– نۇرباقىت, وسىدان بەس جىل بۇرىن ريو وليمپياداسىندا بىردە-ءبىر بالۋانىمىز جۇلدەگەرلەر قاتارىنان كورىنە المادى. ەڭ جوعارى جەتىستىگىمىز المات كەبىسباەۆتىڭ جەتىنشى ورنى بولدى. مۇنداي ساتسىزدىكتىڭ سىرى نەدە؟
– 2016 جىلعى وليمپيادادا گرەك-ريم كۇرەسىنەن ەل نامىسىن المات كەبىسباەۆ پەن دوسجان قورتىقوۆ قانا قورعادى. ناتيجە ءبىز كۇتكەندەي بولماعانى راس. دەگەنمەن, قازىر جاعداي باسقاشا. ريودان كەيىن قۇرامادا اۋىس-ءتۇيىس بولىپ, جۇمىس باعىتى دا وزگەرگەنى بايقالادى. وليمپيا ويىندارى دەگەن سپورتشىنىڭ مانسابىنداعى ەڭ ۇلكەن دودا عوي, ەشكىم ايانىپ قالمايتىنى انىق. ءتىپتى مىقتى دەگەن سپورتشىلار دا سۇرىنەدى. الماس پەن دوسجاننىڭ جولى بولمادى دەپ ويلايمىن. ايتپەسە, ەكەۋى دە مىقتى سپورتشىلار قاتارىنان.
– باس باپكەر باقتيار بايسەيىتوۆ وليمپياداعا قاتىساتىن بالۋانداردىڭ ءتىزىمىن جاريالاعاندا 60 كيلو سالماققا مەيرامبەك ايناعۇلوۆتىڭ تاڭدالعانى كوپتەگەن كۇرەس جانكۇيەرلەرىنىڭ تاڭدانىسىن تۋدىردى. ويتكەنى بۇل سالماقتا مەيرامبەكتەن باسقا ايدوس سۇلتانعالي دا بار-تۇعىن جانە سۇلتانعالي سوڭعى جىلدارى ايناعۇلوۆقا قاراعاندا حالىقارالىق جارىستاردا جوعارى ناتيجە كورسەتتى. ازيا چەمپيونى اتاندى. بىراق باقتيار باپكەردىڭ تاڭداۋى مەيرامبەككە ءتۇستى. نەلىكتەن دەپ ويلايسىز؟
– مۇنى باپكەردىڭ وزىنەن سۇراعاندارىڭىز ءجون شىعار, ويتكەنى وليمپياداعا قۇرامانى جاساقتاعان سولار عوي. ال ەندى مەيرامبەك پەن ايدوسقا كەلسەك, ەكەۋى دە سەن تۇر, مەن اتايىن دەيتىن مىقتى بالۋاندار. مۇنداي دەڭگەيدەگى بالۋاندار بارىنا ءبىز قۋانۋىمىز كەرەك. وسى جولى تاڭداۋ مەيرامبەككە ءتۇستى. سوندىقتان وعان ارتىلار جۇك كوپ. سەنىمدى اقتاسا, جولى بولعانى. ال ەگەر وسى توكيودا جولى بولماي جاتسا, كەلەسى وليمپياداعا بار-جوعى ءۇش-اق جىل قالدى عوي. وندا پاريج وليمپياداسىندا ايدوستىڭ جۇلدىزى جانار دەپ ويلايمىن.
– كۇرەستە جولداما سالماق دارەجەسىنە بەرىلەدى. ياعني وليمپياداعا كىمنىڭ باراتىنىن كوبىنەسە باپكەرلەر شەشەدى. وسىنداي ەرەجەگە ءسىزدىڭ كوزقاراسىڭىز قانداي؟
– كۇرەس تۇرلەرىندە ليتسەنزيا ناقتى بالۋانعا ەمەس, سول سالماق دارەجەسىنە بەرىلەدى. بالۋانداردى شەتەلدىك جارىستا بولسىن نەمەسە ءوزارا كۇرەستىرىپ, جەڭگەن ادامعا تاڭداۋ جاساعان دۇرىس. سوندا اپارعان بالۋانىڭىز جاقسى ونەر كورسەتۋى مۇمكىن.
