ەرتەڭىن ويلاعان ەكپە الادى

جۇمابەك بەكەنوۆ شىلدەنىڭ 29-ى كۇنى ورال قالاسىنداعى «قازارماپروم» جانە «زەنيت» زاۋىتتارىندا بولىپ، ەڭبەك ۇجىمىمەن كەزدەستى. استانالىق مامان الەمدى ابىگەرگە سالعان كوروناۆيرۋستىڭ ودان ءارى تارالۋىن توقتاتۋ ءۇشىن ۆاكتسينالاۋدىڭ ماڭىزى زور ەكەنىن ءتۇسىندىرىپ، جۇمىسشىلاردىڭ ساۋالدارىنا جاۋاپ بەردى.

باتىس قازاقستان وبلىسى پاندەميادان قاتتى زارداپ شەككەن ايماقتىڭ ءبىرى. بىلتىردان بەرى وسى دەرتپەن 30642 ادام اۋىرعان، 518 ادام ومىردەن وتكەن. سوندىقتان ۆيرۋستىڭ الدىن الاتىن ەكپە پايدا بولعاندا، باتىسقازاقستاندىقتاردىڭ باسىم كوپشىلىگى ۆاكتسينا الۋعا نيەت ءبىلدىردى. سوڭعى مالىمەتكە قاراعاندا وڭىردە 161063 ادام كوروناۆيرۋسقا قارسى ۆاكتسينا الىپ ۇلگەرگەن. سونىڭ ىشىندە 105588 ادام ەكپەنىڭ تولىق كومپونەنتىن قابىلداعان.

ەرتەڭىن ويلاپ، ەكپە الدىرعانداردىڭ الدىڭعى شەبىندە ۇلكەن ەڭبەك ۇجىمدارى تۇرعانى قۋانتادى. ماسەلەن، ءبىلىم سالاسىندا قىزمەت ەتەتىن پەداگوگ قىزمەتكەرلەر 2021 جىلدىڭ ناۋرىز ايىنان ۆاكتسينا الا باستاعان ەدى. كۇنى بۇگىن وبلىس بويىنشا ءبىلىم سالاسىنداعى 35879 قىزمەتكەردىڭ 25 182-ءى كوۆيدقا قارسى ەكپە الىپ بولعان. بۇل 81،8 %-دى قۇرايدى. ەكپە الماعان 4061 ادامنىڭ مەديتسينالىق قارسى كورسەتىلىمى بولسا، 1051 پەداگوگ كوۆيدپەن اۋىرىپ، ەكپە الۋى كەيىنگە قالدىرىلعان ەكەن. «10 تامىزعا دەيىن وبلىس پەداگوگتارى 100 پايىز ەكپە الادى دەپ جوسپارلاپ وتىرمىز» دەيدى وبلىستىق ءبىلىم باسقارماسى باسشىسىنىڭ ورىنباسارى سۆەتلانا تەمىرعاليەۆا.

ايماقتاعى ءىرى كاسىپورىن ۇجىمدارى دا بۇل باعىتتا بەلسەندىلىك تانىتىپ وتىر. كەيبىر ءوندىرىس وشاقتارىندا جۇمىسشىلاردىڭ 90%-ىنەن استامى ۆاكتسينا العان.

ورال قالاسىنداعى «كۆانت» جيھاز زاۋىتىندا مىڭعا جۋىق ادام جۇمىس ىستەيدى. ونىمدەرىن ەلىمىزدىڭ بارلىق ايماعىنا جانە رەسەي، ارمەنيا، قىتاي، تۇركيا سەكىلدى شەتەلدەرگە شىعاراتىن ۇجىمنىڭ شامامەن 95 پايىزى كوروناۆيرۋسقا قارسى ەكپە العان ەكەن.

«مەن ادامداردى جاپپاي ۆاكتسينالاۋ دۇرىس دەپ ويلايمىن. ويتكەنى قاتەرلى دەرتتى قوعام بولىپ جەڭۋىمىز كەرەك. ارينە، باسىندا ءبىزدىڭ ۇجىمدا دا جۇرەكسىنگەندەر بولدى. بىراق مەديتسينالىق قىزمەتكەرلەر كاسىپورىنعا كەلىپ، جۇمىسشىلارمەن بىرنەشە كەزدەسۋ وتكىزدى. وسىنداي تۇسىنىك جۇمىستارىنان سوڭ ءوز ەركىمەن ەكپە سالدىرعاندار ۇلەسى كۇرت ارتتى. ءبىزدىڭ فابريكادا وسىعان دەيىن ەشكىم ىندەت جۇقتىرعان جوق. دەگەنمەن بارلىعى ساقتىق ءۇشىن وسىنداي شەشىم قابىلداپ جاتىر» دەيدى كاسىپورىننىڭ باس ديرەكتورى ميحايل پشەنيچنىي.

بۇل پىكىرلى وسى زاۋىتتا ءۇش جىلدان بەرى وپەراتور بولىپ قىزمەت ەتىپ كەلە جاتقان دۋمان ناعيەۆ تە قولدايدى. «ەكپە – ەڭ الدىمەن ءوزىڭنىڭ قاۋىپسىزدىگىڭ ءۇشىن عوي. سوسىن اينالاڭداعى ادامداردىڭ قاۋىپسىزدىگى ءۇشىن دە جاۋاپتىسىڭ. سوندىقتان وسى كەزگە دەيىن الماعان ادامدارعا ەكپە الۋعا كەڭەس بەرەمىن» دەيدى قاراپايىم جۇمىسشى.

باتىس قازاقستان وبلىسىنداعى بەلگىلى «بەلەس» نان ونىمدەرى كومبيناتىدا قىزمەت ەتەتىن 225 ادامنىڭ 195-ءى ۆاكتسينا سالدىرىپ، ۇيىمشىلدىق تانىتىپ وتىر ەكەن. تاۋلىگىنە 20 توننا ماكارون، 260 توننا ۇن ءوندىرىپ، جەرگىلىكتى نارىققا جانە رەسەي، وزبەكستان ەلدەرىنە شىعارىپ وتىرعان كاسىپورىن قىزمەتكەرلەرى وزدەرىنىڭ جانە تۇتىنۋشىلارىنىڭ دەنساۋلىعىنا ۇلكەن جاۋاپكەرشىلىكپەن قاراپ وتىر.