بيىلعى قۇرعاقشىلىق, اسىرەسە, جىتىقارا, دەنيسوۆ, بەيىمبەت مايلين اۋداندارىنا اۋىر ءتيدى. بۇل وڭىرلەردەگى شابىندىق جەرلەردىڭ كوبىن ىستىق ءۇيتىپ جىبەرگەندىكتەن, جەرگىلىكتى شارۋاشىلىقتار مەن قاراپايىم جۇرتتىڭ ءبىرازى قىسقا قاجەتتى ءشوپتىڭ جارتىسىنا جۋىعىن عانا جيناي العان. ولارعا شابىندىعى مول وزگە اۋداندارداعى شارۋا قوجالىقتارى قولۇشىن سوزىپ, توننالاپ ءشوپ جىبەرىپ جاتىر. ماسەلەن, تاياۋدا عانا مەڭدىقارالىق شارۋالار جىتىقارا اۋدانىنا 120 توننا ءشوپ جونەلتتى. ۇزىنكولدىكتەر بەيىمبەت مايلين اۋدانىنا 50 توننا ءشوپ باسىپ بەرسە, ناۋىرزىمدىقتار الداعى 2-3 كۇن ىشىندە دەنيسوۆ اۋدانىنا 70 توننا ءشوپ جىبەرۋدى جوسپارلاپ وتىر.
ماسەلەن, شىلدەنىڭ 30-ى كۇنى مەڭدىقارا اۋدانىنداعى «قارقىن» اگروفيرماسى جىتىقارا ءوڭىرىنىڭ تۇرعىندارىنا 100 توننا ءشوپ جەتكىزىپ بەردى. اۋدان اكىمىنىڭ ورىنباسارى راديك ەسقاليەۆتىڭ ايتۋىنشا, بۇل ءشوپ زەينەتكەرلەر مەن تۇرمىسى تومەن وتباسىلارعا, باسقا دا مۇقتاج تۇرعىندارعا ۇلەستىرىلىپ جاتىر.
وبلىس كولەمىندە ۇيىمداستىرىلىپ جاتقان قايىرىمدىلىق شاراسىنان بيىل شوپتەن قىسىلماي قوڭدى وتىرعان شارۋاشىلىقتاردىڭ ەشقايسىسى قالىس قالىپ جاتقان جوق. ءبىراۋىز سوزگە كەلمەي, قولىنداعى بارىمەن بولىسۋدە. وتكەن اپتادا بەيىمبەت مايلين اۋدانىنىڭ تۇرعىندارىنا ۇزىنكول وڭىرىندەگى «ۆەستا» شارۋا قوجالىعىنان 10 توننا, «كازانكا» جانە «نادەجدا» سەرىكتەستىكتەرىنەن 30 توننا, «كرۋتويارسك» جشس-نەن 10 توننا رۋلوندالعان ءشوپ جەتتى. بيىل القاپتاعى استىعىنىڭ ءبىرازى كۇيىپ كەتكەن ناۋىرزىم وڭىرىندەگى شارۋالاردىڭ ءوزى ءشوپ قورىن تولىق قامداي الماي جاتقان كورشىلەس اۋدانداعى اعايىنعا كومەك قولىن سوزۋعا بەل بايلاپ وتىر.
اۋىل تۇرعىندارىن قولجەتىمدى باعادا جەمشوپپەن قامتاماسىز ەتۋ جۇمىستارى ارقالىق وڭىرىندە دە ويداعىداي جۇزەگە اسىرىلىپ جاتىر. جالپى, بۇل وڭىردە 370 شارۋاشىلىق بار. ونىڭ 122-ءسى مال شارۋاشىلىعىمەن اينالىسادى. بۇگىنگى تاڭدا كوكتاۋ, ەكىدىڭ, جالعىزتال, قايىڭدى, تسەليننىي, اڭعار, جاڭاقالا اۋىلدارىندا ءشوپ دايىنداۋ قىزۋ ءجۇرىپ جاتىر. ال رودينا, فۋرمانوۆ, ۆوستوچنىي, مولودەجنىي, ۇشتوبە, ارقالىق قالاسىن مال ازىعىمەن قامتۋ ماسەلەسىن كورشىلەس امانگەلدى اۋدانىنىڭ كاسىپكەرلەرى كوتەرىپ الىپ وتىر.
قيىن-قىستاۋ كەزەڭدە قىسقى ءشوپ باعاسىنىڭ شارىقتاپ كەتپەۋى ءۇشىن وبلىس باسشىلىعى جەرگىلىكتى بيۋدجەتتەن 1,8 ملرد تەڭگە ءبولىپ وتىر. بۇل قارجى فەرمەرلەرگە سۋبسيديا تۇرىندە بەرىلمەك.
جالپى, الداعى قىستان قىسىلماي شىعۋ ءۇشىن وبلىستا 1 ملن 84 مىڭ توننا ءشوپ قورى جينالۋى كەرەك. اۋداندىق اكىمدىكتەردىڭ مالىمەتىنشە, بۇگىنگە دەيىن 840 مىڭ توننادان اسا ءشوپ قورى جينالىپ الىنعان.
قوستاناي وبلىسى
