ايماقتار • 03 تامىز، 2021

قامقورلىق – كوڭىلگە دەمەۋ

37 رەت كورسەتىلدى

ەل شەتىنە جامان تۇماۋ تۋرالى حابار جەتكەلى ادامداردىڭ ءبىر-بىرىنە قالتقىسىز قامقورلىق كورسەتۋى ۇدەي ءتۇستى. جالعىزىلىكتى جاندار قىسىلعان شاقتا قول ۇشىن بەرەتىن جومارت جانداردىڭ بار ەكەنىن كورىپ، قيىندىقپەن جالعىز الىسپايتىندارىنا كامىل سەنىپ، كوڭىلدەرىن دەمەپ وتىر.

ءاپ ەتكەن بەتتە كوپبالالى وتباسىلار مەن جالعىزىلىكتى جانداردىڭ ابدىراپ قالعانى دا راس. ءدارى-دارمەك، قورعانىس قۇرالدارى جەتىسپەي جاتتى. توتەننەن كەلگەن دەرتكە دا­يىن ەمەس ەدى. الىپقاشتى، ارقيلى، وتىرىك-شىنى بەلگىسىز ءسوز دە كوبەيدى. داتكە قۋاتى دەر شاعىندا مەملەكەت تاراپىنان كومەك كورسەتىلدى. ەل ىشىندەگى قاۋقارى بار، جىگەرلى جاس­تار دا قول قۋسىرىپ قاراپ وتىرعان جوق. ەرىكتىلەر شوقتاي ەكشەلىپ، توپتاسىپ، ەل ىشىندە الەۋمەتتىك جاعىنان از قامتاماسىز ەتىلگەن ازاماتتاردىڭ جۇدەپ قالماۋىن نازاردا ۇستادى. وسى ارەكەتتەرىمەن-اق تۋعان ەلىنە تۇلعا بولاتىن شىن پاتريوت ەكەندەرىن كورسەتىپ بەردى.

اۋداندا بۇگىنگى تاڭدا 14 ەرىك­تىلەر ورتالىعى جۇمىس ىستەيدى. ولار جانى ىزگى، قولى اشىق، كومەككە دا­يىن ەلگەزەك 150 ادامنىڭ باسىن قۇراپ وتىر. ەل قامىن جەگەن وسى توپتاعى ادامدار قانداي قيىندىق تۋىنداسا دا توتەپ بەرىپ، وزدەرىن عانا ەمەس، وزگەنى دە سىناقتان الىپ شىعاتىندارىنا سەنىمدى. بۇ­لار­دىڭ قارەكەتى ەل ىشىندەگى بىر­لىك­تى بەكەمدەي ءتۇستى. ال بىرلىك بار جەردە بەرەكەنىڭ وزىنەن-ءوزى ۇيى­رىلەتىنى بەلگىلى. الەۋمەتتىك با­عىت­تا جۇمىس ىستەيتىن ەرىكتىلەر وتكەن قىستا اۋدانداعى جالعىزىلىكتى جان­داردىڭ ءتىزىمىن جاساپ، ولاردىڭ مۇڭ-مۇقتاجدارىنا ۇدايى نازار اۋدارىپ وتىردى. قىستا قار تازالاسا، كوكتەمدە قىزىل سۋدىڭ قاۋپىنەن قۇتقارۋ شارۋاسىنا بەلسەنە ارالاس­تى. اۋدانداعى 97 جالعىزىلىكتى زەينەتكەرگە، 13 كوپبالالى وتباسىعا، 12 جالعىسباستى اناعا كومەك كورسەتتى.

بيىل اۋدان ەرىكتىلەرى 123 شارا ۇيىمداستىردى. ولاردىڭ ىشىندە جاقسىلىق شاراپاتىمەن ەستىگەن جاننىڭ كوڭىلىن گۇلدەندىرەتىن ء«بىز بىرگەمىز»، «جاقىنىڭا جاناشىر بول»، «ارداگەرلەردى ارداقتايىق»، ء«بىز ۇيدەمىز» ءتارىزدى كومەكتى قاجەت ەتەتىن كوپتەگەن ادامدارعا الەۋ­مەتت­ىك كومەك كورسەتىلگەن اتاۋلى شارالاردى اتاپ ايتۋعا بولادى. پسيحولوگيالىق ترەنينگتەر، اۋرۋ­دىڭ الدىن الۋعا باعىتتالعان تۇسى­نىك شارالارى، دوڭگەلەك ۇستەل مەن ءۇمىت وتىن تۇتاندىراتىن جۇز­دەسۋلەر وتكىزىلدى.

ىندەت ورشىگەن تۇستا قاسقالداقتىڭ قانىنداي بولىپ تاپتىرماي كەتكەن بەتپەردەلەردى تەگىن تاراتتى. حا­لىققا دەرت شەڭگەلىنە تۇسپەۋ ءۇشىن كارانتين تالاپتارىن قالاي ساقتاۋ كەرەك تۋرالى تۇسىنىك جۇمىستارىن جۇرگىزدى. الەۋمەتتىك بەينەباياندار دايىنداپ، جالپاق جۇرتتى ساق­تان­دىرۋعا تىرىستى.

