قازاقستان پرەزيدەنتى قاسىم-جومارت توقاەۆ قازاقستان حالقىنا جولداۋىندا بەس جىل ىشىندە ەلىمىزدى اۋقىمدى كوگالداندىرۋ مىندەتىن قويعان بولاتىن. تاپسىرما اياسىندا 2 ملرد اعاش ەگۋ جوسپارلانعان. ول ءۇشىن بارلىق وبلىس جانە مينيسترلىكتىڭ ۆەدومستۆولىق باعىنىستى مەكەمەلەرىندە ورماندى كوبەيتۋ مەن ءوسىرۋدىڭ بەس جىلدىق كەشەندى جوسپارى بەكىتىلدى. مەكەمەلەردىڭ ءىس-قيمىلىن ۇيلەستىرۋ جونىندەگى شتاب قۇرىلدى. كەشەندى جوسپاردى جۇزەگە اسىرۋ ءۇشىن الداعى بەس جىل ىشىندە رەسپۋبليكالىق بيۋدجەتتەن 22 ملرد تەڭگە, جەرگىلىكتى بيۋدجەتتەردەن 60 ملرد تەڭگە بولىنگەلى وتىر.
تاپسىرما اياسىندا 2 ملرد اعاشتىڭ 1 455,7 ملن ءتۇبىن – اكىمدىكتەر, 294,3 ميلليونىن – ورمان پايدالانۋشىلار مەن حالىقارالىق دونورلار, 250 ميلليونىن ەكولوگيا, گەولوگيا جانە تابيعي رەسۋرستار مينيسترلىگىنىڭ ۆەدومستۆولىق باعىنىستى ۇيىمدارى وتىرعىزادى. سولاردىڭ ءبىرى – ورمان شارۋاشىلىعى جانە جانۋارلار دۇنيەسى كوميتەتىنىڭ «رەسپۋبليكالىق ورمان سەلەكتسيالىق تۇقىم ءوسىرۋ ورتالىعى» رمقك «سولتۇستىك ايماق» فيليالى.
فيليال زەرتحاناسىندا التى ەكولوگ جۇمىس ىستەيدى. زەرتحانا ءبولىمىنىڭ باسشىسى ۆالەنتينا الەەۆانىڭ ايتۋىنشا, جىل سايىن ون مىڭ كوشەت ورمانعا وتىرعىزۋ ءۇشىن دايىندالادى. بۇل جۇمىس ءتورت كەزەڭنەن تۇرادى.
«ەڭ الدىمەن ءبىر جىلدىق وسكىندەردى كەسىپ الىپ, 2-3 سانتيمەترگە بولەمىز. ول ءۇش ءتۇرلى زالالسىزداندىرۋدان وتەدى. كەيىن ءبولىپ قورەكتىك ورتاعا وتىرعىزامىز. ونىڭ قۇرامى ءار وسىمدىك ءۇشىن ءارتۇرلى بولادى. لامينار-بوكستا فوتوكەزەڭنەن وتەدى. اي بويى قالاي ءوسىپ جاتقانىن باقىلاپ وتىرامىز. وسە باستاعاندا باسقا ورتاعا كوشىرەمىز. تاعى ءبىر اي بويى باقىلانادى. سودان كەيىن ودان 5-6 وسكىن الا الامىز. كەلەسى كەزەڭ – تامىرى جەتىلە باستاعان وسىمدىكتى شىمتەزەك تابلەتكاسىنا وتىرعىزىپ, جىلىجايعا كوشىرۋ. ەكى اپتادان سوڭ پوليگون جاعدايىنا ىڭعايلايمىز. بۇل جەردە كوشەتتەر جەرگىلىكتى اۋا رايىنا بەيىمدەلەدى. دايىن بولعان سوڭ كەلىسىمشارت بويىنشا ەلىمىزدىڭ ءار وڭىرىنە الىپ كەتەدى. جىلىنا وسىلاي ون مىڭ ءتۇپتى باپتايمىز», دەيدى زەرتحانا باسشىسى. وسىلايشا, ءار تۇقىمنىڭ دايىن كوشەتكە اينالۋ پروتسەسى 8-9 ايعا سوزىلادى.
جالپى, جوبا باستالعالى بەرى 81,5 ملن اعاش وتىرعىزىلعان. كۇزدە تاعى 48,2 ملن ءتۇپ اعاش وتىرعىزۋ جوسپارلانىپ وتىر. ونىڭ ىشىندە سەكسەۋىلدىڭ ۇلەسى باسىم.
«قىزىلوردا وبلىسى قازالى اۋدانىنداعى فيليالىمىز جىل سايىن 1 ملن-عا جۋىق سەكسەۋىل كوشەتىن دايىنداپ, ارال تەڭىزىنىڭ تارتىلىپ قالعان تابانىنا ەگىپ جاتىر. سەبەبى سەكسەۋىلدىڭ ەكولوگيا جۇيەسىندە الار ورنى وتە ۇلكەن. ونىڭ ءبىر عانا ءتۇبى ءتورت توننا تۇزدى ۇستاپ تۇرادى. سوندىقتان سەكسەۋىل وسكەن جەردە باسقا شوپتەر دە شىعا باستايدى. بۇل ەلىمىزدەگى جەمشوپ ماسەلەسىن شەشۋگە دە وڭ ىقپال ەتەدى», دەيدى «رەسپۋبليكالىق ورمان سەلەكتسيالىق تۇقىم ءوسىرۋ ورتالىعى» رمقك باس ديرەكتورى ءالىبي عازيز.
قازىرگى ۋاقىتتا ەلىمىزدەگى ورمان قورىنىڭ جالپى الاڭى 12 ملن گەكتار جەردى الىپ جاتىر. بۇل قازاقستان اۋماعىنىڭ 4,8%-ىن قۇرايدى. ولار قىزىلوردا, جامبىل, شىعىس قازاقستان جانە الماتى وبلىستارىندا شوعىرلانعان. ەندى شامامەن 610 مىڭ ءتۇپ سەكسەۋىل, 555 مىڭنان استام قاراعاي, 193 مىڭنان استام ۇيەڭكى, 132 مىڭنان استام شەگىرشىن, 100 مىڭنان استام قايىڭ جانە باسقا دا اعاش تۇرلەرىن وتىرعىزۋ جوسپاردا بار. مينيسترلىك وكىلىنىڭ حابارلاۋىنشا, اعاش وتىرعىزۋ كولەمى 2021 جىلعى 129,7 ملن-نان 2025 جىلى 642,8 ملن-عا دەيىن ۇلعاياتىن بولادى.
تاپسىرما ورىندالىپ, 2 ملرد اعاش وتىرعىزىلعان كەزدە ەلىمىزدەگى ورمان كورسەتكىشى 5%-عا جەتەدى.
