كوروناۆيرۋس • 10 تامىز، 2021

احۋال الاڭداتارلىقتاي

145 رەت كورسەتىلدى

دەنساۋلىق ساقتاۋ ءمينيسترى الەكسەي تسوي اتىراۋ وبلىسىنا جۇمىس ساپارى بارىسىندا ماقات اۋداندىق اۋرۋحاناسى مەن بايگەتوبە اۋىلدىق فەلدشەرلىك-اكۋشەرلىك بەكەتتىڭ جۇمىسىمەن تانىستى. سودان سوڭ اتىراۋداعى ەپيدەميالىق احۋالعا بايلانىستى ايماقتىق شتابتىڭ وتىرىسىن وتكىزدى.

قازىر بۇل وڭىردەگى اۋرۋحانالاردا توسەكتىك ورىنمەن قامتۋ بىرتىندەپ ۇلعايىپ بارادى. ماسە­لەن، 5 تامىزدا ستاتسيونارلاردا ەمدەلىپ جات­قان ناۋقاستار سانى 1 734-كە جەتتى. بۇل ءبىر اي بۇرىنعى ستاتيستيكادان 3،5 ەسەگە كوبەيگەنىن كورسەتەدى. جانساقتاۋ بولىمىنە 76 پاتسيەنت ءتۇسىپ، 5 شىلدەدەن بەرى 2،5 ەسەگە كوبەيگەن.

قازىر وبلىستا 16 ينفەكتسيالىق ستاتسيونار بار. ونىڭ جەتەۋى اۋدانداردا، ال توعىز ستاتسيونار وبلىس ورتالىعىندا ورنا­لاس­قان. اتىراۋ قالاسىنىڭ وزىندە توسەكتىك ورىن جۇك­تەمەسى ارتقان. مۇندا التى ستا­تسيو­نار­دىڭ تور­تەۋىندەگى جۇكتەمە 97%-دى قۇراي­دى. وسى­لاي­شا، مۇنايلى شاھاردا ينفەك­تسيالىق توسەكتىك ورىننىڭ جۇكتەمەسى 60%، رەانيما­تسيا­لىق كەرەۋەتتەر جۇكتەمەسى 67%-عا ۇلعايىپ وتىر.

سونداي-اق ءمودۋلدى اۋرۋحانادا توسەكتىك ورىننىڭ جەتىسپەۋشىلىگى بايقالادى. مۇندا 200 توسەكتىك ورىنعا ەسەپتەلگەن ينفەكتسيالىق ستا­تسيو­ناردا 205 ادام، ونىڭ ىشىندە 105 جۇك­تى ايەل ەم الىپ جاتىر. جانساقتاۋ بولىمىندە 25 پاتسيەنت بار، ونىڭ ۇشەۋى – اۋىر حالدەگى جۇكتى ايەل.

– بۇل – الاڭداۋشىلىق تۋعىزاتىن جايت. ويتكەنى جۇكتەمەنىڭ ارتۋى توسەكتىك ورىن­نىڭ جەتىسپەۋشىلىگىنە، تۇرعىندارعا ستاتسيو­نار­لىق كومەك كورسەتۋدىڭ تومەندەۋىنە اكەلىپ سوعۋى مۇمكىن، – دەيدى ءمينيستردىڭ ورىنباسارى اجار عينيات. – مينيسترلىكتىڭ جۇ­مىس توبى اتىراۋ قالاسىنداعى بەس ەمحا­نا­دا، ەكى جەكەمەنشىك ەمحانادا، سونداي-اق ەكى اۋداندىق اۋرۋحانادا مونيتورينگ جۇر­گىزدى. تالداۋ ناتيجەسىندە جىلجىمالى بريگا­دالار سانىنىڭ جەتكىلىكسىزدىگى، تۇر­عىنداردان تۇسكەن شاقىرتۋلاردىڭ كەشەندى مەديتسينالىق اقپاراتتىق جۇيەگە ۋاقىتىندا ەنگىزىلمەگەنى بايقالدى. بۇدان سوڭ ءبىر جىلجىمالى بريگادانىڭ ناقتى جۇكتەمەسى قانشا ەكەنىن ءبىلۋ قيىندايدى. وسىنداي سەبەپپەن مينيسترلىكتىڭ ۇسىنىسىمەن اتى­راۋ قالاسىندا ناۋقاستاردىڭ تىركەلۋىن، ءمو­بيلدى توپتاردىڭ جۇمىسىن باقىلاۋ ءۇشىن احۋالدىق ورتالىقتار قۇرىلدى. وعان ناۋ­قاستاردى اۋرۋحاناعا جاتقىزۋ، امبۋ­لاتورلىق ەمنىڭ ۋاقتىلى تاعايىندالۋى، ءدارى-دارمەكپەن تەگىن قامتاماسىز ەتۋ كىرەدى.

