ۇيىمداستىرۋشىلار بايقاۋ ناتيجەسىنىڭ قالاي بولاتىنىنا قاراماستان, ءىس-شاراعا قاتىسقان قولونەر شەبەرلەرىنىڭ ءبارى دەرلىك تۋىندىلارىن حالىقارالىق ساۋدا الاڭدارىنا شىعارۋعا جانە قولونەردى لايىقتى تابىس كوزىنە اينالدىرۋ مۇمكىندىگىنە يە بولاتىنىن ايتادى.
– BornNomad اقش-تىڭ قازاقستانداعى ەلشىلىگى مەن «اتامەكەن» ۇكپ-نىڭ بىرلەسكەن جوباسى. ۇلتتىق مۇرانى جاڭعىرتا وتىرىپ, اۋقىمدى تۇردە ناسيحاتتاۋدى كوزدەيتىن بۇل جوبا قازاقستاننىڭ ءداستۇرلى قولونەرى مەن حالىقتىق ونەرىنىڭ قازىرگى زامانعى ينتەرپرەتاتسياسىن ىنتالاندىرۋعا باعىتتالعان. جوباعا Chevron جانە Exxon Mobil كومپانيالارى دەمەۋشىلىك ەتىپ وتىر. جەڭىمپازداردى اقش پەن قازاقستاننىڭ ساراپشىلارى تاڭدايتىن بولادى, – دەدى قوستاناي وبلىستىق كاسىپكەرلەر پالاتاسىنىڭ ساراپشىسى ءسانيا يمەنتاەۆا.
كورمەگە قاتىسۋشىلاردىڭ ىشىندە بىلعارى, توقىما, كيىز, اعاش جانە مەتالمەن جۇمىس ىستەيتىن شەبەرلەر بار. ولاردىڭ ايتۋىنشا, الەمدىك بەدەلگە يە ايتۋلى كورمە ۇلتتىق قولونەر تۋىندىلارىن حالىقارالىق نارىققا شىعارۋعا مۇمكىندىك بەرەدى.
– ءبىزدىڭ وڭىردە قولونەر ءوندىرىسى جاقسى دامىپ كەلەدى. الايدا شەبەرلەردىڭ كوبى ۇيدە جۇمىس ىستەيتىندىكتەن, كوبىنە-كوپ ولاردىڭ ناسيحاتتالۋ جاعى كەمشىن ءتۇسىپ جاتىر. ال BornNomad جوباسىنا قاتىسقان ءاربىر ىسمەر, ءيا ۇستا, كەز كەلگەن قولونەر شەبەرى ءوزىنىڭ ءتول تۋىندىسىن ساتىپ قانا قويماي, كاسىبىنىڭ اۋقىمىن ءارى قاراي كەڭەيتىپ, دامىتۋعا ىنتالانادى, سونداي-اق باسەكەگە قابىلەتتى بولۋدى ۇيرەنەدى. بۇل ءبىز ءۇشىن وتە قاجەت دۇنيە. ماسەلەن, مەنى قازىردىڭ وزىندە فرانتسۋزعا نەمەسە يسپاندىققا, ءيا بولماسا جاپوندىققا ۇنايتىن قانداي دۇنيە ۇسىنۋعا بولادى دەگەن وي مازالاي باستادى. ياعني بۇل جوبا ءبىزدى Wildberries جانە Amazon-عا شىعارۋ ارقىلى حالىقارالىق نارىققا باعىتتايدى. ءاۋ باستا مەن بۇل بايقاۋعا ءبىر عانا يدەيامەن قاتىسقانمىن, بىراق وقۋ-ۇيرەنۋ بارىسىندا مۇلدە جاڭا باستامالار تۋىنداپ, تىڭ يدەيالار كەلە باستادى. الداعى كورمەدە ەكى ادام بولىپ «شىعارماشىلىق كوللابوراتسيا» نوميناتسياسى بويىنشا باق سىناپ كورمەكپىز. مەن – اۆتورمىن, ارىپتەسىم ورىنداۋشى بولادى, – دەدى قوستانايداعى Qoloner قوعامدىق قورىنىڭ باسشىسى ساۋلە قابيدۋلوۆا.
بايقاۋ جەڭىمپازدارىنىڭ ەسىمدەرى قىركۇيەك ايىندا وتەتىن اۋقىمدى قولونەر فەستيۆالىندە بەلگىلى بولادى.
قوستاناي وبلىسى
