قورعانىس مينيسترلىگىنىڭ ءباسپاسوز قىزمەتى تاراتقان مالىمەتكە قاراعاندا, ستاتسيونار 150 ناۋقاسقا ارنالعان. بۇل رەتتە مەديتسينالىق مەكەمەدە سوماتيكالىق پاتولوگياسى بار اسكەري قىزمەتشىلەردى ەمدەۋ, سونداي-اق اسكەري-دارىگەرلىك جانە دارىگەرلىك-ۇشقىشتىق ساراپتاما جۇرگىزۋ ءۇشىن 100 ورىن ساقتالادى.
قالىپتاسقان جاعدايدا اسكەري دارىگەرلەر ازاماتتاردى گوسپيتالعا جاتقىزىپ, بىلىكتى مەديتسينالىق كومەك كورسەتۋ ءۇشىن قولدا بار رەسۋرستاردى جۇمىلدىردى.
– ءبىزدىڭ اسكەري گوسپيتال ەكىنشى ەشەلونعا جاتادى. سوندىقتان ينفەكتسيالىق ستاتسيونارعا ورتاشا اۋىر جانە اۋىر ناۋقاستار جاتقىزىلاتىن بولادى. جەكە قۇرام بۇعان دايىن. ءبىزدىڭ مەديتسينالىق پەرسونالدىڭ كوروناۆيرۋستىق ينفەكتسيامەن اۋىراتىن ناۋقاستاردى ەمدەۋ ىسىندە تاجىريبەسى بار. ول ءۇشىن بىزدە وكپەنى جاساندى جەلدەتۋ جانە گەمودياليز اپپاراتتارىمەن جابدىقتالعان جانساقتاۋ بولىمشەسى, سونداي-اق قاجەتتى ءدارى-دارمەك بار, – دەدى الماتى قالاسىنداعى اسكەري كلينيكالىق گوسپيتال باستىعىنىڭ مىندەتىن ۋاقىتشا اتقارۋشى مەديتسينا قىزمەتىنىڭ پودپولكوۆنيگى ابدۋۆالي پالتۋشەۆ.
اسكەري گوسپيتال دارىگەرلەرى وتكەن جىلعى ساۋىردەن باستاپ ازاماتتارعا كومەك كورسەتۋگە ەكى رەت تارتىلعان بولاتىن. ناتيجەسىندە, 1 430 ادام, سونىڭ ىشىندە شامامەن 30 پايىزداي اۋىر جانە اسقىنعان جاعدايداعى پاتسيەنت ەمدەلىپ شىققان.
بيىلعى شىلدەدەن باستاپ ەلورداداعى باس اسكەري كلينيكالىق گوسپيتال كوروناۆيرۋسپەن ناۋقاستانعانداردى ەمدەۋ ءۇشىن قايتا جۇمىلدىرىلعانىن اتاپ وتكەن ءجون. الماتى, تالدىقورعان جانە ءۇشارال قالالارىنداعى ءۇش اسكەري-ەمدەۋ مەكەمەسى دە ازاماتتاردى قابىلداۋعا دايىن. اياگوز, تالدىقورعان, سارىوزەك جانە سەمەي اسكەري گوسپيتالدارىندا قوسىمشا ءتورت ينفەكتسيالىق وقشاۋلاعىش قىزمەت كورسەتىپ تۇر. پتر-تەستىلەۋ ءۇشىن نۇر-سۇلتان مەن الماتىدا ەكى ستاتسيونارلىق زەرتحانا, سونداي-اق اقتاۋ مەن سەمەيدە ءموبيلدى زەرتحانالىق كەشەندەر ىسكە قوسىلعان.
