جولدى جاۋىپ تاستاعان اق تۇتەك بوراننىڭ استىندا تىزەدەن قار كەشىپ, كولىكتەردىڭ الدىندا الاسۇرا جۇگىرىپ جۇرگەن سارى جولاقتى كۇرتەلى پوليتسەيدى جۇرگىزۋشىلەردىڭ ءبىرى اۆتورەگيستراتورعا ءتۇسىرىپ العان سىڭايلى. بۇل بەينەجازبا سول كۇنى-اق الەۋمەتتىك جەلىگە تارالىپ كەتتى.
قارلى بوران كوتەرىلگەن 18 اقپان كۇنى قالانىڭ ىشىندە قالىپتى قىزمەتىن اتقارىپ جۇرگەن اعا لەيتەنانت كەزەكشى بولىمنەن يۋبيلەينىي شاعىن اۋدانىنىڭ ماڭايىنداعى جول-كولىك وقيعاسى بولعان جەرگە جەت دەگەن نۇسقاۋ الادى. جاڭا شاعىن اۋداننىڭ ماڭايىنداعى بوراننىڭ ەكپىنى قالا ىشىندەگىدەن ەكى ەسە كۇشتى. دۇلەي بوران تاڭەرتەڭ عانا سايراپ جاتقان جولدى جاۋىپ تاستاعان. مەجەلى شاعىن اۋدانعا جەتكەن امانتاي قالاعا كىرىپ جاتقان كولىكتەر لەگىنىڭ الدىندا بىرنەشە اۆتوكولىكتىڭ جول شەتىنە شىعىپ, قارعا باتىپ قالعانىن كورەدى. ولار كەيىنگىلەردىڭ جولىن بوگەپ, ۇزىننان-ۇزاق كولىك كەپتەلىسى پايدا بولىپتى. پوليتسيا اعا لەيتەنانتى سول جەردەگى جۇرگىزۋشىلەردىڭ كومەگىمەن جول شەتىنە شىعىپ قالعان كولىكتەردى قولمەن يتەرىپ شىعارىپ, جول قوزعالىسىن رەتكە كەلتىرمەك بولادى. بىراق كولىك ىشىندەگىلەر جولدان اداسىپ, شەتكە باتىپ قالا بەرگەن سوڭ, ءار كولىكتىڭ الدىنا ءتۇسىپ, جاياۋ جۇگىرىپ ءجۇرىپ جول كورسەتۋىنە تۋرا كەلدى.
– ويتكەنى جول قالىڭ قاردىڭ استىندا قالدى, ونىڭ ۇستىنە تاياق تاستام جەر كورىنبەيدى, قايدا قاراساڭ دا الاي-دۇلەي اق تۇتەك. مۇنداي قىسىلتاياڭ ساتتە كوپ ويلانىپ تۇرۋعا بولمايدى. ۇزىن-سونار كەزەكتە تۇرعانداي, ورنىنان جىلجىماي تۇرعان كەپتەلىستى قالايدا جونگە كەلتىرۋ كەرەك. ءبىرىنشى تۇرعان كولىكتىڭ الدىنا ءتۇسىپ, جۇرگىزۋشىگە قول بۇلعاي وتىرىپ جول كورسەتە باستادىم. سودان كولىك جىلدامدىعىن ۇدەتە باستاعان سوڭ, جۇگىرۋگە تۋرا كەلدى. ول كولىكتىڭ سوڭىنان وزگە كولىكتەر دە جىلجي باستادى. وسىلايشا, جولدىڭ قاۋىپتى تۇسىنان شىعىپ, مەن – جاياۋ, جۇرت كولىكپەن ءۇش شاقىرىمداي جول ءجۇرىپ, قالانىڭ ىشىنە كىردىك. كولىك تىزگىنىندە وتىرعان ادامدار ۇستىمدەگى سارى جولاقتى كۇرتەنى عانا كورىپ وتىرىپتى, – دەدى پوليتسيا ينسپەكتورى.
اقپاننىڭ اق بورانىمەن ارپالىسىپ ءجۇرىپ, الپىس شاقتى كولىكتى قار قۇرساۋىنان قۇتقارعان امانتاي وسىدان كەيىن كوپشىلىكتىڭ العىسىنا بولەنىپ, ىشكى ىستەر مينيسترلىگىنىڭ «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىن ومىراۋىنا تاقتى. ال وبلىستىق پوليتسيا دەپارتامەنتىنىڭ باسشىلىعى قىزمەتتىك بورىشىن مۇلتىكسىز اتقارعان پوليتسەيگە العىس جاريالاپ, اتاۋلى قولساعات تابىس ەتتى.
