تاريح • 28 شىلدە، 2021

«كوگىلدىر ەكراننىڭ» جۇلدىزدى جۇبى

156 رەت كورسەتىلدى

وتكەن عاسىردىڭ 1960-1990 جىلدارى وتاندىق كوگىلدىر ەكراننىڭ سۇيىكتىسى مەن سىمباتىنا، كورىكتىسى مەن سىرلاسىنا، كۇن سايىن ءاربىر وتباسىنىڭ تورگە شىعار قادىرمەندى سىيلاسىنا اينالعان جاندار – لاسكەر سەيىتوۆ پەن ءماريام ايىمبەتوۆا بولاتىن. ديكتور. ەلۋىنشى جىلدارى بۇل اتاۋ تاڭسىق ءارى بيىك مانساپ بولاتىن. «قايىرلى كەش، قۇرمەتتى تەلەديدار كورەرمەندەرى!» دەپ باستالاتىن قۇلاققا جاعىمدى، كوڭىلگە قونىمدى ءۇن سەنى تەلەەكران الدىنا ءجىپسىز بايلايتىن. سول شاقتاعى «كوگىلدىر ەكراننىڭ» كوركى مەن سۇلۋلىقتىڭ پەرىشتەسىندەي، بەت-الپەتىنە كوزىڭ تۇسكەندە جانارىڭ توقتاي قالاتىن حوردىڭ قىزى مەن جىگىتتەرىندەي اعالارىمىز بەن اپالارىمىز قازاق تەلەۆيزياسىنداعى «سۇلۋلىقتىڭ سيمۆولىنداي» بولىپ كۇنى بۇگىنگە دەيىن كوز الدىمىزدا تۇر.

وتكەن عاسىردىڭ ەكىنشى شيرەگىندە كوگىلدىر ەكران كوركىنە اينالعان ءماريام ايىمبەتوۆا اقتوبە وبلىسىنىڭ ەمبى (بۇگىنگى مۇعالجار) اۋدانىندا تۋىپ-ءوستى. اتاسى جەزدىباي اقساقال وڭىرگە بەل­گىلى ءارى سىيلى، كوزى اشىق، وقىعان مولدا بولاتىن. اتاسى 1932 جىلعى الاساپىران كەزەڭدە «حالىق جاۋى» رەتىندە اتىلىپ، كەيىن اقتالدى. ءماريام اپاي جۇرەك قالاۋىمەن اقتوبەدەگى مەدينس­تيتۋتتا وقىپ جۇرگەن 1960 جىلدىڭ كۇ­زىندە وڭىردە تەلەۆيزيا بوي كوتەردى. وبلىستىق تەلەستۋديا باسشىلىعى كور­كەم كەلىستى كەلبەتىنە سازدى، قوڭىر ءۇنى ساي ءماريامدى ديكتورلىققا شاقىرادى. سول شاقتان باستالعان كۇن سايىنعى ەفيردەگى ارپالىس پەن جاۋاپكەرشىلىك جۇگىنە 34 جىل بويىنا سىزات تۇسىرمەگەن اسىل اپامىز، كەيىنگى جيىرما سەگىز جىلىن قازاق تەلەۆيزياسىنىڭ كۇندەلىكتى جاڭالىقتارى مەن الۋان سالاداعى حابارلارىن ميلليونداعان اۋديتورياعا ورنەكتى ءتىل، اۋەزدى ماقام، سازدى ۇنمەن جەتكىزىپ وتىردى. عۇمىرىنىڭ ۇشتەن ءبىرىن سۇيىكتى كاسىبىنە ارناعان جان جارى، ەلىمىزگە تانىمال ديكتور لاسكەر سەيىتوۆ ەكەۋىنىڭ تەلەەكرانداعى ديكتورلىق ەڭبەك جولدارى 65 جىل ەكەن. ءبىر شاڭىراقتان شىققان ەكى بىردەي تانىمال، ەلگە سىيلى ارداگەر ديكتورلاردىڭ وتكەن ءومىر جولدارى دا بۇرالاڭى مەن بۇلتارىستارى مول شاققا تولى بولدى.

