قالالىق دەنساۋلىق باسقارماسى باسشىسىنىڭ ايتۋىنشا, اۋرۋحاناعا جاتقىزىلعاندار سانى ءوسىپ كەلەدى. ەگەر ءبىر اي بۇرىن بۇل تاۋلىگىنە 40-70 ناۋقاس بولسا, بۇگىندە جۇقپالى اۋرۋلار اۋرۋحاناسىندا ەمدەلۋدى قاجەت ەتكەن كوروناۆيرۋسپەن اۋىراتىن ناۋقاستاردىڭ سانى 400 ادامعا جەتەدى.
«كوپتەگەن ناۋقاستار ۇيدە ەمدەلىپ جاتىر. قازىردىڭ وزىندە 7 361 ناۋقاس باقىلاۋدا. تەلەمەديتسينا ورتالىعىنىڭ شتاتىن قوسىمشا مامانداردى تارتا وتىرىپ, ناۋقاستارعا قاشىقتان كەڭەس بەرەتىن 84 قىزمەتكەرگە دەيىن كوبەيتۋگە تۋرا كەلدى», دەدى ن. تابىنباەۆ.
قدب باسشىسى ءبىرىنشى مىندەت ءولىم جاعدايىنىڭ كوبەيۋىنە جول بەرمەۋ ەكەنىن ايتتى.
«الماتىدا جەدەل جاردەم شاقىرۋلارىنىڭ تاۋلىكتىك سانى 2 700-گە جەتتى. شىلدە ايىندا جرۆي, كۆي جانە پنەۆمونيامەن شاقىرۋلاردىڭ ۇلەسى 2 ەسە ارتتى. تاۋەكەل توبىندا ءالى دە سوزىلمالى اۋرۋلارمەن اۋىراتىن ادامدار بار», دەدى سپيكەر.
ن. تابىنباەۆتىڭ ايتۋىنشا, جاڭا «دەلتا» شتامى اسىرەسە, جاستارعا قاۋىپتى. الماتىدا 40 جاسقا دەيىنگى 2 ادام كوروناۆيرۋستان قايتىس بولدى.
«كوروناۆيرۋستىڭ جاڭا شتامىن جۇقتىرعان ناۋقاستاردىڭ جاعدايى التى ساعات ىشىندە ناشارلاۋدا», دەپ تولىقتىردى قدب باسشىسى.
ەسكە سالساق, كۆي تارالۋىنا قارسى تۇرۋدىڭ جالعىز جولى ۆاكتسينا الۋ. ن. تابىنباەۆ الماتىلىقتاردى ءوز دەنساۋلىعى مەن جاقىندارىنىڭ دەنساۋلىعىن ساقتاۋ ءۇشىن بەلسەندى ۆاكتسينالاۋعا شاقىرادى.
الماتىدا ەكپە پۋنكتتەرىنىڭ كەڭ جەلىسى اشىلدى. كۇن سايىن 15-20 مىڭعا دەيىن ەكپە الۋعا مۇمكىندىك بار. 26 شىلدەدەگى جاعداي بويىنشا ۆاكتسينانىڭ 1-ءشى كومپونەنتىنىڭ 768 545 دوزاسى جانە 2-ءشى كومپونەنتىنىڭ 499 185 دوزاسى الىندى.