وسى ورايدا امانتايدىڭ تاعى ءبىر ەرلىگىن ايتپاي كەتپەسكە بولمايدى. ونىڭ وتكەن جىلدىڭ ءساۋىر ايىندا ارىپتەسى جانبولات جاۋتينمەن بىرگە پاترۋلدىك قىزمەتىن اتقارىپ ءجۇرىپ, ورتكە ورانعان ەكى قابات ءۇيدىڭ ىشىنەن 15 ادامدى امان-ەسەن الىپ شىققانىن كوپشىلىك ءالى ۇمىتا قويعان جوق. ءتۇن جارىمدا قىزىل جالىنعا ورانا باستاعان ءۇيدىڭ قورشاۋىنان سەكىرىپ تۇسكەن امانتاي ەسىكتى تەۋىپ سىندىرىپ, تارس ۇيقىدا جاتقان ادامداردى وياتىپ, ويانا الماعاندارىن دالاعا كوتەرىپ شىعارعان.
– امانتاي ءبىرىنشى بولىپ كىرىپ كەتتى دە, ەڭ الدىمەن 5 جاسار بالانى الىپ شىقتى. ودان كەيىن ورتەنىپ جاتقان ۇيگە مەن دە كىردىم. ءتىلسىز جاۋمەن ارپالىسىپ جۇرگەندە ۇستىمىزدەگى كيمىمىز جانىپ, ەكەۋمىزدىڭ دە قولىمىزدى وت قارىپ, كۇيىك شالدى. امانتاي يىعىنا دەيىن كۇيدىرىپ الدى. ەت قىزۋمەن جۇرگەندە ونى ەلەڭ قىلا قويمادىق, – دەيدى جانبولات جاۋتين.
كەيىن امانتاي مەن جانبولاتتى ىزدەپ تاۋىپ العان ءورت شالعان ءۇيدىڭ تۇرعىندارى ەكى پوليتسەيگە العىستارىن جاۋدىرىپ, وبلىستىق پوليتسيا دەپارتامەنتى باسشىلىعىنا ولاردى ارنايى ماراپاتقا ۇسىنۋ تۋرالى ءوتىنىش بىلدىرگەن. كوپ كەشىكپەي قوس لەيتەنانت ىشكى ىستەر ءمينيسترىنىڭ «ورتتە كورسەتكەن قايسارلىعى ءۇشىن» مەدالىمەن ماراپاتتالعان.
امانتاي بايجانوۆتى «قازاقستاننىڭ 100 جاڭا ەسىمى» جوباسىنا وسى جوبانىڭ وتكەن جىلعى جەڭىمپازى دينارا شۇكىجانوۆا ۇسىنىپتى.
– جوبانىڭ جەڭىمپازى بولدىڭ دەگەندى العاش ەستىگەندە ءوز قۇلاعىما ءوزىم سەنبەدىم. قاراپايىم پوليتسيا قىزمەتكەرلەرىنىڭ ىشىندە تۇڭعىش رەت وسىنداي قۇرمەتكە بولەنگەن مەن عانا شىعارمىن. 30 ساۋىردە نۇر-سۇلتان قالاسىندا جەڭىمپازداردى رەسمي ماراپاتتاۋ راسىمىنە قاتىستىم. ءبىزدى مەملەكەت باسشىسى قاسىم-جومارت توقاەۆ قۇتتىقتاپ, بارشامىزدىڭ ەل يگىلىگى ءۇشىن ادال ەڭبەك ەتىپ, بۇدان دا جوعارى تابىستارعا قول جەتكىزەتىنىمىزگە سەنىم ءبىلدىردى, – دەدى امانتاي بايجانوۆ.
ونىڭ ايتۋىنشا, پاترۋلدىك قىزمەت بارىسىندا وقىس وقيعالار كەزدەسىپ تۇرادى. وندايدا قاۋىپ-قاتەرگە باس تىگۋگە تۋرا كەلەدى. بىلتىر 10 ساۋىرگە قاراعان ءتۇنى امانتايدىڭ باسىنان ءدال وسىنداي تاعى ءبىر وقيعا وتكەن ەدى.
