ايماقتار • 30 شىلدە، 2021

قۇرىلىسقا قۇرعاق ۋادە جۇرمەيدى

29 رەت كورسەتىلدى

قازىرگى كەزدە جامبىل وڭىرىندە قۇرىلىس قارقىن الدى دەسەك تە، اتالعان سالاعا قاتىستى بىرنەشە ولقىلىق انىقتالىپ وتىر. ايماقتاعى اۋداندار مەن اۋىلداردا سالىنىپ جاتقان ءتۇرلى نىساندارداعى جوندەۋ مەن قۇرىلىس جۇمىستارىنىڭ ورىندالۋ بارىسى كوڭىل كونشىتپەيدى.

باسى جاقسى باستالعان قۇرى­لىستىڭ ورتا تۇسىنا كەلگەندە مەرزىمىنەن كەشىگۋى، سول ماقساتقا بولىنگەن قارجىنىڭ يگەرىلمەۋى ءارى جوبالىق-سمەتالىق قۇجاتتاردى ازىرلەۋدەگى ولقىلىقتاردىڭ ورىن الۋى سياقتى كەلەڭسىزدىكتەر دە كەدەرگى كەلتىرۋدە. مۇنىڭ بار­لىعى دا جۇمىستى دەر كە­زىندە جۇرگىزە الماعان مەر­دىگەر كومپانيالاردىڭ سال­عىرت­­­­تىعىنان بولىپ وتىر. وسى ماسەلەگە وراي، جامبىل وب­لى­سىنىڭ اكىمى بەردىبەك ساپار­باەۆ تالاي ۋاقىتتان بەرى ءتيىستى باس­شىلاردى سىنعا الىپ كەلە جاتقانىمەن، ودان شىعىپ جاتقان ناتيجە دە شامالى بولىپ تۇر.

جالپى، جامبىلدا قۇرىلىس سالاسىنا جاقسى كوڭىل بولىنۋدە. زاماناۋي تالاپقا ساي نىساندار سالۋ جونىنەن دە وڭىردە جاقسى باستامالار كوتەرىلىپ، ىسكە اسۋدا. بىراق سوڭى سىنعا اپارىپ سوعاتىن قۇرىلىس نىساندارى بۇگىندە كوپ. وبلىستىق قۇرىلىس باسقارماسىنىڭ باسشىسى ەرلان ورىنباەۆتىڭ ايتۋىنشا، وڭىردەگى 207 جوباعا 67،6 ملرد تەڭگە بولىنگەن. بۇل رەتتە بيىل 150 نىساندى پايدالانۋعا بەرۋ جوسپارلانۋدا ەكەن. اتالعان نىسانداردىڭ قاتارىندا 76 كوپ قاباتتى تۇرعىن ءۇي، 24 مەكتەپ پەن كوللەدج، 10 دەنساۋلىق ساقتاۋ، 11 سپورت جانە 6 مادەنيەت نىسانى بار. بۇل – بىرقاتار سالانى قامتىعان قارقىندى قۇرىلىس. سول سياقتى «نۇرلى جەر» مەملەكەتتىك باعدارلاماسى بويىنشا 131 نىسان، «جۇمىسپەن قامتۋدىڭ جول كارتاسى» بويىنشا 23 نىسان، «اۋىل – ەل بەسىگى» بويىنشا 17 نىسان جانە باسقا دا دامۋ باعدارلامالارى بويىن­شا 35 نىساننىڭ قۇرىلىسى جۇرگىزىلۋدە.

سونىمەن قاتار قۇرىلىس باس­قارماسى تاپسىرىس بەرۋشى رەتىندە قۇنى 66،7 ملرد تەڭگە بولاتىن 43 جوبانىڭ قۇرىلىسىن جۇزەگە اسىرۋدا. بۇل ماقساتتا بيىل 29،1 ملرد تەڭگەنى يگەرۋ كوزدەلگەن. وسى جىلى جالپى قۇنى 22 ملرد تەڭگەنى قۇرايتىن 26 ءبىلىم بەرۋ نىسانى سالىنۋدا. ناقتى ايتقاندا، ونىڭ ىشىندە 19 مەكتەپ قۇرىلىسى، 5 قوسىمشا قۇرىلىس، كوللەدج عي­ماراتى جانە مەكتەپتى اباتتاندىرۋ بويىنشا ءبىر جوبا بار ەكەن. اعىمداعى جىلى اي­ماق­تا 14 نىساندى تاپسىرۋ جوس­پار­لانعان بولسا، وسى كۇنگە دەيىن ءبىر نىسان پايدالانۋعا بەرىلىپتى. اتاپ ايتساق، تاراز قالاسىنداعى «مەيىرىم» مەكتەپ-ينتەرناتىنىڭ جاپسارلاس قۇرى­لىسى اياقتالعان.

