ايماقتار • 28 شىلدە، 2021

سەناتورلار الماتى وبلىسى قاپال اۋىلىنىڭ تۇرعىندارىمەن كەزدەستى

16 رەت كورسەتىلدى

سەناتورلار باقىتجان جۇماعۇلوۆ پەن ءلاززات سۇلەيمەن الماتى وبلىسىنىڭ اقسۋ اۋدانىنداعى قاپال اۋىلىنا بارعان ساپارى بارىسىندا بىرقاتار الەۋمەتتىك نىسانداردى ارالاپ، حالىقپەن كەزدەستى. بۇل تۋرالى سەناتتىڭ ءباسپاسوز قىزمەتى حابارلادى.

دەپۋتاتتار 1984 جىلى سالىنعان ەمحانانىڭ جۇمىسىمەن دە تانىستى. دارىگەرلەر ۇجىمىمەن كەزدەسۋدە اۋىلدا دارىگەر مامانداردىڭ ازدىعى، اتاپ ايتقاندا اكۋشەر-گينەكولوگ پەن حيرۋرگ ماماندارىنىڭ جەتىسپەيتىندىگى جانە «جەدەل جاردەم» كولىكتەرىنىڭ ەسكىرگەندىگى ايتىلدى.

سەناتورلار ماسەلەلەردىڭ شەشىمى تابىلاتىنىن جانە وبلىس باسشىلىعىمەن بىرلەسىپ «جەدەل جاردەم» كولىكتەرىن جاڭالاۋدى قولعا الاتىندارىن اتاپ ءوتتى. سونداي-اق ەمحانا «اۋىل – ەل بەسىگى» باعدارلاماسى بويىنشا كۇردەلى جوندەۋدەن وتەتىن نىساندار تىزىمىنە ەنگىزىلگەنىن، سوندىقتان دارىگەر تاپشىلىعىن جويۋ ماسەلەسىنە ايرىقشا نازار اۋدارۋ كەرەك ەكەنى ايتىلدى.

دەپۋتاتتار سونىمەن قاتار اۋىلداعى اتاقتى تامشىبۇلاقتى كورىكتەندىرۋ جوسپارىمەن، تاريحي جادىگەر – شاياحمەت باي ۇيىنە جۇرگىزىلگەن رەستاۆراتسيالىق جۇمىستارمەن تانىستى. وسى ۇيدە قاپالدىڭ ولكەتانۋ مۋزەيىن ۇيىمداستىرۋ جوسپارى تۋرالى ايتىلدى. سەناتورلار بۇل باعىتتا قولداۋ كورسەتىلەتىنىن اتاپ ءوتتى.

«قاپال – قۇندى تاريحي جادىگەرلەر كوپ ساقتالعان جەر. سوندىقتان، بۇل مەكەندە بولاشاقتا ءتۋريزمدى دامىتۋعا، ونى ءتول تاريحىمىزدى تانىتاتىن ەلدى مەكەندەردىڭ بىرىنە اينالدىرۋعا كۇش سالۋىمىز قاجەت»، دەدى باقىتجان جۇماعۇلوۆ.

دەپۋتاتتار عالي ورمانوۆ مەكتەبىندەگى وقۋشىلاردىڭ جازعى لاگەرىندە دە بولدى. وندا باقىتجان جۇماعۇلوۆ ءبىلىم سالاسىنا قاتىستى قابىلدانعان زاڭدار تۋرالى، مەملەكەت تاراپىنان ۇستازدار مەن وقۋشىلارعا جاسالىپ جاتقان جاعدايلار تۋرالى ايتتى.

ساپار بارىسىندا سەناتورلار حالىقپەن كەزدەسىپ، ولاردىڭ ماسەلەلەرىن تىڭدادى. اتالعان كەزدەسۋدە قاپال اۋىلىنداعى جەر قاتىناستارىن رەتتەۋ، جايىلىممەن قامتاماسىز ەتۋ، ۆەتەرينارلىق پۋنكت اشۋ، اۋىلدى اباتتاندىرۋ جانە جولداردى جوندەۋ ماسەلەلەرى كوتەرىلدى. بۇل ماسەلەلەردىڭ بارلىعى سەناتورلارلاردىڭ باقىلاۋىنا الىندى.

«مەملەكەتتىك باسقارۋدىڭ اشىقتىعىنا، ازاماتتاردىڭ وتىنىشتەرى مەن شاعىمدارىن شەشۋدە ەلەۋلى ناتيجەگە قول جەتكىزۋدە بيلىك پەن قوعام اراسىنداعى سەنىمدى ديالوگ ورناتۋ، بيلىكتىڭ حالىققا بارىنشا جاقىن بولۋى اسا ماڭىزدى»، دەدى سەناتور ءلاززات سۇلەيمەن.

سوڭعى جاڭالىقتار

ەڭبەكپەن ەسەيگەن ەر

قازاقستان • كەشە

بەيتانىس ساعىنىش

الەم • كەشە

جالعىزدىق ارالى

كينو • كەشە

ەلوردادا قار جاۋادى

قازاقستان • كەشە

بۇگىن ماشينا جاساۋ كۇنى

قازاقستان • كەشە

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار