كوروناۆيرۋس • 06 تامىز، 2021

الماتىدا ىندەتكە شالدىققانداردىڭ 23 پايىزى جاستار

89 رەت كورسەتىلدى

قوعامدىق دەنساۋلىق باسقارماسىنىڭ باسشىسى ناريمان تابىنباەۆ وڭىرلىك كوممۋنيكاتسيالار قىزمەتىندە وتكەن بريفينگتە الماتىدا كوروناۆيرۋستىق ينفەكتسياسىن جۇقتىرعان ناۋقاستاردى اۋرۋحاناعا جاتقىزۋ جانە ۆاكتسينالاۋ تۋرالى ايتتى، دەپ جازادى Egemen.kz.

سپيكەردىڭ ايتۋىنشا، قالاداعى جاعداي ۋشىعىپ تۇر، تاۋلىگىنە 1500-دەن استام جاعداي تىركەلىپ، سايكەسىنشە اۋرۋحاناعا جاتقاندار سانى كوبەيىپ كەلەدى.

«دەلتا» شتاممىنىڭ ايىرماشىلىعى – ونىڭ تەز جۇعاتىندىعى مەن ناۋقاس جاعدايىنىڭ تەز ناشارلاپ، كوبىنەسە اۋرۋحاناعا تۇسۋىندە بولسا، تاعى ءبىر ەرەكشەلىك – بۇل جاستارعا تەز جۇعادى. بۇگىندە قالالىق ستاتسيونارلارداعى 40 جاسقا دەيىنگى جاستار 23%-دى قۇرايدى. سونىمەن قاتار، 200-دەن استام بالا اۋرۋحاناعا جاتقىزىلدى»، دەيدى ن. تابىنباەۆ.

ول ءۇي كارانتينىندە 10 888 ناۋقاستىڭ جاتقانىن، ولاردىڭ 1600-ءى 14 جاسقا دەيىنگى بالالار ەكەنىن ايتتى. ستاتسيونارلاردا 5 156 ادام ەم الۋدا. قازىرگى كەزدە ستاتسيونارلاردىڭ جۇكتەمەسى  شامامەن 67%-دى قۇرايدى. اسا اۋىر جايداعى ناۋقاستار سانى – 190 ادام، اۋىر جاعدايدا – 1 368 ادام، رەانيماتسيادا جاتقاندار – 385 ادام .

«وزدەرىڭىز بىلەسىزدەر، الماتى ستاتسيونارلارى 3 ەشەلونعا بولىنگەن. بىرىنشىسىندە 3 950 توسەك-ورىن، ەكىنشىسىندە 1995، ۇشىنشىسىندە – 1100 توسەك-ورىن بار. ەگەر قاڭتار مەن اقپاندا ورتا ەسەپپەن 30-40 ناۋقاس اۋرۋحاناعا جاتقىزىلسا، قازىر 700 ادام قابىلدانۋدا، بۇل 23 ەسەگە كوپ. مۇنىڭ بارلىعى سالىستىرمالى تۇردە جاعدايدىڭ ۋشىعىپ تۇرعانىن كورسەتەدى، ناۋقاستار اۋرۋحاناعا جاپپاي جاتقىزىلۋدا. ەگەر بۇرىن جۋرناليستەر «نەگە اۋرۋحانالار جارتىلاي بوس تۇر؟» دەپ سۇراق قويسا، قازىر ولار «نەگە ورىندار جەتىسپەيدى؟» دەپ ۇنەمى سۇرايدى»، دەدى الماتى قدب باسشىسى.

ن. تابىنباەۆتىڭ ايتۋىنشا، مۇنىڭ ءبارى قالاداعى ەمدەۋ مەكەمەلەرىنىڭ ينفراقۇرىلىمىنا، مەديتسينا قىزمەتكەرلەرىنە ۇلكەن جۇكتەمە تۇسىرەدى. كۆي-مەن اۋىراتىن ناۋقاستاردى ەمدەۋگە كوپ قاراجات بولىنەدى – ءدارى-دارمەكتەرگە، ستاتسيونارلىق كۇتىمگە، پتر-تەستىلەرگە جانە ءار ءتۇرلى تەكسەرۋلەرگە. كەيدە مۇنىڭ ءبارى جەدەل جاردەمنىڭ كەشىگۋىنە اكەلۋى مۇمكىن. كۇن سايىن جەدەل جاردەمدى كۆي-مەن اۋىراتىن ناۋقاستاردىڭ شامامەن 35%-ى شاقىرادى. اۋرۋحانالاردىڭ «قاربالاس كەزى» – ساعات 12-دەن 14-كە دەيىن جانە ساعات 20-دان 22-گە دەيىنگى ارالىقتا 130 پاتسيەنت جەتكىزىلەدى.

«كوروناۆيرۋسپەن كۇرەستىڭ باستى ءتاسىلى ۆاكتسينالاۋ بولىپ قالا بەرەدى. قالادا 755 مىڭ ازاماتقا ءبىرىنشى كومپونەنت سالىندى، بۇل جوسپارلانعان كولەمنىڭ 60%-ىن قۇرايدى. ۆاكتسينانىڭ ەكىنشى كومپونەنتىن 560 مىڭ الماتىلىق قابىلدادى. قالادا ۆاكتسينالاردىڭ جەتكىلىكتى سانى بار ەكەنىن اتاپ وتكىم كەلەدى.  سپۋتنيك-V - 12 848 دوزا، قازاقستاندىق ۆاكتسينانىڭ 1600 دوزاسى بار. كۇن سايىن 7-8 مىڭ قالا تۇرعىنىنا ءبىرىنشى كومپونەنتپەن ۆاكتسيناتسيالانادى، ال ەكىنشى كومپونەنتىن 12-13 مىڭداي ادام الدى»، دەدى ن. تابىنباەۆ.

سوڭعى جاڭالىقتار

ەڭبەكتىڭ ەلەنگەنى جاقسى

پىكىر • بۇگىن، 20:33

«رولان گارروس» باستالدى

سپورت • بۇگىن، 20:26

ءالجاننىڭ كىسە بەلبەۋى

تاريح • بۇگىن، 20:23

ۇقساس جاڭالىقتار