لاسكەر قالي ۇلى باياناۋىلدا تۋىپ ءبىلىم الدى. باياناۋىل توپىراعى حال­قى­مىزعا قانىش ساتپاەۆ، الكەي مار­عۇلان سىندى تارلان تالانتتاردى، اكا­دەميكتەردى سىيلاعان ولكە عوي. اكەسى قالي مۇقامباي ۇلى ءدىندار، وتە تازا، تەكتى، وقىعان، كوزى اشىق ادام بولاتىن. اناسى كام «سىرلى اياقتىڭ سىرى كەتسە دە، سىنى كەتپەيدى» دەگەندەي، جۇ­زىنەن ىلعي دا مەيىرىم شۋاعى توگىلىپ تۇراتىن، مەيىرباندى جان ەدى. باياناۋىل ولكەسىنىڭ سەركەسى اتانعان جاس جىگىت قاراعاندى پەدينستيتۋتىنىڭ فيلولوگيا فاكۋلتەتىن ءبىتىرىپ، وبلىستىق راديوعا ديكتورلىققا شاقىرتىلادى. ول شاقتا وبلىستاعى جاس ديكتورلاردى جىل سايىن الماتىعا بىلىمدەرىن شىڭ­داۋعا سەمينارلار مەن كۋرستارعا شا­قىرىپ، جاڭالىقتار مەن حابارلاردى جۇر­گىزۋدىڭ قىرى مەن سىرىنا ۇيرەتەتىن. ديكتورلار توبىنىڭ جەتەكشىسى ءلازيزا ايماشە­ۆا: «ول كەزەڭدەردە جىل سايىن وبلىس ديكتورلارى استاناعا كەلىپ ءبىر ايلىق ماماندىقتارىن جەتىلدىرۋ كۋرستارىنان وتەتىن. ورتالىق تەلەديداردىڭ ديكتورلار توبىنىڭ جەتەكشىسى بولعاندىقتان، بولاشاعىنان ءۇمىت كۇتتىرەتىن مامانداردى الىپ قالۋعا مۇمكىندىگىم بولدى. 1962 جىلى ل.سەيىتوۆ قاراعاندىدان، ال م.ايىمبەتوۆا اقتوبەدەن 1 ايلىق كۋرسقا كەلدى. ماعان ولاردىڭ ەفيردەگى وزدەرىن ۇستاۋى مەن سويلەۋ مانەرى، سىرت كەلبەتى ۇنادى. ەكرانعا لاسكەر شىعا باستاعاننان-اق جاس قىزداردان تەلەفون شىلدىرى مەن حاتتار لەگى كوبەيدى. ەندى جاس بالا ءبىر نارسەگە ۇرىنىپ قالماسا يگى ەدى دەگەندى ءجيى ويلادىم. سودان ءبىر كۇنى لاسكەر مەن ءماريامدى ەفيرگە بىرگە قويدىم، بايقايمىن ءبىر-بىرىنە جاراسىمدى. نە كەرەك، لاسكەرگە قىزبەن اشىق سويلەس دەپ كەڭەس بەردىم»، دەيدى وتكەندى ەمىرەنە ەسكە الىپ.