ا.عينياتتىڭ ايتۋىنشا، بارلىق مەدي­تسينالىق ۇيىمدا ناۋقاستاردى امبۋلا­تو­ريالىق باقىلاۋ ءتيىستى دەڭگەيدە ەمەستىگى انىق­تالعان. باقىلاۋ پاراقتارى ساپاسىز جۇر­­گىزىلگەن. كوروناۆيرۋس ينفەكتسياسىن جۇق­تىر­عان­داردى ەمدەۋگە ارنالعان كلي­ني­كالىق حاتتامالار ساقتالمايدى. دارى­گەر­لەر ەگدە جاستاعى ەمدەلۋشىلەردى باقى­لاۋدا ەنجارلىق تانىتىپ وتىر. جىل­جى­مالى بريگاداداعى دارىگەرلەر ۋچاس­­كەلىك قابىلداۋداعى جۇمىسپەن بىرىكتىرە اتقا­­را­تىنى كەزدەسەدى. بۇل سانيتارلىق-ەپي­دەميالىق رەجىم تالابىنا قايشى كەلەدى.

مينيستر ا.تسويدىڭ پىكىرىنە سۇيەنسەك، اتىراۋ وبلىسىندا تۇرعىنداردىڭ ساني­تار­لىق-ەپيدەميالىق تالاپتار­دى ساق­تا­ماۋىنان كوروناۆيرۋس ينفەكتسيا­سىنىڭ تارالۋى ەداۋىر ۇلعايىپ وتىر. ناۋقاستاردى اۋرۋ­­حاناعا جاتقىزۋ پايىزى جوعارىلاپ بارادى. ال «دەلتا» شتامىنىڭ تارا­لۋىن تەجەۋگە قاتىس­تى ءىس-شارانىڭ، امبۋ­لا­تور­لىق-ەمحانا­لىق جۇ­مىستىڭ جەتكى­لىكسىز ۇيىمداس­تىرىلۋى جاع­دايى اۋىر ناۋقاس­تاردىڭ كوبەيۋىنە ىقپال ەتكەن.

ال كەشە «تەڭىزشەۆرويل» جشس «تەڭىز» كەنى­شىندە ۆاحتالىق اۋىسىمدى ۋاقىت­شا توق­تاتتى. بۇعان كەن ورنىنداعى ينفەك­تسيالىق ستا­تسيو­ناردا ەمدەلىپ، كۇن سايىن كوروناۆيرۋس جۇق­تىر­عان ناۋقاستار سانىنىڭ كوبەيۋى سەبەپ بولعان.

– ءبىزدىڭ كومپانياداعى نەگىزگى باسىم­دىق – قىزمەتكەرلەردىڭ دەنساۋلىعى مەن قاۋىپسىزدىگىن ساقتاۋ. وسىعان بايلانىستى «تەڭىزشەۆرويل» قىزمەتكەرلەرى اراسىندا COVID-19 ىندەتىنىڭ تارالۋىن ازايتۋ ءۇشىن 9 تامىزدان باستاپ «تەڭىز» كەنىشىندەگى جەدەل ەمەس قىزمەتكەرلەردىڭ ۆاح­تالىق اۋىسىمىن جانە قايتا جۇمىلدىرۋىن ۋاقىت­شا توقتاتادى. اتالعان ۋاقىتشا شارانىڭ «تەڭىز» كەنىشىندە جۇرگىزىلىپ جاتقان جوس­پارلى جوندەۋ جۇمىستارىمەن اينالىساتىن قىزمەتكەرلەرگە قاتىسى جوق، – دەپ حابارلادى كاسىپورىننىڭ ءباسپاسوز قىزمەتى.

«تەڭىز» كەنىشىندە ۆيرۋستىڭ تارالۋىن تەجەۋ ءۇشىن قاۋىپسىزدىك شارالارى، ونىڭ ىشىن­دە قىزمەتكەرلەردى «بولەك جايعاستىرۋ» (تۇر­عىن ۇيلەردە، كولىكتە جانە جۇمىس ورىندارىن­دا)، سونداي-اق پتر-سىناماسى مەن وقشاۋلاۋ بۇرىنعىشا ساقتالادى. قازىر كەن ورنىنا جۇمىسقا تارتىلعان جۇمىسشىلار اراسىندا ۆاكتسينالاۋ باعدارلاماسى جالعا­سىپ جاتىر. كوروناۆيرۋس ينفەكتسياسىنا قار­سى ۆاكتسينانىڭ العاشقى كومپونەنتىن سال­دىر­عان قىزمەتكەرلەر سانى 45 مىڭنان استى.

 

اتىراۋ وبلىسى

 

سوڭعى جاڭالىقتار

بۇۇ-نىڭ جاھاندىق شارتىنا قوسىلدى

ەكونوميكا • بۇگىن، 00:34

جەتى ءتۇرلى ءسوز

ادەبيەت • كەشە

انتىنا ادال ازامات

قازاقستان • كەشە

ەلوردا كۇنىنە تارتۋ

تەاتر • كەشە

ۇقساس جاڭالىقتار