭ تاريحي تامىرلارى» تۋرالى ەگجەي-تەجەي باياندالعان. ەكىنشى ءبولىم «اسىل ءسوزدىڭ اتاسى» دەپ اتالادى. مۇندا وزبەك جازبا ادەبيەتىنىڭ نەگىزىن قالاعان ا.ناۋايدىڭ ءومىرى مەن شىعارماشىلىعىنا تەرەڭ توقتالىپ, مول مالىمەت بەرىلەدى. ءۇشىنشى ءبولىم «ناۋاي جانە قازاق ادەبيەتى», «ناۋاي جانە اباي» دەپ اتالاتىن قوس تاراۋدان تۇرادى. بۇل بولىمدە وزبەك پوەزياسىنىڭ اسقار شىڭىنا بالانعان تۇلعا تۋىندىلارىنىڭ قازاق اقىندارىنا, ونىڭ ىشىندە ابايعا تيگىزگەن ادەبي ىقپالى جايلى وي قوزعالادى.
عىلىمي-زەرتتەۋ ەڭبەك جوو ۇستازدارى مەن ستۋدەنتتەرگە, مەكتەپ مۇعالىمدەرى مەن ىزدەنۋشىلەرگە ارنالعان وقۋلىق قىزمەتىمەن بىرگە, قازاق-وزبەك ادەبيەتىن تۇششىنىپ وقيتىن قالىڭ وقىرمانعا باعىتتالعان.