ونەردەگى جول بولاشاقتا ۇزاق ءارى ماعىنالى ءومىر جولىنا ۇلاسقان ەكى جاس سول كەزدەسۋلەردە-اق ىشتەي بولسا دا ءبىر-بىرىنە دەگەن رياسىز كوزقاراستارىن جۇرەك لۇپىلىمەن ۇعىنىستى. مىنە، سودان باستالعان «ماحاببات داستانى» ءبىرى الماتى، ءبىرى اقتوبەدەگى ەكى جاستى ءلايلى مەن ماجنۇندەي عاشىقتىق وتىنا ورادى دا قويدى. ۇيلەنىپ ءۇي بولايىن دەسە قول قىسقا. لاسكەر اعا جالعىزدىڭ كۇيىن كەشىپ ءجۇرىپ جاتادى. بۇل ۇزاققا سوزىلار ما ەدى، الدە تاعدىر ماڭدايداعى جازۋدى باسقاشا جازار ما ەدى، كىم ءبىلسىن، ەكى جاستىڭ باقىتىنا ل.ايماشەۆا مەن ونىڭ وتاعاسى، تەلەراديوكوميتەت توراعاسى، ابزال ازامات كەنجەبولات شالاباەۆ كەزدەسپەگەندە. ءلازيزا اپاي ەكى جاستىڭ ارالارىنداعى «جۇرەك تولقىنىسىن» سەزسە دە، مۇنى ۇزاق ۋاقىت كەنجەكەڭە ايتۋعا باتا المايدى. دەگەنمەن ىڭعايى كەلگەن ءبىر ساتتە لاسكەردىڭ كوڭىل كۇيىن جولداسىنا جەتكىزەدى.

«كەنجەكەڭنىڭ ماعان ىستىق ىقىلا­سى­مەن جاساعان جاقسىلىعىن ايتپاسام، ارىما سىن. بويداق كەزىم بولاتىن. ۇيلە­نىپ، ءۇي بولايىق دەسەك، قولىمىز قىسقا. ۋاقىت بولسا ءوتىپ بارادى. ءبىر كۇنى توراعا كابينەتىنە شاقىرىپ، ماسەلەنى توتەسىنەن قويدى.

– سەن وسىلاي سۇر بوي­داق بولىپ جۇرە بەرەسىڭ بە؟

– ۇيلەنۋگە جاعدايىم جوق، – دەدىم.

– قىزىڭ بار ما؟

– بار.

– قايدا.

– اقتوبەدە ديكتور.

تەلەفون ترۋبكاسىن كوتەرىپ، اقتو­بە­نىڭ وبلىستىق تەلەراديوكوميتەتىنىڭ توراعاسى ميحايل كوزين مىرزاعا «ديك­تور ل.سەيىتوۆ اق­تو­بەگە بارادى، وزىڭدە جۇمىس جاسايتىن م.ايىمبەتوۆانى قا­سىنا قوسىپ، ال­ماتىعا جىبەرەسىڭ».

– ال، بالا جولعا دا­يىندال. توي قا­مىنا الاڭداما.

الدىندا مارياممەن تەلەفون ار­قى­لى سويلەسىپ تۇراتىنبىز. ول كەزەڭدە بايلانىستىڭ قيىنداۋ شاعى. تەلەفون شا­لىپ، باراتىنىمدى، دايار وتىرۋى كە­رەك ەكەندىگىن تۇسىندىرگەن بولدىم. داۋىس­تىڭ ءبىرى ەستىلسە، ءبىرى ەستىلمەيدى. سودان بارا سالا، «مەن سەنى الىپ كەتۋگە كەل­دىم، دايارسىڭ با»، دەمەسىم بار ما؟! كەنجە­كەڭ ۋادەسىندە تۇرىپ، ۇجىمدى جۇمىلدى­رىپ، ەستەن كەتپەستەي ەتىپ كومسومولدىق ­توي جاساپ بەردى». تەلەراديوكوميتەت ­ماس­كەۋگە ساياحاتتاپ قايتۋعا ەكەۋىنە جول­داما دا بەرەدى. بۇل 1966 جىلى بولاتىن. مىنە، اسىل اعانىڭ جاس وتاۋعا جا­سا­عان وسىنداي جاقسىلىعىن ادام قالاي ۇمى­تار. ال سول كەزدە-اق كوپتى كورگەن ءلازيزا اپايدىڭ جاستارعا اقىل-كەڭەسى مەن ءتالىم-تاربيەسى، كورسەتكەن كومەگى ەستەن شىعار ما؟! اسىرەسە تۇڭعىشتارى مەيىرگۇل ومىر­گە كەلگەندە پەرزەنتحانادان ۇستىندەگى تونىنا وراپ الىپ شىققان دا ءلازيزا اپاي بولاتىن. كەنجەكەڭ دە، ءلازيزا اپاي دا بۇگىندە قايتپاس ساپارعا ءبىرى ەرتە، ەندى ءبىرى كەش اتتاندى.

