قوعام • 10 تامىز، 2021

ستومادان كەيىنگى ءومىر

254 رەت كورسەتىلدى

بۇگىندە مەديتسينا ءسات سايىن وزىق تەحنولوگيالارمەن تولىعىپ، بۇرىن مۇمكىن ەمەستەي كورىنەتىن دۇنيەلەردى وتاندىق مامانداردىڭ اتقاراتىنىنا بوي ۇيرەنگەنى انىق. ايتسە دە ستومادان كەيىن ىشەكتى رەكونسترۋكتسيالاۋدى ءوز حيرۋرگتەرىمىزدىڭ جۇرگىزۋى ەرەكشە قۋانتادى. ەلورداداعى №2 كوپبەيىندى قالالىق اۋرۋحانادا وسىنداي ستومادان سوڭعى ءومىر ساپاسىن جاقسارتۋ جالعاستى بولۋدا.

الدىمەن ستوما دەگەننىڭ ءوزى نە، ول قالاي پايدا بولادى، وسىعان توقتالىپ وتكەنىمىز ءجون بولار. ستوما – سىرقاتتىڭ اششى ىشەگى نەمەسە توق ىشەگى اۋىرعاندا دارەتىن سىرتقا شىعاراتىن جاساندى جول جاساپ قويۋ. ياعني پاتسيەنتتىڭ قالىپتى جاعدايدا دارەتكە بارا المايتىندىعىنان جاسالاتىن قاجەتتىلىك. سىرتقا شىعۋى ءتيىس دۇنيەنىڭ ىشتە قالۋىنىڭ ادام ءومىرى ءۇشىن كوپتەگەن زيانى بار. ۋلانعان اعزامەن قاتتى قينالىپ تۇسكەن جانعا وپەراتسيا جاسالىپ، ستوما قويىلعاندا عانا بەتى بەرى قارايتىنىن ايتادى ماماندار. «ال ستوما جاساۋعا ماجبۇرلەيتىن دارەت جۇر­مەي قالۋىنىڭ سەبەپتەرى نەدە؟» دەپ سا­ۋال قويدىم ەلورداداعى №2 كوپبەيىندى قا­لالىق اۋرۋحانانىڭ حيرۋرگيالىق ينفەكتسيالار جانە كولوپروكتولوگيا بولىمشەسىنىڭ مەڭگەرۋشى، كولوپروكتولوگ، دارىگەر-ونكولوگ جومارت جالعاسباەۆقا.

– ونىڭ سەبەپتەرى ءبىراز. ءبىر ادامدا ىشەگىندە ىسىكتەر اسەرىنەن جۇرمەي قالسا، ەندى بىرىندە ءىش قۋىسىنىڭ اۋىر پاتولوگيالارى، ياعني جەدەل حيرۋرگيالىق كومەكتى قاجەت ەتەتىن ءىش پەردەنىڭ قابىنۋىنان بولادى. ءبىرىنشى جاعدايدا ىسىكتى الىپ تاستاپ بارىپ ستوما قويىلسا، ەكىنشىسىنىڭ سەبەپتەرى كوپ. ول سوقىرىشەكتىڭ اسقىنۋىنان، ءوت قابىنىڭ قابىنۋىنان، ىشەكتىڭ نەمەسە اسقازاننىڭ تەسىلۋىنەن بولۋى مۇمكىن. جالپى، ادامدا 4-5 مەتر شاماسىندا ىشەك بار دەسەك، سولاردىڭ جۇمىسىنا قاجەتتىلىكتى قامتاماسىز ەتەتىن قان تامىرلارى بىتەلىپ قالعاندا، ىشەك قان جۇرمەۋىنەن قارايىپ، نەكروزعا ۇشىرايدى. مۇنداي كەزدە ىشەكتى سىرتقا شىعارىپ، ستوما قويىلماسا ادام ومىرىنە قاتەر تۋادى، – دەدى جومارت عالىم ۇلى.

ول سونداي-اق نۇر-سۇلتان قالاسى بويىنشا تەك №2 اۋرۋحانا قابىرعاسىندا وسى ىشەكتى رەكونسترۋكتسيالاۋ جۇرگىزىلەتىنىن اتاپ ءوتتى.

– سوندا قالاي، ىشەكتى قايتادان ىشكە كىرگىزىپ، سالىپ بەرەسىزدەر مە؟ – دەدىم قىزى­عۋ­شىلىعىم ارتا ءتۇسىپ.

