تۇرعىندار ارقانى كەڭگە سالعان سوڭ دا جاعداي ۋشىعادى. وبلىس ورتالىعىندا ءبىر تاۋلىك ىشىندە 111 ادام اۋىرسا, سەمەيدە 140 ادام تىركەلگەن. ينفەكتسيانىڭ جاڭا تولقىنىنا وبلىستىڭ مەديتسينالىق مەكەمەلەرى تولىق دايىن. بۇل تۋرالى دەنساۋلىق ساقتاۋ باسقارماسىنىڭ باسشىسى ەرمەك وماربەكوۆ مالىمدەدى.
ونىڭ ايتۋىنشا, وڭىردەگى ينفەكتسيالىق ستاتسيونارلاردا 4 مىڭنان اسا توسەكتىك ورىن بار. وندا قازىر 900-گە جۋىق ادام ەمدەلىپ جاتىر. سونداي-اق 350-دەن استام رەانيماتسيالىق توسەكتىك ورىن قاراستىرىلعان. رەانيماتسيا مەن قارقىندى تەراپيا بولىمشەسىندە 76 ناۋقاس ەم الۋدا. جالپى, وبلىستىڭ توسەكتىك ورىن قورى 21 پايىزعا تولعان. جاعداي دارىگەرلەردىڭ ءجىتى باقىلاۋىندا.
– وبلىستا كۇن سايىن وڭىرلىك شتاب وتىرىسى ءوتىپ, وبلىستاعى ەپيدەميالىق جاعدايدى تالقىلايمىز. ايتا كەتسەم, اۋرۋحانالار قاجەتتى جابدىقتارمەن تولىق جابدىقتالعان. رەنتگەن, ءوجج, وتتەگى كونتسەنتراتورلارى, كومپيۋتەرلىك توموگرافتار جەتكىلىكتى. ءدارى-دارمەكتەر مەن جەكە قورعانىس قۇرالدارىنىڭ قورى دا بار, – دەپ اتاپ ءوتتى ە.وماربەكوۆ.
الايدا «اۋىرىپ ەم ىزدەگەنشە, اۋىرماۋدىڭ جولىن ىزدە» دەمەي مە؟! اۋىرماۋدىڭ جولى – ەكپە الۋ. ۆاكتسينا الىپ, ىندەت جۇقتىرىپ العان جاعدايدا رەانيماتسيا توسەگىنە تاڭىلمايدى ادام. دەنساۋلىق ساقتاۋ باسقارماسىنىڭ باسشىسى سولاي دەيدى. ءتىپتى ىندەتكە سەنبەيتىندەردى جۇقپالى اۋرۋحانالار مەن رەانيماتسيا بولىمشەلەرىن كورىپ قايتۋعا كەڭەس بەردى.
– كوزبەن كورگەن ادام مۇنداي جاعدايعا ءتۇسىپ, قينالعانىن قالامايدى. سوندا عانا كوزدەرى جەتىپ, ۆاكتسينا الۋعا بەل بۋادى. ۆاكتسينالانعانداردىڭ جالپى سانىنىڭ تەك 1,6 پايىزى عانا كوروناۆيرۋسپەن اۋىرعانىن اتاپ وتكىم كەلەدى. ولار اۋرۋدى جەڭىل جانە ورتاشا تۇردە باستان وتكەردى. ەشقايسىسى رەانيماتسياعا جەتكەن جوق. سەبەبى ولاردىڭ يممۋنيتەتى مەن انتيدەنەلەردىڭ ءتيترى جوعارى, – دەدى ە.وماربەكوۆ.
جالپى, بۇگىنگى تاڭدا وڭىردە ۆاكتسينانىڭ ءبىرىنشى كومپونەنتىن 440 مىڭعا جۋىق ادام السا, ەكىنشى كومپونەنتىن 335 مىڭنان اسا ادام العان. وسى ورايدا دەنساۋلىق ساقتاۋ باسقارماسىنىڭ باسشىسى ۆاكتسينا جەتكىلىكتى مولشەردە ەكەنىن اتاپ ءوتتى. قازىرگى ۋاقىتتا ايماقتا 80 مىڭ ۆاكتسينا دوزاسى بار.
وبلىس «قىزىل ايماققا» ەنگەلى دەمالىس كۇندەرى وسكەمەن مەن سەمەيدە قوعامدىق كولىك قوزعالىسى توقتاتىلدى. مۇنداي تاپسىرما ينفەكتسيانىڭ تارالۋىن ازايتۋ جانە جاعدايدى تۇراقتاندىرۋ ءۇشىن ۆەدومستۆوارالىق كوميسسيانىڭ وتىرىسىندا بەرىلدى. بۇل شەكتەۋ شارالارى ەپيدەميالىق جاعداي تۇراقتالعانعا دەيىن ساقتالادى.
شىعىس قازاقستان وبلىسى