قازاق تەلەۆيزياسى العاشقى جىلدارى تەحنيكالىق ءارى شىعارماشىلىق كادر­لار قۇرامى جاعىنان كوپ قيىندىقتار­عا كەزىكتى. تەحنيكا تاپشى ءارى كاسىبي ما­­ماندانعان رەجيسسەر دە، وپەراتور دا جوق­­قا ءتان. «ول كەزدە بەينەجازۋ دەگەن جوق، ەفيرگە تىكەلەي شىعامىز. وسىنداي سات­­تەردە كوپ قينالاتىنبىز. ەفيردە ديك­تور­لاردىڭ ىركىلمەي، ءسوز بەن سويلەم ادە­بىن بۇزباي سويلەۋى، سىرت كەلبەتتىڭ جاراسىمدى بولۋى، ەكران الدىندا ورنىقتى وتىرۋ الىپپەسىن ۇيرەتكەن رەجيسسەر، تەح­­نيك، گريمدەۋشى-مودەلەر ءساليما ەس­تەمەسوۆا بولاتىن. رەجيسسەر كۇن سايىن ديك­تورلارمەن وقۋ جاتتىعۋ ساباقتارىن وتكىزەدى. مەرزىمى 20 كۇننەن 1 ايعا نە ودان دا ۇزاق مەرزىمگە سوزىلاتىن. ول كەزەڭدە تالاپتىڭ قاتاڭ، باقىلاۋدىڭ جۇيەلى بولعانى ايقىن. سەبەبى، ەفيردەگى حابارلاردى جۇرگىزۋ باستان-اياق ديكتورلارعا جۇكتەلەتىن»، دەپ، سول وتكەن كۇندەرىن ءماريام اپاي قيماستىقپەن ەسكە الادى.

ول كەزدە تاجىريبەلى تەلەۆيزيا قىز­مەتكەرلەرى از بولدى. تەاتر، كينوستۋ­ديادان كەلەتىن رەجيسسەرلەر، گازەت-جۋرنال رەداكتورلارى، شىعارماشىلىققا قاتىسى بار جاستار ۇلكەننەن دە، كىشىدەن دە ۇيرەندى. الپىسىنشى جىلدارى ماس­كەۋ مەن لەنينگرادتىڭ ءبىلىم جەتىلدىرۋ ­كۋرستارىندا جىلىنا ەكى رەتتەن ديكتورلار سەمينارلارى وتەتىن. وعان بۇكىل وداقتىڭ جۇرگىزۋشى-ديكتورلارى جينالاتىن. كوپ نارسەگە ۇيرەنەسىڭ. جەتەك­شى ماماندار سويلەۋ، اكتەرلىك شەبەرلىك تەحنيكاسىنا باۋليدى. رەجيسسەر ءلايلا عالىمجانوۆا، جۋرناليست قادىر دا­ۋىتوۆ، رەداكتور سوۆەت ماسعۇتوۆ قانداي عاجاپ رەداكتور ەدى! ەكى-ءۇش ءسوزدىڭ ورنىن اۋىستىرسا بۇكىل سويلەم قۇلپىرىپ كەتەدى. الماتىعا ماسكەۋدەن اتاقتى ديكتور يۋري لەۆيتاننىڭ ءوزى كەلدى! تەلە­ەكراننىڭ العاشقى ديكتورلارى، بۇگىندە عاسىر جاسىنان اسقان زۇلقيا جۇماتوۆا، مارقۇمدار نەللي وماروۆا، اتاقتى راديو ديكتورى انۋاربەك بايجانباەۆ مەكتەبى ديكتورلارعا نەگىز قالادى. مىنە، العاشقى ەلەڭ-الاڭدا ءماريام مەن لاسكەر دە سولاردان ۇيرەندى، ولارعا ەلىكتەدى.