ءتۇن جامىلعان ءۇش قاراقشى وبلىس ورتالىعىنداعى امانگەلدى كوشەسىنەن «تەكستيلششيك» ساياجايىنا دەيىن «يندرايۆەر» تاكسيىنە تاپسىرىس بەرەدى. 38 جاستاعى جۇرگىزۋشى مىنگەن «لادا كالينا» اۆتوكولىگى كەلگەن سوڭ, كۇدىكتىلەردىڭ ەكەۋى – ارتقى ورىندىققا, بىرەۋى جۇرگىزۋشىنىڭ جانىنا جايعاسادى. تاكسي مەجەلى جەرگە كەلىپ توقتاعان سوڭ, ارتتا وتىرعانداردىڭ ءبىرى جۇرگىزۋشىنىڭ موينىنا ارقان سالىپ, اقشا تالاپ ەتىپ, قىلعىندىرا باستاعان. ءساتىن سالعاندا, جۇرگىزۋشى موينىن قيىپ بارا جاتقان قىل بۇراۋدان سىتىلىپ شىعىپ, پوليتسياعا حابارلاپ ۇلگەرەدى. ابدىراپ قالعان قاسكۇنەمدەر كولىكتەگى ەكى ۇيالى تەلەفون مەن رەگيستراتوردى الىپ, ءىز سۋىتادى.
بۇل تۋرالى حابار الىسىمەن «تەكستيلششيك» شاعىن اۋدانىنا جاقىن ماڭايدا قوعامدىق كۇزەت قىزمەتىندە جۇرگەن پوليتسيا اعا لەيتەنانتتارى امانتاي بايجانوۆ پەن جانىبەك مىرزاحمەتوۆ دەرەۋ وقيعا ورنىنا جەتەدى. الدىمەن جابىرلەنۋشىدەن كۇدىكتىلەردىڭ ءتۇر-تۇلعاسى, بەت-الپەتى تۋرالى مالىمەت الىپ, ونى بارلىق كۇزەت بەكەتىنە جىبەرگەن پوليتسيا ءپاترۋلى ءۇش قاراقشىنىڭ ىزىنە تۇسەدى. جاقىن ماڭايداعى قۋىس-قالتارىستىڭ ءبىرىن قالدىرماي ءسۇزىپ شىققان ءتارتىپ ساقشىلارىنىڭ كولىگى قورعان كوشەسىنە بۇرىلادى. انادايدا سۋىت ءجۇرىپ بارا جاتقان ەكى ادام پوليتسيا كولىگىن كورە سالا قاشا جونەلگەن. الايدا ەكەۋى دە الىسقا ۇزاي المادى, تاجىريبەلى ءتارتىپ ساقشىلارى قۋىپ جەتىپ, كوزدى اشىپ-جۇمعانشا ەكەۋىنىڭ دە قولىنا كىسەن سالىپ ۇلگەرەدى. كۇدىكتىلەر پوليتسيا بولىمىنە جەتكىزىلەدى. سالدەن سوڭ بولىمشەگە كەلگەن تاكسي جۇرگىزۋشىسى ەكى قاراقشىنى بىردەن تانىعان. ءىز سۋىتىپ ۇلگەرگەن ءۇشىنشى قاراقشى كەيىن ءوز پاتەرىندە ۇستالعان. كۇدىكتىلەردىڭ ۇشەۋى دە قوستاناي وبلىسىنىڭ بۇرىن سوتتالعان 20-24 جاس شاماسىنداعى تۇرعىندارى بولىپ شىقتى. قازىر قاراقشىلار تەمىر توردىڭ ارعى بەتىندە وتىر. ال پوليتسيا اعا لەيتەنانتى امانتاي بايجانوۆ قوعامدىق ءتارتىپ كۇزەتىندەگى قاربالاس قىزمەتىن جالعاستىرىپ ءجۇر.
– جۇبايىمنىڭ ەسىمى گۇلنار, ەكەۋمىز ارسلان ەسىمدى ۇل تاربيەلەپ وتىرمىز. قىزمەت بابىمەن ءجۇرىپ, ۇيدە كوپ بولا الماي قالامىن. گۇلنار مۇندايعا ابدەن ۇيرەنگەن. مەن وعان پوليتسەيدىڭ جارى بەساسپاپ بولۋ كەرەك دەپ ازىلدەيمىن. بىراق قىزمەتتەن بوساي قالسام, وتباسىممەن بىرگە تابيعات اياسىندا, توبىل جاعاسىندا تازا اۋادا سەرۋەندەپ, بوس ۋاقىتىمدى پايدالى وتكىزۋگە تىرىسامىن. بىراق مۇنداي ساتتەر وتە سيرەك. ويتكەنى جۇمىس قاۋىرت, – دەيدى ءتارتىپ ساقشىسى.
قوستاناي وبلىسى
