وبلىستىق دەنساۋلىق ساقتاۋ باسقارماسى باسشىسىنىڭ بۇيرىعىمەن مۇندا كوروناۆيرۋس جۇقتىرعان ناۋقاستارعا ارنالعان 280 توسەكتىك ورىن قويىلعان. مۇنىڭ سىرتىندا, 20 ورىندىق جانساقتاۋ ءبولىمى جۇمىس ىستەيدى.
دەنساۋلىق ساقتاۋ سالاسىنىڭ باسشىلىعى مۇنداي شۇعىل شەشىمنىڭ قابىلدانۋ سەبەبى وڭىردەگى ەپيدەميالىق احۋالدىڭ ۋشىعىپ بارا جاتقانىمەن بايلانىستى دەپ ءتۇسىندىردى. سوڭعى تاۋلىك ىشىندە وبلىستا 209 ادامنان COVID-19 دياگنوزى انىقتالعان. ماماندار ىندەتتىڭ تارالۋ قارقىنى ءبىر تاۋلىكتىڭ ىشىندە 1%-عا ارتتى دەپ وتىر.
27 شىلدە كۇنى ساعات 14.00-دە قالالىق اۋرۋحانا مەن اۋرۋحانا جانىنداعى جاراقات پۋنكتى جابىلىپ, ناۋقاستاردى شۇعىل جانە جوسپارلى قابىلداۋىن توقتاتتى. بۇدان بىلاي ناۋقاستار وبلىستىق اۋرۋحانادا ەم الادى.
وبلىستىق دەنساۋلىق ساقتاۋ باسقارماسىنىڭ مالىمەتىنشە, قالالىق اۋرۋحانادا جاتقان ناۋقاستاردى دەنساۋلىق جاعدايىنا قاراي ۇيىنە شىعارۋ نەمەسە وبلىستىق اۋرۋحانا عيماراتىنا اۋىستىرۋ جۇمىستارى ءجۇرىپ جاتىر.
قوستاناي وبلىسى