«ال وبلىس ورتالىعىنداعى №2 مەكتەپتىڭ قۇرىلىسى باياۋ ورىندالۋدا. سونداي-اق شۋ اۋدانى شۋ قالاسىنداعى ايشا ءبيبى جانە ى.التىنسارين، قور­داي اۋدانىنداعى «ارال» ورتا مەكتەپتەرىنىڭ سمەتالىق قۇ­نى قايتا ەسەپتەلۋدە. جوبالاۋ­شى­لاردىڭ قاتەلىگى سالدارىنان باي­زاق اۋدانى، شاحان جانە سەڭكىباي اۋىلدارىنداعى مەكتەپ قۇرىلىسىنا قاتىستى بىرقاتار قيىندىق تا تۋىنداۋدا. 2019 جىلى باستالعان بايزاق اۋدانى سارىكەمەر اۋىلىنداعى №3 كوللەدج عيماراتىنا جاپسارلاس نىساننىڭ قۇرىلىسى 90 پايىزعا اياقتالعان. جوبالىق-سمەتالىق قۇجاتتاماعا تۇزەتۋ­لەر ەنگىزىلىپ، ساراپتاما قورى­تىن­دىسى الىندى»، دەيدى ە.ورىن­باەۆ.

ابدەن قۇرىلىس جۇ­مىس­تارى باستالىپ كەتكەن سوڭ عانا جوبالىق-سمەتالىق قۇجات­تا­مالارعا وزگەرىستەردىڭ ەنگىزىلىپ جاتۋى قۇپتارلىق ەمەس. بۇل – قۇ­رىلىس قارقىنىنا ءارى ساپاسىنا كەدەرگى كەلتىرەتىن كەلەڭسىزدىكتىڭ ءبىرى. ءتيىستى مەردىگەرلەر كەزىندە ۋا­دەنى ءۇيىپ-توگىپ بەرگەنىمەن، بۇ­گىندە بەلگىلەنگەن مەجە ۇدەسىنەن شىعا الماي وتىر ەكەن. ەندى قۇ­رىلىس سالاسىنا قۇرعاق ۋادەنىڭ جۇرمەيتىنىن ۋاقىت كورسەتۋدە. ماسەلەن، ەكى ايدان بەرى وڭىردەگى №22 مەكتەپتىڭ قۇرىلىسى توقتاپ تۇر. ال قورداي اۋدانىنداعى كۇنباتىس-2 ماسسيۆىندە مەكتەپ­تىڭ قۇرىلىسى كەستەدەن قالىپ قوي­عان. سول سەكىلدى تاراز قالا­سىنىڭ «شالعاي قاراسۋ» ماس­سيۆىندەگى 600 ورىندىق مەكتەپ­كە ءالى كۇنگە دەيىن ەلەكتر جارىعى تارتىلماعان. ال جاڭا وقۋ جى­لىنىڭ باستالۋىنا ءبىر اي عانا ۋاقىت قالدى. ۋاقىتتىڭ تىعىز­دىعى ارتىپ، مەرزىمنىڭ تايانعانى ۇدەي تۇسكەن ۋاقىتتا اسىعىس جۇر­گىزىلگەن قۇرىلىستىڭ ساپاسى بولمايتىنى تاعى انىق.

جالپى، جامبىل وبلىسىندا جىل باسىنان بەرى قۇرىلىس نورمالارى مەن ساپا تالاپتارىن بۇزعانى ءۇشىن 10 مەردىگەر اكىمشىلىك جاۋاپكەرشىلىككە تارتىلىپ، ولارعا جالپى كولەمى 3،8 ملن تەڭگە ايىپپۇل سالىنىپتى. ال ايىپپۇل سالىنىپ، اكىمشىلىك جاۋاپكەرشىلىككە تارتىل­عانىمەن دە، توقتاپ تۇر­عان قۇرىلىستىڭ جىل­جىپ، كەشىككەن قۇرىلىستىڭ ۋاقى­تىمەن قايتا ءجۇرىپ كەتكەنى شا­مالى. وزگەسىن ايتپاعاندا، وڭىر­دەگى بىرقاتار ءبىلىم بەرۋ وشاق­­تارى قۇرىلىسىنىڭ ءوزى قا­شان اياقتالاتىنى بەلگىسىز بولىپ تۇر.

 

جامبىل وبلىسى

 

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:16

ۇقساس جاڭالىقتار