ىشكى ىستەر مينيسترلىگى مەملەكەت باسشىسىنىڭ تاپسىرماسى بويىنشا پتسر انىقتاماسى مەن ۆاكتسيناتسيا پاسپورتىن قولدان جاساۋ جانە پايدالانۋ فاكتىلەرىن انىقتاۋ جانە جولىن كەسۋ بويىنشا جۇمىس ىستەپ جاتىر.
جىل باسىنان بەرى ىشكى ىستەر ورگاندارى جالعان پتسر-تەستىن ساتۋ جانە پايدالانۋ بويىنشا – 45 قىلمىستىق ءىس , ۆاكتسيناتسيا پاسپورتتارىن ساتۋ جانە پايدالانۋ بويىنشا 35 قىلمىستىق ءىس قوزعادى. اۋەجاي مەن تەمىر جول ۆوكزالدارىندا ازاماتتاردىڭ كوۆيد-مارتەبەسىن «Ashyq» قوسىمشاسى ارقىلى تەكسەرۋ, سونىمەن قاتار پتسر-تەست انىقتاماسى, ۆاكتسيناتسيا پاسپورتىنىڭ شىنايىلىعىنا تەكسەرۋ كۇشەيتىلدى.
كولىكتەگى پوليتسيا دەپارتامەنتىنىڭ باستىعى وڭال بەكەەۆتىڭ ايتۋىنشا, الماتى قالاسىنداعى حالىقارالىق اۋەجايدا كولىك پوليتسەيلەرى اۋەجاي قىزمەتكەرلەرىمەن بىرلەسىپ, پتسر-انىقتامالار مەن بيلەتتەردى بەيتانىس ادامنان ساتىپ العان جىگىت پەن قىزدى انىقتادى. ولار تۇركياعا دەمالىسقا بارا جاتقان. سونداي-اق جالعان پتسر-تەست انىقتاماسىن الىپ, بەلارۋس رەسپۋبليكاسىنا ۇشپاق بولعان شىمكەنت قالاسىنىڭ تۇرعىنى دا ۇستالعان.
«ولار ۇشۋعا جىبەرىلگەن جوق. وسى اتالعان فاكتىلەر بويىنشا قر قىلمىستىق كودەكسى 385-بابىنىڭ 3-بولىگىمەن (كورنەۋ جالعان قۇجاتتى پايدالانۋ) بويىنشا سوتقا دەيىنگى تەرگەپ-تەكسەرۋ باستالدى», دەدى و.بەكەەۆ.
ايتا كەتەيىك, جالعان قۇجات دايىنداعانى ءۇشىن ءتورت جىلعا دەينگى باس بوستاندىعىنان ايىرۋ تۇرىندەگى قىلمىستىق جاۋاپكەرشىلىك كوزدەلگەن. ونى پايدالانعاندار ءۇشىن 40 تاۋلىككە دەيىن قاماققا الۋ تۇرىندەگى جازا بار.