– مەيرامبەك ايناعۇلوۆ وسال بالۋان ەمەس. 2017 جانە 2019 جىلعى الەم چەمپيوناتىندا جۇلدەگەر اتاندى. الايدا 60 كيلودا «سەن تۇر, مەن اتايىن» دەگەن بالۋاندار جينالعان ەمەس پە؟ اسىرەسە, جارىس قوجايىنى سانالاتىن جاپونيالىق كەنيتيرو فۋميتا دا مىقتىلاردىڭ مىقتىسى. ريو وليمپياداسىنىڭ قولا جۇلدەگەرى, وزبەكستاندىق قازاق جىگىتى ەلمۇرات تاسمۇراتوۆ تا بار. مەيرامبەكتىڭ وليمپيا ويىندارىنداعى مۇمكىندىگى قانداي؟
– مەيرامبەكتىڭ سالماعىندا مىقتىلار كوپ. بىراق كۇرەس دەگەن ناقتى مىنا بالۋان ۇتادى دەيتىن سپورت ەمەس. بۇل جەردە وليمپياداعا كىم جاقسى دايىندالدى, سول جەڭىمپاز اتانادى. ءسىز ايتقان بالۋانداردىڭ قاتارىندا ماماندار دا, مەن دە مەيرامبەكتى فاۆوريتتەر قاتارىنا قويامىن. ودان بولەك قىرعىزدىڭ جاس بالۋانى جولامان شارشەنبەكوۆتى دە فاۆوريتتەر قاتارىندا دەپ ەسەپتەۋگە بولادى. قىتاي اتىنان كۇرەسەتىن قانداسىمىز سايليككە ءۋاليحان باۋىرىمىز بار. جالپى, ءار سالماققا 16 بالۋان قاتىسسا, ونىڭ ءبارى وسال ەمەس. ياعني جەڭىمپاز اتانۋعا ارقايسىسىنىڭ مۇمكىندىگى بار.
– وسىدان ەكى جىل بۇرىن نۇر-سۇلتاندا وتكەن الەم چەمپيوناتىندا اسقات دىلمۇحامەدوۆ 77 كيلو سالماقتا جولداما العان ەدى. الايدا ارادا ەكى جىل وتكەندە بۇل سالماقتا دەمەۋ جادىراەۆ كوشباسشىعا اينالدى. جادىراەۆ توكيودا سەنىمدى اقتاي الا ما؟
– اسحات تا, دەمەۋ دە الماتى وبلىسىنىڭ سپورتشىلارى. ەكەۋىنىڭ دە بارىپ جۇرگەن جارىستارىن كورىپ, بارىنشا دايىندىقتارىن باقىلاپ جۇرەمىن. وليمپيا ويىندارى جاقىنداعان ساتتە باپكەرلەردىڭ تاڭداۋى دەمەۋگە ءتۇستى. ەندى دەمەۋ بار كۇش-جىگەرىن سالىپ, جوعارى ناتيجەگە قول جەتكىزەدى دەگەن سەنىم بار.
– ريو وليمپياداسىنىڭ قارساڭىندا «مەلدوني قولداندى» دەپ ۋاقىتشا شەتتەتىلگەن نۇرسۇلتان تۇرسىنوۆ بىلتىر كوكتەمدە ۇلكەن سپورتقا قايتا ورالدى. باس-اياعى ءبىر جىلدىڭ ىشىندە ول ەكى بىردەي جاۋاپتى جارىستا جەڭىسكە جەتتى. نۇرسۇلتاننىڭ مۇمكىندىگىنە قانداي باعا بەرەسىز؟
– ءيا, نۇرسۇلتان تۇرسىنوۆتىڭ سالماعىندا ەلىمىزدە اسا ۇلكەن باسەكەلەستىك جوق. نۇرسۇلتانعا ەل چەمپيوناتىنا قاتىسىپ, ءبىرىنشى ءنومىرلى بالۋان بولۋ قيىنعا سوققان جوق. ال ەندى الەمدىك دەڭگەيدە نۇرسۇلتانعا جۇلدەگەر اتانۋعا ءبىراز تەر توگۋ كەرەك. باعى مەن بابى قاتار شاپسا, نۇرسۇلتان دا ەل نامىسىن قولدان بەرمەۋ كەرەك.
جالپى, بارلىق بالۋاندارىمىزعا جانكۇيەر بولامىز, بارىنەن جۇلدە كۇتەمىز. سونداي-اق ەلدىڭ جۇگىن ارقالاپ بارعان بارلىق سپورتشىعا ساتتىلىك تىلەپ, ابىرويمەن ەل نامىسىن قورعاپ, جۇلدەمەن ورالسىن دەيمىن.