– ستومامەن پاتسيەنت بىرنەشە ايدان 1-2 جىلعا دەيىن ءجۇرۋى مۇمكىن. سوندىقتان ءبىز وسىنداي اۋرۋلارعا ارنالعان ارنايى كابينەت اشىپ قويدىق. نەگە دەسەڭىز، ىشەگى سىرتتا تۇرعان پاتسيەنت اۋرۋحانادان شىققان سوڭ تۇرعىلىقتى جەرىندەگى ەمحاناسىنا بارادى، ال ول جاقتا ارنايى كولوپروكتولوگ مامان بولماعاندىقتان كوبىنە رەابيليتاتسيادان تىس، قاراۋسىز قالىپ جاتادى. سوسىن بۇل ءوزى ناۋقاستارعا ۇلكەن پسيحولوگيالىق جۇك ارتادى. ساۋ ادام قوناققا بارماي ما، كىسىمەن ارالاسپاي ما، سوندايدا بەلىنە بايلانعان دارەت قۇيىلاتىن قاپشىعىنان قىسىلادى. ال ستوما ەلورداداعى اۋرۋحانالاردىڭ حيرۋرگيا بولىمشەلەرىنىڭ بارلىعىندا جاسالعانىمەن، ونى قالپىنا كەلتىرىپ، ىشكە قايتا سالۋ تەك بىزدە عانا جۇزەگە اسادى، – دەدى مامان.

دارىگەرلەرمەن اڭگىمەدەن اڭعارعانىمىز، جوعارىدا ايتىلعان دارەت جينايتىن قاپشىقتىڭ باعاسى دا ارزان ەمەس كورىنەدى. كەي رەتتە الىستاعى اۋدان تۇرعىندارى ىزدەپ كەلەدى ەكەن. ء«وز جاعىنداعى دارىگەرلەردەن ء«سىز ەندى ءومىر بويى ستومامەن جۇرەسىز» دەگەندى ەستىپ قامىعىپ كەلگەن جاندى قالىپتى ومىرگە قايتارۋ قانداي قۋانىش سىيلايتىنىن بىلسەڭىز عوي»، دەيدى دارىگەر.

ىشەكتى دۇرىستاپ، ادامدى فيزيكالىق جانە پسيحولوگيالىق تۇرعىدان دا كادىمگىدەي تىرشىلىككە ورالتىپ العىس ارقالاعان دارى­گەر­لەر سوزىلمالى ءىش قاتۋلارىنان، 10-15 كۇن بويىنا دارەتكە شىقپايتىن پاتسيەنتتەردى دە دەرتتەن قۇتقارىپ، ونىڭ پايدا بولۋ سەبەبىن انىقتاپ، ەم جاساۋدى جاڭا تەحنولوگياعا نەگىزدەپتى.

– سوزىلمالى ءىش قاتۋدىڭ سەبەبىن ىزدە­گەندە ول توق ىشەكتىڭ كەڭەيۋى نەمەسە ۇزا­رۋىنان تۋادى. ۇزارىپ كەڭەيگەندە 10-15 سم ەمەس، 1-1،5 مەترگە دەيىن كەڭەيىپ كەتەدى دە، دارەت شىقپاي سونىڭ بويىندا اپتالاپ تۇرا بەرەدى. ول پاتسيەنتتى دارەتتىك ينتوكسيكاتسياعا الىپ كەلەدى، قازاقشالاساق اعزا ۋلانادى. ناۋقاستارعا جاڭا تەحنولوگيا بويىنشا وپەراتسيا جاسالىپ، لاپوروسكوپيالىق ادىسپەن كەڭەيىپ كەتكەن ىشەكتى قالىپتى جاعدايىنا الىپ كەلەمىز. بۇل دا وتە كۇردەلى وپەراتسيا قاتارىندا، بۇرىن بۇل ءۇشىن شەتەلگە بارىپ، قىرۋار اقشا تولەپ جاساتاتىن، – دەپ ءسوزىن جالعادى ج.جالعاسباەۆ.

بولىمشە مەڭگەرۋشىسى، جوعارى ساناتتاعى دارىگەر، دەنساۋلىق ساقتاۋ ءىسىنىڭ ۇزدىگى جومارت عالىم ۇلىمەن اڭگىمە بارىسىندا ءوز ءىسىنىڭ كانىگى شەبەرى بولۋىمەن قاتار، ءار پاتسيەنتىنە دەگەن جۇرەگىندە ايالاعان سەزىم، ءومىرى ۇزارا تۇسسە ەكەن دەگەن ىقىلاستى اڭداپ:

– 14 جىل كولوپروكتولوگ بولىپ جۇمىس ىستەگەلى ءالى كۇنگە ويىڭىزدان كەتپەيتىن، قيىن دا كۇردەلى جايتتى ايتىپ بەرىڭىزشى، – دەپ ءوتىندىم.

