«بيىل ءبىز 1-12 اقپان ارالىعىندا يننوۆاتسيالىق گرانتتار بەرۋ بويىنشا پيلوتتىق بايقاۋ وتكىزگەن بولاتىنبىز. بارلىعى 661 ءوتىنىم ءتۇسىپ, ءجىتى سۇرىپتاۋ مەن قازىلاردىڭ تاڭداۋىنان كەيىن سوڭعى كەزەڭگە تەك بەس ۇمىتكەر عانا ءوتتى: «ForumVR», InTech-Forecast «جقك نىساندارى ءۇشىن IT-باعدارلاما جاساۋ», «COWMAS – ىقم تۋرالى مالىمەتتەردى باقىلاۋ جانە ساراپتاۋ», «سمارت تەرمينال» جوباسى, «Faceplate». ولارعا تەحنولوگيالاردى كوممەرتسيالاندىرۋعا ارنالعان يننوۆاتسيالىق گرانتتار بەرۋ تۋرالى شارتتار جاسالدى», دەپ جازدى مينيستر.
پيلوتتىق كونكۋرستىڭ ناتيجەسى بويىنشا ساراپشىلار مەن گرانتقا يە بولعان ادامداردىڭ وي-پىكىرلەرىن ەسكەرە وتىرىپ, بايقاۋ شارتتارىنا بىرقاتار وزگەرىستەر ەنگىزىلدى. ەندى بايقاۋعا قاتىسام دەۋشىلەردە اكسەلەراتسيالىق باعدارلامالاردان ءساتتى وتكەندىگىن دالەلدەيتىن سەرتيفيكات بولۋى ءتيىس. ونىڭ ۇستىنە ەكىنشى جانە ءۇشىنشى كەزەڭدەگى ىرىكتەۋگە قاتىسۋ ءۇشىن الدىمەن ءبىرىنشى ساتىدان ءوتۋ شارت.
قارجىلاندىرۋ شارتتارى دا ءبىرشاما وزگەردى. ءبىرىنشى ساتىنى ىسكە اسىرۋعا ارنالعان يننوۆاتسيالىق گرانت سوماسى 20 ميلليون تەڭگەدەن, ال ەكىنشى جانە ءۇشىنشى ساتىلار ءۇشىن 80 ميلليون تەڭگەدەن اسپايتىن بولدى.
«كەشە يننوۆاتسيالىق گرانتتار بەرۋ بويىنشا ەكىنشى كونكۋرس جاريالاندى. وتىنىمدەر 2021 جىلعى 10-23 تامىز ارالىعىندا https://qazinn.kz/ پورتالى ارقىلى قابىلدانادى. بارلىق سۇراقتار بويىنشا تىكەلەي يلياس وسپانوۆقا نەمەسە Community QazInnovations كەڭەس بەرۋ Telegram-ارناسىنا جازا الاسىزدار. بارلىق جاسامپاز جانداردى وسى كونكۋرسقا قاتىسۋعا شاقىرامىن, بۇل – ستارتاپتارىڭىزدى جۇزەگە اسىرىپ, دامىتۋ ءۇشىن وتە جاقسى مۇمكىندىك. ىسكە ءسات!», دەلىنگەن جازبادا.
