ايماقتار • 02 تامىز، 2021

قىزىلوردادا ادام ساۋداسىمەن اينالىسقان 32 سايت بۇعاتتالدى

52 رەت كورسەتىلدى

قىزىلوردادا جىل باسىنان بەرى ادام ساۋداسىنا جول اشاتىن جارنامالىق حابارلاندىرۋلار مەن اقپاراتتىق ماتەريالدار جاريالاعان 32 سايت بۇعاتتالدى. بۇل تۋرالى بۇگىن وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا وپد كريمينالدىق پوليتسيا باسقارماسىنىڭ ءبولىم باستىعى عاني مۇقانوۆ مالىمدەدى، دەپ جازادى Egemen.kz «سىر بويى» باسىلىمىنا سىلتەمە جاساپ.

بيىل ايماقتا ادامداردى زاڭسىز بوستاندىعىنان ايىرۋ، قۇلدىققا سالۋ سىندى زاڭسىزدىقتار مەن ازاماتتاردىڭ قۇقىقتارىنىڭ شەكتەلۋ دەرەكتەرى تىركەلمەگەن. بۇل باعىتتاعى زاڭسىزدىقتاردى انىقتاۋ ءۇشىن وبلىس كولەمىندە تىركەلگەن 3 106 شارۋا قوجالىقتىڭ 2 660-نا تەكسەرۋ جۇمىستارى جۇرگىزىلدى.

«جىل باسىنان ادام ساۋداسىنا قاتىستى 2 حابارلاما ءتۇستى. سونىڭ ءبىرى، «ەۆرازيا» تەلەارناسى ارقىلى جاڭالىقتان «بالالار 500 مىڭ تەڭگەدەن ساتىلىپ جاتىر» دەگەن سۇحبات بويىنشا تەكسەرۋ جۇمىستارى جۇرگىزىلدى. اتالعان اقپارات جالعان بولىپ شىقتى. 30 ناۋرىزدا مەملەكەتتىك ەمەس ۇيىمنان قىزىلوردا قالاسىنداعى قۇرىلىس نىساندارىنىڭ بىرىندە جۇمىس ىستەپ جۇرگەن وزبەكستان رەسپۋبليكاسىنىڭ ازاماتتارىن ءماجبۇرلى ەڭبەككە تارتىلعانى تۋرالى حابارلاندى.

بۇگىندە قىلمىستىق ءىس تىركەلىپ، تەرگەپ تەكسەرۋ امالدارى جۇرگىزىلۋدە. قۇرىلىس نىسانىنان انىقتالعان 14 وزبەك ازاماتى قىزىلوردا وبلىسىنىڭ الەۋمەتتىك–پسيحولوگيالىق، قۇقىقتىق قولداۋ ورتالىعى ۇكىمەتتىك ەمەس مەكەمەسىنە ورنالاستىرىلدى»،  دەدى وپد كريمينالدىق پوليتسيا باسقارماسىنىڭ ءبولىم باستىعى عاني مۇقانوۆ.

ال ايماقتا ادام ساۋداسىنا قاتىستى قىلمىستىق ىستەردىڭ ەڭ كوبى جەڭگەتايلىقپەن اينالىسقاندار اراسىندا. وسى جاعدايعا بايلانىستى بيىل 10 دەرەك تىركەلىپ، 2 تۇلعا جانە جەڭىل جۇرىسپەن پايدا تاۋىپ جۇرگەن 14 ازاماتشا ەسەپكە الىندى. سونداي-اق بالا ساتۋمەن اينالىسقان 1 دەرەك، جەزوكشەلىكپەن اينالىسۋعا تارتۋ بويىنشا 2 دەرەك انىقتالعان.

سوڭعى جاڭالىقتار

ۇقساس جاڭالىقتار