ءان-اعا، جارىقتىق، انۋاربەك باي­­جان­باەۆ راديودان حابار وقىعاندا كەۋ­دەڭ­دە­گى جۇرەگىڭ تۋلاپ، قوس وكپەڭ القىمىڭا تى­عىلىپ، ەرەكشە ءبىر تەبىرەنىس كۇي كەشە­تىنسىڭ. رەسمي نە الۋان سالاداعى حابارلاردى وقىعاندا رەسپۋبليكا ەمەس، وداق كولەمىندە ديكتورلار اراسىنان ول كىسىنىڭ الدىنا تۇسەتىن ادام كەمدە-كەم ەدى. جا­رات­قان يەم وزىنە تىڭدارمان قۇلاعىنا جاعىمدى قوڭىر داۋىستى، سىبىزعىنىڭ ۇنىندەي سازدى ءۇندى، مانەر مەن تىڭدارمان جۇرەگىڭە جول تابار ماشىقتىقتى اياماي قوندىرا سالعان.

ديكتورلىق ونەردىڭ ءوز قۇپياسى، ونىڭ كۇردەلىلىگىندە. از ۋاقىتتى ۇنەمدەپ، ءار­بىر ءسوزدى قاس-قاعىم ساتتە جۇيەلى تۇر­دە جەتكىزۋ، كۇندەلىكتى سان-سالالى وقيعا­لار­مەن كورەرمەندى تانىستىرۋ اسقان شە­بەرلىكتى ءارى تىڭعىلىقتى دايارلىقتى تا­لاپ ەتەدى. وسى جايلى بىلايشا وي تول­عايدى تالىمگەر ديكتور ءماريام ايىم­بەتوۆا بىلايشا وي تولعايدى: «بىزگە قو­لاي­لىلىعى سول – ءبىر حاباردى باسىنان-سو­ڭىنا دەيىن جۇرگىزەمىز. حاباردىڭ الۋان جانردا بولۋى – ديكتوردىڭ شەبەرلىگىن شىڭداپ، دياپازونىن كەڭەيتىپ، امپلۋاسىن تەرەڭدەتەدى. ءبىر اۋىز ءسوزدىڭ وزىمەن كوپ نارسەنى اڭعارتۋعا بولادى. ارينە، سوي­لەۋ دە كوبىنە-كوپ وقىپ وتىرعان ما­تىنگە دە بايلانىستى. ديكتور ءاربىر ءسوز­دىڭ ءمانىن سەزىمتالدىقپەن، جۇرەك تۇك­­پىرىنەن شىعارىپ، ءوز سوزىندەي ەتىپ جەت­كىزسە عانا ءوز كورەرمەندەرىنە جەتەرى حاق».

