جاقىندا سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى تالدىقورعان قالاسىندا كوروناۆيرۋس پاندەمياسىمەن كۇرەس جونىندەگى مونيتورينگتىك توپتىڭ پارا الۋمەن اينالىسقان مۇشەلەرىن ۇستاعاندىعى جايلى حاباردى ەستىگەنىمدە باياعى «اق مولدا» ەرىكسىز ەسىمە ءتۇستى. ويتكەنى بۇل شەنەۋنىكتەر دە قازىرگى مىلتىقسىز مايدان – كۇن سايىن تالاي ادامنىڭ ءومىرىن جالماپ جاتقان تاجال ىندەت كەزىندە جۇرتقا ساق بولۋ جونىندە اقىل ايتىپ جۇرگەنىمەن, شىن پيعىلدارى ەل باسىنا تۇسكەن قاسىرەتتەن پايدا تاۋىپ قالۋ بولعانى عوي. انتيكور جاريالاعان مالىمەتكە قاراعاندا, تالدىقورعان قالاسى كاسىپكەرلىك ءبولىمىنىڭ باسشىسى مەن ونىڭ قاراماعىنداعى باس مامان سىبايلاسىپ, كوپ ادامنىڭ قاتىسۋىمەن وتەتىن توي-دۋمانعا, اس بەرۋگە تىيىم سالىنعانىنا قاراماستان, مەيرامحانالاردىڭ يەلەرىنەن جانە رۇقسات ەتىلمەگەن ورىنداردا ساۋدا جاساۋشىلاردان جۇيەلى تۇردە 20 مىڭنان 270 مىڭ تەڭگەگە دەيىن پارا الىپ, جول بەرىلىپ جاتقان زاڭ بۇزۋشىلىقتاردى كورسە دە كورمەگەنسىپ جۇرگەن.
بىلتىر ىندەت ۇدەپ, بۇكىل قالانىڭ شەتىندەگى جولدارعا باقىلاۋ-وتكىزۋ پۋنكتتەرى ورناتىلىپ, كىرۋگە دە, شىعۋعا دا قاتاڭ شەكتەۋ قويىلعاندا الىستاعى اۋىلدا تۇراتىن ءبىر قاراپايىم ايەلدىڭ 650 شاقىرىمداي جەردەگى قاراعاندى قالاسىندا بولعان تويعا بارىپ كەلگەنىن ەستىگەنىمدە سەنەر-سەنبەسىمدى بىلمەپ ەدىم. كەيىن ونىڭ جولداعى بوگىسەندەردەن قالاي وتكەنىن سۇراستىرىپ بىلگەنىمدە جاعامدى ۇستادىم. سويتسەم, باقىلاۋ-وتكىزۋ پۋنكتتەرىندە كەزەكشىلىك اتقارىپ, تەكسەرىس جۇرگىزەتىن كەيبىر شەنەۋنىكتەر كارانتين جاعدايىندا تويشىلاپ جۇرگەن اعايىندارعا باسىندا قاباقتارىن تۇكسيتىپ, ۇرسا جونەلگەندەرىمەن, «كوپتى كورگەن» پىسىقايلار: «كوكە, شاقىرعان تۋىستان ۇيالعاننان سوڭ شىقتىق جولعا. جاعدايىمىزدى ءتۇسىنىڭىزشى. مۇمكىن, «كەلىسەرمىز»...», دەگەندە ك ۇلىمسىرەپ سالا بەرەتىن كورىنەدى. ال ارالارىنان ونداي «كەلىسىمپاز» اعايىن تابىلماي, كەرى بۇرىلعاندار بولسا, اياقاستىنان پايدا بولاتىن ءبىر «دەلدال» سوڭدارىنان قۋىپ جەتىپ, «قاتال» شەنەۋنىكتەرمەن «كەلىسۋگە» بولاتىنىن, ونىڭ اسا قىمباتقا تۇسپەيتىنىن ايتىپ, تويشىلاردىڭ باقىلاۋ-وتكىزۋ پۋنكتتەرىنەن كەدەرگىسىز وتۋىنە «كومەكتەسىپ» جاتادى ەكەن. وتكەن جىلى بىرنەشە شەنەۋنىك وسىنداي «اقىلى قىزمەتى» ءۇشىن ۇستالىپ, ابىرويلارى ايرانداي توگىلگەن. ماسەلەن, انتيكور قىزمەتى بىلتىر ءساۋىر ايىندا الماتى قالاسى جەتىسۋ اۋدانى اكىمى اپپاراتىنىڭ ەكى باس مامانى توتەنشە جاعداي كەزىندە باقىلاۋ-وتكىزۋ پۋنكتىندە كەزەكشىلىك جاساۋ بارىسىندا ازاماتتاردى وڭتۇستىك استاناعا كەدەرگىسىز وتكىزگەنى ءۇشىن بىرنەشە مارتە پارا الدى دەگەن كۇدىكپەن ۇستاپ, سوت سانكتسياسىمەن قاماۋعا العان بولاتىن. سونداي-اق الماتى قالاسى پوليتسيا دەپارتامەنتىنىڭ پاترۋلدىك پوليتسياسىنىڭ ينسپەكتورى «فيلتر» باقىلاۋ-وتكىزۋ پۋنكتىندە جۇرگىزۋشىلەردىڭ قالاعا ەش كەدەرگىسىز كىرىپ-شىعۋى ءۇشىن پارا العاندىعى ءۇشىن تاعى ءبىر قىلمىستىق ءىس قوزعالعان. بۇعان قوسا, انتيكور قىزمەتىنە كارانتين جاعدايىندا باقىلاۋ-وتكىزۋ پۋنكتتەرىندەگى پوليتسەيلەردىڭ پاراقورلىعى, ولاردىڭ كوڭىل كوتەرۋ ورىندارىنىڭ قىزمەتىن قورعاشتاۋشىلىعى تۋرالى سيگنالدار تۇسكەن.
تۇيىندەي ايتقاندا, ەل وڭىرلەرىندەگى ىندەتكە قارسى قۇرىلعان مونيتورينگ توپتارىنىڭ جۇمىسى كۇتكەندەگىدەي ناتيجە بەرمەي, ءتىپتى «قىزىل ايماقتاردا» دا كوپ كىسى شاقىرىپ, توي-تومالاق وتكىزۋ, اس بەرۋ تىيىلماي تۇرعاندىعىنىڭ ءبىر سەبەبى – پاراقورلىق دەسەك, جاڭىلىسپايمىز. ولاردىڭ جۇمىسىندا اشىقتىق جەتىسپەيتىندىگى دە سودان بولار. سوندىقتان دا مونيتورينگتىك توپتاردىڭ كوبىنە كوز بوياۋ ءۇشىن جۇرگىزەتىن رەيدتەرىنە باق وكىلدەرى مەن بلوگەرلەردى قوسپايىنشا, جاعداي تۇزەلە قويماس. ال جەرگىلىكتى مەملەكەتتىك ورگانداردىڭ ءسوزى مەن ءىسى قابىسپاي, «قولدارىندا باردا قونىشتارىنان باسىپ», قۇلقىنىنىڭ ق ۇلى بولىپ جۇرگەن كەيبىر قىزمەتكەرلەرىنىڭ ەل باسىنداعى قيلى كەزەڭدەگى وپاسىز تىرلىگىنە قاراپ, ەسكى ناقىلدى ءسال وزگەرتىپ: «اڭقاۋ ەلگە – ارامزا شەنەۋنىك» دەسەك, ارتىق ايتپاسپىز.
...كەشە «قىزىل ايماقتا» ورنالاسقان پەتروپاۆل قالاسىنان تاعى ءبىر سۋىق حابار كەلدى: جەرگىلىكتى مەيرامحانالاردىڭ بىرىندە بەرىلگەن استا كوروناۆيرۋس جۇقتىرعان ءبىر ايەل اياقاستىنان قازا بولىپ, جۇبايى اۋرۋحانانىڭ جانساقتاۋ بولىمىنە ءتۇسىپتى...
