وقيعا • 02 تامىز، 2021

جالعان ۆاكتسينا پاسپورتىن ساتقان مەديتسينا قىزمەتكەرلەرى ۇستالدى

39 رەت كورسەتىلدى

پوليتسيا شىعىس قازاقستان وبلىسىندا 30-دان استام ادامعا جالعان ۆاكتسينا پاسپورتىن ساتقان مەديتسينا قىزمەتكەرلەرىن ۇستادى، دەپ حابارلايدى Egemen.kz.

بۇل تۋرالى ىشكى ىستەر مينيسترلىگىنىڭ ءباسپاسوز وكىلى شۇعىلا تۇرلىبەك ۆەدومستۆونىڭ اقپارات الاڭىندا وتكەن ونلاين بريفينگىدە ايتتى.

«شىعىس قازاقستان وبلىسىنىڭ پوليتسەيلەرى ۆاتسينالاۋ پاسپورتىن قولدان جاساپ، ساتۋ ارەكەتىنىڭ جولىن كەستى. سەمەي قالاسىندا جەدەل ىزدەستىرۋ شاراسىن جۇرگىزۋ كەزىندە ەكى مەديتسينالىق قىزمەتكەردىڭ جالعان قۇجات ساتىپ، اقشا تاپپاق بولعانى انىقتالدى. ول ءۇشىن قالاداعى مەديتسينالىق-الەۋمەتتىك مەكەمەلەردىڭ بىرىندە جۇمىس ىستەيتىن ءبىر قىزمەتكەر ءوزىنىڭ ەسەپشوتىنا جەكەلەگەن ازاماتتاردان 15 مىڭ تەڭگە كولەمىندە اقشا قابىلداپ وتىرعان. ول اقشانىڭ 10 مىڭ تەڭگەسى مەن قۇجاتقا تاپسىرىس بەرگەن ازاماتتىڭ جەكە كۋالىگىنىڭ كوشىرمەسىن جەدەل مەديتسيتسنالىق جاردەم ورتالىعىنداعى تانىستارىنا بەرگەن. ولار الگى ازاماتتاردىڭ جەكە مالىمەتتەرىن ۆاكتسينا العان ادام رەتىندە دەرەكتەر بازاسىنا ەنگىزگەن»، دەدى ءىىم وكىلى.

قازىر اتالعان وقيعا بويىنشا قىلمىستىق ءىس قوزعالىپ، جالعان پاسپورت جاساتقانداردىڭ ناقتى سانىن انىقتاۋ جۇمىستارى ءجۇرىپ جاتىر.

«قىلمىستىق ءىس اياسىندا زاڭنان اتتاعان ازاماتتار انىقتالىپ، تەرگەلىپ جاتىر. ۇستالعان مامانداردىڭ ايتۋىنشا، ولار 30-دان استام قالا تۇرعىنىنا جالعان ۆاكتسينا قۇجاتىن ساتقان. بىراق تەرگەۋشى مامانداردىڭ پىكىرىنشە، بۇل سان الدەقايدا كوپ بولۋى مۇمكىن. تەرگەۋ قورىتىندىسى بويىنشا زاڭسىز جولمەن بازاعا ەنگىزىلگەن جالعان مالىمەتتەردىڭ ءبارى جويىلادى. شقو پوليتسيا دەپارتامەنتىنىڭ باسشىسى ساعات ماديەۆ ايتقانداي، مەديتسينالىق قىزمەتكەرلەردىڭ بۇل ارەكەتى قىلمىستىق كودەكستىڭ 385-بابى بويىنشا قارالىپ جاتىر. بۇل باپ 4 جىلعا دەيىن باس بوستاندىعىنان ايىرۋ جازاسىن كوزدەيدى»، دەدى شۇعىلا تۇرلىبەك.

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

ەكونوميكا • 24 قىركۇيەك، 2021

ۇقساس جاڭالىقتار