– نەگىزى ءار دارىگەردىڭ ەسىنەن كەتپەيتىن مۇن­داي جايتتار وتە كوپ بولادى. ءار وپە­راتسياعا دايىندىق، ودان ونى اتقارىپ شىققان سوڭ دا تالاي ۇيقىسىز تۇندەر وتەدى. وپەراتسيا قالاي جاسالدى، ۋاقتىلى ما، الدە ۋاقىتىنان كەش قالدىق پا دەگەن ساراپتاۋدان مي سارسىپ كەتەتىن تۇندەر وتەدى. بىزگە حيرۋرگيا بويىنشا ەڭ اسقىنعان ءىرىڭدى ينفەكتسياسى بار ناۋقاستار كەلەدى. وڭاي ەش نارسە جوق. پاتسيەنتتەر ۋاقىتىن وتكىزىپ، دۇرىس قارالماي، اۋرۋىن اسقىندىرىپ كەلگەندە قالاي كومەكتەسۋ جونىندە باس قاتىرامىز. وپەراتسيالار 5-6 ساعاتتاپ جۇرەدى. اۋرۋ جازىلعانداعى قۋانىشتا ءتىپتى شەك بولمايدى. بىردە 18 جاستاعى كەلىنشەك بولىمشەگە ءتۇستى. بوسانعاننان كەيىن 10-ىنشى تاۋلىكتە اياعىن باسا الماي كەلدى. الدىندا سان ەتىنەن جاراقات العان ەكەن. جالپى، ءىرىڭدى ينفەكتسيا­دا كوزگە كورىنبەيتىن گازدى گانگرەنا دەگەن بار. كەلىنشەكتىڭ اياعىنىڭ ءشىرىپ جاتقانى سىرتتاي ەش بايقالمايدى. بۇل بۇلشىق ەتتەر اراسىمەن تەرەڭدە جاسىرىن ءجۇرىپ جاتقان ۇدەرىس. سوندىقتان مۇنداي كەزدە مامانداردىڭ ءوزى جاسىرىن ءجۇرىپ جاتقان اۋرۋدى تابا الماي، ناۋقاستى كەيدە ۇيىنە قايتارىپ جاتادى. ءبىز دە بىردەن ول دياگنوزدى قويا المادىق. سوندىقتان ۇيگە جىبەرمەي باقىلاپ، اقىر سوڭىندا وپەراتسياعا الدىق. نەگىزىندە گازدى گانگرەنادا ىرىڭدەۋ اياقتان باستالسا، ول اعزا ىشىمەن بويلاپ مويىنعا دەيىن جەتەدى. ءىرىڭ جوعارى قاراي ورلەي بەرەدى. ونى كەسە بەرەسىڭ، كەسە بەرەسىڭ، ال ءىرىڭ بولسا ورلەۋىن توقتاتپايدى. ونداي جاعدايدا ادام ومىرمەن قوشتاسادى. ال ءبىز ءىرىڭدى ومىراۋ تۇسىنان توقتاتىپ، وپەراتسيا جاسادىق. 25 كۇن اۋىر حالدە جانساقتاۋ بولىمىندە، ودان بارلىعى 76 كۇن جاتىپ، 4 رەت وپەراتسيادان ءوتىپ، تۋعانىنا 87 كۇن بولعان بالاسىنا ورالعاندا اسا ءبىر قاتتى قۋاندىم. نەگىزى حيرۋرگتەر جۇمىسى ىزدەنىس، تاجىريبەمەن قاتار الدىڭدا ءجون كورسەتەر تالىمگەرىڭ ارقىلى سىڭەدى. بۇل رەتتە باتىر ايتمولدينداي تالىمگەر ۇستازىم بولعانىن اۋىز تولتىرا ايتامىن. سول كىسىنىڭ قاراماعىنا كەلىپ، ەندى جولىن جالعاستىرۋدامىن. قازىر مەنەن ۇيرەنىپ جۇرگەن جاس حيرۋرگتەر بار. ءومىر جالعاستىعى، ساباقتاستىق دەگەن سول ەمەس پە؟ – دەدى بولىمشە مەڭگەرۋشىسى.

ايتپاقشى، جوعارىدا اتالعان ستوما كابينەتى پاتسيەنتتەرگە قىمبات قاپشىقتاردى تەگىن بەرىپ، پاتسيەنتتەردىڭ جۇگىن جەڭىلدەتىپ جاتقانىن ايتقان ءجون. بۇل ىسكە قاراجات تابىلۋى، ستومادان سوڭعى ءومىردى ساپالى ەتۋدى ويلاستىرۋ وڭاي شارۋا ەمەس ەكەنى انىق. سوندىقتان ەلوردادا تۇڭعىش رەت كۇردەلى وپەراتسيانى جولعا قويعان №2 كوپبەيىندى قالالىق اۋرۋحانانىڭ باسشىلىعى مەن بولىمشە ماماندارىنا العىستان باسقا ايتارىمىز جوق.

سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

سپورت جاڭالىقتارىنا شولۋ

سپورت • بۇگىن، 09:11

ۇقساس جاڭالىقتار