شىلدەنىڭ سەگىزىندە «پريگورودنىي» ورمان شارۋاشىلىعىندا تۇتانعان الاپات ءورتتى اۋىزدىقتاۋعا وبلىستىق توتەنشە جاعداي قىزمەتىنىڭ 30-دان استام ارنايى تەحنيكاسى, 100 شاقتى ءورت ءسوندىرۋشى مەن 80 پوليتسيا قىزمەتكەرى جابىلعان. الايدا ورتپەن بىرگە كوتەرىلگەن كۇشتى جەلدىڭ ەكپىنىمەن ورشىگەن قىزىل جالىندى تويتارۋ مۇمكىن ەمەس ەدى. شارپۋى شاقىرىمدىق جەردى قارىعان ءتىلسىز دۇشپان از ۋاقىت ىشىندە جولىنداعىنىڭ ءبارىن جالماي جىلجىپ, نوۆوسەلوۆ, وسينوۆ جانە اباي ەلدى مەكەندەرىنە قاۋىپ توندىرە باستاعان.
جاعداي ۋشىعىپ بارا جاتقان ساتتە ءورت سوندىرۋشىلەرگە بولىسۋعا جەرگىلىكتى شارۋاشىلىقتاردىڭ سوقا تىركەگەن تراكتورلارى مەن گرەيدەرلەرى, كۇرەك-كەتپەن ۇستاعان جۇمىسشىلارى كەلىپ جەتكەن. «جۇمىلا كوتەرگەن جۇك جەڭىل», وسىلايشا, دەر كەزىندە كەلگەن قوسىمشا كۇشتىڭ كومەگىمەن دۇلەي ءورتتىڭ بەتى قايتىپ, 300 گەكتاردان استام ورمان القابى امان قالدى.
اۆتوگرەيدەر جۇرگىزۋشىسى اباي ۇسەنوۆتىڭ ايتۋىنشا, ءورت كەزىندە اينالانى تۇگەلدەي ءتۇتىن باسىپ, الداعى جول كورىنبەي قالعان. تەك گرەيدەر كەلىپ جول سالعان سوڭ عانا ءورت سوندىرۋشىلەر ورمان ىشىنە ءوتىپ, ءورت وشاعى مەن ونىڭ ءارى قاراي تارالۋ باعىتىن انىقتاي العان.
ء–اربىر ەلدى مەكەندە ەرىكتى ءورت سوندىرۋشىلەر جاساعى بولۋ كەرەك. قازىر توتەنشە جاعدايلار دەپارتامەنتىمەن بىرلەسىپ, بۇل ماسەلەنى شەشۋدىڭ جولدارىن قاراستىرىپ جاتىرمىز. مۇنداي جاساقتاردى ارنايى كيىمدەرمەن جانە ءورت ءسوندىرۋ قۇرالدارىمەن قامتاماسىز ەتۋ جاعىن دا ويلاستىرىپ قويدىق. ولار توتەنشە جاعداي تۋىنداي قالعان جاعدايدا جەدەل قيمىلداپ, تەز ارادا نەگىزگى كۇشكە كومەككە كەلۋگە ءتيىس, – دەدى پوليتسيا دەپارتامەنتىنىڭ باستىعى بەكەت ايماعامبەتوۆ.
وبلىستىق توتەنشە جاعداي دەپارتامەنتىنىڭ باسشىسى ءبىرجان كارىموۆ تە ماراپات يەلەرىنىڭ قولىن الىپ, قىستالاڭ ساتتە تابيعات بايلىعىن قورعاپ قالۋ ءۇشىن قولىنداعى تەحنيكاسى مەن بويىنداعى بار كۇش-جىگەرىن اياماعان وجەت تۇرعىندارعا شىنايى رازىلىعىن ءبىلدىرىپ, العىس ايتتى.
قوستاناي وبلىسى
