بەينەروليككە جامبىل اتىنداعى قازاق مەملەكەتتىك فيلارمونياسىنىڭ جەكە ورىنداۋشىلارى ەرجان الىمبەتوۆ (دومبىرا), فەدور ارتامونوۆ (ۆيولونچەل), ب.بايقاداموۆ اتىنداعى مەملەكەتتىك حور كاپەللاسىنىڭ ءارتىسى ينديرا قۇداباەۆا (ۆوكال), STEPPE SONS التەرناتيۆ-فولك توبىنىڭ مۇشەسى مۇراتبەك رامانقۇلوۆ سەكىلدى قازاق مۋزىكانتتارىمەن قاتار, جاپوندىق مۋزىكانتتار يۋميكو فۋرۋحاشي (مورينحۋر), تاكەشي تاكەۋچي (ەلەكترلى باس), تۋزان حيرانو (سياكۋحاچي), اي ياماگۋچي (ۆوكال) دا اتسالىستى.
ارتىستەر بىرىگىپ روكۋسۋكە ەيدىڭ سوزىنە, كومپوزيتور حاتيداي ناكامۋرانىڭ مۋزىكاسىنا جازىلعان جاپوندىق ءانشى كيۋ ساكاموتونىڭ ايگىلى Sukiyaki ءانىن ورىندادى. بۇل ءان ەلۋ جىل بۇرىن شىققان. جاپونيانىڭ وزىندە, بىرنەشە مەملەكەتتىڭ توپ-چارتىندا, سونىڭ ىشىندە امەريكالىق Billboard hot 100 چارتىندا ءبىرىنشى ورىنداردى يەمدەنگەن. سونىمەن قاتار مۋزىكانتتار ايگىلى قازاقتىڭ «كوزىڭنىڭ ءمولدىرىن-اي» اتتى حالىق ءانىن ناقىشىنا كەلتىرىپ ورىندادى.
– مەنىڭ ويىمشا, قازاق مۋزىكانتتارىمەن بىرىگىپ جاساعان كومپوزيتسيامىز وتە جىلى ءارى شىنايى شىققان سەكىلدى. بۇل شىعارماشىلىق كوللابوراتسيا كەرەمەت بولدى, مەن جۇمىس قورىتىندىسىنا تاڭعالىپ وتىرمىن. جوباعا قاتىسقان بارشا مۋزىكانتتارعا جانە جوباعا قاتىسۋعا شاقىرعان سەرىك نۇرمولداەۆقا العىسىمىز شەكسىز! – دەپ جازدى ءوزىنىڭ جەكە پاراقشاسىندا جوباعا قاتىسۋشىلاردىڭ ءبىرى يۋميكو فۋرۋحاشي.
جوبا مۋزىكانتتاردىڭ كومپوزيتسياعا قازاق جانە جاپون حالىقتارىنىڭ كونە مۋزىكالىق اسپاپتارىن پايدالانۋىمەن جانە اندەردىڭ تۇپنۇسقاداعى تىلدە ورىندالۋىمەن ەرەكشەلەنگەن. بەينەروليكتە ەكى مەملەكەتتىڭ ايرىقشا تابيعاتى مەن كونە سالت-داستۇرلەرى كورسەتىلدى.