ءماريام ايىمبەتوۆا اقتوبە تەلەۆيزياسىندا ىستەگەن 5-6 جىلدىڭ كولەمىندە وعان ەلىكتەگەن، مەن سونداي بولسام دەگەن ارمان مەن قيال جەتەگىندە جۇرگەن جاندار از بولمادى. اسەمدىك پەن سۇلۋلىق استاسىپ، وعان ءتىل بايلىعى جاراسقان جاننىڭ بويىنداعى قىزعا ءتان قىلىق، بيازىلىق پەن جۇزىنەن ۇنەمى توگىلىپ تۇراتىن نۇر، سۇلۋ كەلبەت كىم-كىمدى بولسا وزىڭە ىشتەي دە بولسىن عاشىق ەتەتىن. ءماريام اپايىنا ۇقساسام دەگەن ارمان مەكتەپ جاسىنان جۇرەگىنە ۇيالاعان، كەيىن ءوزى دە ۇزاق جىلدار ەفيردىڭ سۇيىكتىسىنە اينالعان ديكتور باقىت جاڭعاليەۆا: «تەلەديدارى بار ۇيدە ءماريام اپايعا ەلىكتەمەگەن، وعان ۇقساۋعا تىرىسپاعان جاستار از شىعار. ءوزىم ۇيدە سابىنعا شىرپىنى ورناتىپ، ونى اينالدىرىپ وتىرىپ «سويلەپ تۇرعان موسكۆا. موسكۆا ۋاقىتى تاڭعى ساعات 7» دەپ ونى ءتۇرلى ينتوناتسيادا قايتالايتىنمىن. 1965 جىلى مادەني اعارتۋ سالاسىنان ءبىلىم الدىم. ول كەزدە ديكتور ءماريام اپاي بولاتىن. قىزدار ءبارىمىز اپايدىڭ سويلەۋ مادەنيەتى مەن شاشىنا دەيىن ەلىكتەپ، سوعان ۇقساۋعا تىرىساتىنبىز. اپاي 1966 جىلى الماتىعا اۋىستى دا، ورنىنا مەن كەلدىم»، دەيدى اعىنان جارىلىپ.

سوناۋ ارتتا قول بۇلعاپ قالعان جاستىق شاق، ەسەيگەن كەزىندە ەكىنشى ۇيىڭدەي بولعان قازاق تەلەۆيزياسى وسىندا ىستەگەن كىم-كىمگە دە قاشاندا ىستىق. ءبىز شىققان بيىكتەن، العان اسۋدان بۇگىنگى ءىزباسارلا­رى اسىپ تۇسسە، ودان دا بيىككە كوز سالسا دەيدى. ىزدەگەنىن تابا الماسا قاشاننان دا بەيمازا لاسكەر اعا تەلەفون شالىپ: «قۇدايبەرگەن بايقادىڭ با، كەشەگى ديك­تورلىق ماماندىقتىڭ ورنىن باسقان بۇ­گىنگى جۇرگىزۋشىلەر ەفيردەن قالاي بول­سا، سولاي سويلەپ، ورتانى، قوعامدى، وسكە­لەڭ ۇرپاقتىڭ ءتىل مادەنيەتىن بۇزىپ جاتىر. ولار ەفيردەگى جۇرگىزۋشىلەرگە قاراپ بويلارىن عانا ەمەس، ويلارىن دا تۇزەيتىندەرىن بىلمەي مە، الدە سوعان ورە­لەرى جەتپەي مە؟! وسىلار مەكتەپتە، جوو-دا ءتىل زاڭدىلىقتارى ەرەجەلەرىن وقىماعان با؟» دەپ قىنجىلىسىن ءبىلدىردى.

ءوزىم قازاق تەلەديدارىندا ىستەگەن سەك­سەنىنشى جىلداردىڭ بىرىندە ءماريام اپايعا «ەفيرگە شىققاندا قانداي سەزىم­دە بولاسىز؟»، دەگەنىمدە: «ديكتورلار­دىڭ ەفيرگە شىعۋى ءبىز ءۇشىن – بۇكىل حالقى­مىزدىڭ سالت-ءداستۇرى، مادەنيەتى، مىنەز-قۇلقىنىڭ ايناسى ىسپەتتى سياقتى. سون­دىقتان دا كيىم كيۋ، شاش قويۋ، كامەرا الدىڭدا ءوزىڭدى ۇستاۋدىڭ ءمانى ەرەكشە. داۋىس ىرعاعى، كوڭىل كۇي، ارتيكۋلياتسيا، ديكتسيا دەگەندەردىڭ بارىنە ساقاداي ساي بولۋىڭ كەرەك. ءاربىر كۇنگى حابار مەن ءۇشىن تولعانىس، ەرەكشە كوڭىل-كۇيمەن اسەرلى، داۋىسىڭ اشىق تا سازدى بولۋى قاجەت. ەفير الدىندا ۇلكەن سىنعا تۇسە­تىندەي ۇنەمى تولقيمىن. حاباردى وتكىز­گەن سوڭ عانا كوڭىلىم ءبىر ساتكە جاي تا­با­دى»، دەگەنى ەسىمدە. ديكتور قاي كەزدە دە تەلەۆيدەنيە حابارلارىنىڭ باس ديريجەرىندەي. ءارى ءار حابارداعى ماقسات-مازمۇنىنا ساي كورەرمەن جۇرەگىڭە جول تاپسا دەيسىڭ. بۇل دا ديكتور ورەسىنىڭ كەڭدىگىنە، وي تەرەڭدىگىنە بايلانىستى. ءاربىر ءسوز ارقىلى ايتپاق بولعان وي-پىكىردى مەيلىنشە ءدال جەتكىزۋدىڭ ءادىس-ءتاسىلى كورەرمەندەردىڭ تالاپ-تالعامىن ورىنداۋ بولىپ تابىلادى.

 «Aqtobe» تەلەارناسىنىڭ ۇجىمى 60 جىلدىق مەرەيتويى قارساڭىندا قازاق كسر ەڭبەك سىڭىرگەن ءارتىسى لاسكەر سەيىتوۆپەن كەزدەستى. لاسكەر سەيىتوۆ تەلە­ارنا ۇجىمىمەن كەزدەسپەس بۇرىن گريمەر بولمەسىنەن ءبىر-اق شىقتى. جاسى سەكسەننەن اسسا دا، ءالى تىڭ، ءوزىن بارىنشا شيراق ۇستايتىن ارداگەر ديكتور توتىدا­يىن تارانىپ، سۇڭقاردايىن سىلانباسا دا، ايناعا قاراپ، شاشىن تاراپ، بەتىن ارلەتىپ بارىپ كەزدەسۋگە كەلدى: «1962 جىلدىڭ 12 قازانىندا قازاق تەلەۆيزياسىنىڭ ەسىگىن اشتىم. سودان باستاپ بار ءومىرىم تەلەديداردا ءوتتى. ول كەزدە جاسىم نەبارى 22-دە ەدى. كونكۋرستان ءوتىپ، 1994 جىلعا دەيىن تەلەۆيزيا سالاسىندا ديكتور بولدىم. جالپى وتىز ءتورت جىل ديكتورلىق قىزمەت اتقارىپپىن. كەڭەس ۇكىمەتى قۇلاپ، زامان وزگەردى، باسقا قوعام ورناي باستاعان اۋىر كەزەڭدەردە تۇبەگەيلى راديوعا اۋىستىم. ديكتور، جۇرگىزۋشى، كوممەنتاتور، اعا رەداكتور، باس رەداكتورلىق قىزمەتتەردى اتقارىپ، 2002 جىلى زەينەت دەمالىسىنا شىقتىم».