شاراپاتتى شارۋاعا اۋىل جاس­تارىنىڭ قوسقان ۇلەسى دە زور. ولار ء«بىز بىرگەمىز» رەسپۋبليكالىق اكتسياسىن جۇمىلا قولداپ، اۋىل-ايماقتاعى جاناشىرلىققا ءزارۋ ادام­داردى قامقورلىقتارىنا الدى. ءبىرىنشى كەزەكتە قاجەت تاۋارلاردى، كارانتيننەن قورعاناتىن قۇرالداردى جەتكىزىپ بەرىپ وتىردى. ناتيجەسىندە 167 وتباسىنا ناقتى كومەك كورسەتىلدى. جۇمىسپەن قامتۋ ورتالىعى ارقىلى حالىققا كومەكتەسۋگە ۇمتىلعان جۇزگە جۋىق جاستار اۋداننىڭ ءاربىر اۋىلدىق جەرلەرىندە مونيتورينگ جۇرگىزدى. اۋىل ادامدارىنىڭ ءبىر-ءبىرىنىڭ جايىن جاقسى بىلگەندىكتەن قام­قورلىقتان مۇقتاج ەشكىم دە كومەكسىز قالعان جوق. ەرىكتىلەر «جومارت جۇرەك» اتتى توپ قۇردى. ونداعى نەگىزگى ماقسات – جۇدەگەن جانداردى جۇرەك جىلۋىمەن جىلىتۋ. جوعارىدا اتالعان توپقا ەل تۇرعىندارى وزدەرى تۇتىنبايتىن، بىراق سۋ جاڭا زاتتارىن اكەلىپ تابىس ەتە باستادى. بالكىم بىرەۋلەرگە قاجەت بولىپ قالار. وسىلايشا، ازىق-ت ۇلىك، كيىم-كەشەك، ءتىپتى جيھازعا دەيىن جينالدى. شىن مانىندە بۇل يەلەرىنە قا­جەتسىز زاتتار ەمەس، اق كوڭىل ادام­دار­­دىڭ وزگەگە كومەك كورسەتسەم دەگەن شىنايى اق تىلەگى ىسپەتتى ەدى. ال ءبىر ورتالىقتا جينالعان زاتتار كوپبالالى، الەۋمەتتىك جاعىنان از قامتاماسىز ەتىلگەن وتباسىلارىنا تەڭدەي ەتىپ ءبولىنىپ بەرىلدى. شا­پاعات نۇرىنا بولەنگەن شارۋا ءالى دە جالعاسۋدا.

بۇگىندە اۋدان جاستارى «ەرىكتى ەلدىڭ ىشىندە» ايدارىمەن الەۋمەتتىك جەلىلەر ارقىلى جومارت جانداردىڭ جاقسى ءىسىن وڭ قىرىنان ناسيحاتتاۋدا. قامقورلىق جايلى قۇلاقتانعان اۋداننىڭ وزگە دە جاستارى ساۋاپتى ىسكە ۇلەس قوسۋعا ۇمتىلۋدا. ادامدار عانا ەمەس، تابيعات تا تاڭنىڭ ءمولدىر شىعىنداي تازا نيەتتى جاستاردىڭ جان ساۋلەسى ارقىلى ايرىقشا ادەمى اجارعا يە بولىپ، نۇرلانا تۇسۋدە. «تازا الەم» اكتسياسى اياسىندا اۋدان­نىڭ بارلىق ەلدى مەكەندەرى اباتتاندىرىلىپ، كۇل-قوقىستان تازارتىلدى، اعاش كوشەتتەرى ەگىلدى. قورشاعان ورتاعا قيانات جاساماۋ تۋرالى بەينەبايانداردىڭ ناتي­جە­سىن­دە اسەرلى اڭگىمەلەر ايتىلدى.

جاقسىنىڭ جاناشىرلارى ەل بىرلىگى ءۇشىن، حالىقتىڭ قامى ءۇشىن ءالى دە ايانباي ەڭبەك ەتۋدە. ەرىكتىلەردىڭ ەرلىككە پارا-پار شارۋاسى وسى كۇنى ەل اۋزىندا ىلتيپاتپەن اتالادى.

 

اقمولا وبلىسى،

جاقسى اۋدانى

 

سوڭعى جاڭالىقتار

بەلگرادتا بەلدەسەدى

سپورت • بۇگىن، 09:06

جاپونيادا سىنعا تۇسەدى

سپورت • بۇگىن، 09:03

ەڭ باستىسى – ازاماتتاردىڭ سەنىمى

قازاقستان • بۇگىن، 08:43

Smart Zholy جەڭىمپازدارى انىقتالدى

قازاقستان • بۇگىن، 08:36

قۇندى قاعازعا قىزىعاتىندار كوپ

ەكونوميكا • بۇگىن، 08:32

اسىل اعانىڭ شاراپاتى

رۋحانيات • بۇگىن، 00:08

قۇيماقۇلاق

رۋحانيات • كەشە

گاز باعاسى نەگە قىمبات؟

ايماقتار • كەشە

ۇقساس جاڭالىقتار