1960-1990 جىلداردىڭ ايشىقتى تۇل­عا­­لارى، قازاق تەلەۆيزياسىنىڭ قارلى­عاش­تارى، قازاقستان رەسپۋبليكاسىنىڭ ەڭ­بەك سىڭىرگەن ارتىستەرى لاسكەر سەيىتوۆ پەن ءماريام ايىمبەتوۆا – كورەرمەن جۇ­رەگىندە، ەل ماقتانىشتارى. ويتكەنى ولار­­دىڭ سول كەزەڭدەردەگى تەلەۆيزياداعى سىم­باتى مەن قوڭىر ءۇنى ءبۇتىن ءبىر قازاق با­لا­سىنىڭ قىزىعۋشىلىعىن تۋعىزىپ، ۇلگى الۋعا ۇندەدى. بۇگىندە ءبىرى سەكسەننىڭ بەل ور­تاسىنا تاياسا، ەندى ءبىرى سەڭگىرلى سەكسەن­گە اياق باسقان، تەلەۆيزيا تابىستىرعان ەر­لى-زا­يىپتى ديكتورلار لاسكەر سەيىتوۆ پەن ءما­ريام ايىمبەتوۆا – قازاق تەلە­ۆيزيا­سىنىڭ تاريحىنان ويىپ ورىن العان تۇلعالار.

 

قۇدايبەرگەن تۇرسىن،

فيلولوگيا عىلىمدارىنىڭ دوكتورى، پروفەسسور

سوڭعى جاڭالىقتار

مارافون نەسىمەن ماڭىزدى؟

الەم • 26 قىركۇيەك، 2021

تاعدىرى تەمىردەي شىڭداعان قايراتكەر

قازاقستان • 26 قىركۇيەك، 2021

شەكتەۋدە شيرىققان شاعىن بيزنەس

بيزنەس • 26 قىركۇيەك، 2021

پياندج وزەنىندەگى ەرلىك

تاريح • 26 قىركۇيەك، 2021

ەڭبەكپەن ەسەيگەن ەر

قازاقستان • 26 قىركۇيەك، 2021

بەيتانىس ساعىنىش

الەم • 26 قىركۇيەك، 2021

Astana Open ءتۋرنيرى اياقتالدى

سپورت • 26 قىركۇيەك، 2021

شەكاراشىلار ەليتالىق اسكەر بولسا...

قازاقستان • 26 قىركۇيەك، 2021

ۇلىبريتانيادا تانىستىرىلادى

وقيعا • 26 قىركۇيەك، 2021

وبلىس ورتالىعىنىڭ دەنى اۋىز سۋسىز وتىر

ايماقتار • 26 قىركۇيەك، 2021

مۇراعاتتاردىڭ ءحالى مۇشكىل

قوعام • 26 قىركۇيەك، 2021

نۇر-سۇلتان اۋەجايىندا ءتۇتىن شىقتى

ەلوردا • 26 قىركۇيەك، 2021

جالعىزدىق ارالى

كينو • 26 قىركۇيەك، 2021

تەننيس: Astana Open ءتۋرنيرى اياقتالدى

سپورت • 26 قىركۇيەك، 2021

ەلوردادا قار جاۋادى

قازاقستان • 26 قىركۇيەك، 2021

بالالار الاڭىنداعى تج: بالا ەسىن جيدى

ايماقتار • 26 قىركۇيەك، 2021

قاراعاندى-بالقاش تاس جولى جوندەلۋدە

ايماقتار • 26 قىركۇيەك، 2021

الماتىدا كىتاپ فەستيۆالى ءوتىپ جاتىر

ايماقتار • 26 قىركۇيەك، 2021

ماسكەۋدە جەتى جۇلدە الدىق

سپورت • 26 قىركۇيەك، 2021

ەلوردادا Astana Marathon-2021 ءوتىپ جاتىر

ەلوردا • 26 قىركۇيەك، 2021

بۇگىن ماشينا جاساۋ كۇنى

قازاقستان • 26 قىركۇيەك، 2021

قىزىلوردا وبلىسى «جاسىل» ايماققا ءوتتى

كوروناۆيرۋس • 26 قىركۇيەك، 2021

قانشا قازاقستاندىق ۆاكتسينا سالدىردى؟

كوروناۆيرۋس • 26 قىركۇيەك، 2021

قازاقستاندا ەڭبەك كۇنى اتاپ وتىلەدى

قازاقستان • 26 قىركۇيەك، 2021

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار