سپورت • 25 شىلدە، 2021

جاڭا تۋرنيردەگى جورىقتار باستالدى

36 رەت كورسەتىلدى

وتكەن بەيسەنبى ءتۇنى قازاقستاندىق فۋتبول كوماندالارى ۋەفا 2018 جىلى نەگىزىن قالاپ، بىراق بيىلدان باستاپ ۇيىمداستىرىلعان سۋ جاڭا كونفەرەنتسيالار ليگاسى ءتۋرنيرىن ەكىنشى ىرىكتەۋ كەزەڭىنەن باستادى. قازاقستان چەمپيوناتىنىڭ بىلتىرعى كۇمىس جۇلدەگەرى قوستانايدىڭ «توبىلى» سىرت الاڭدا حورۆاتيانىڭ «حايدۋك» كلۋبىمەن، قولا جۇلدەگەر ەلوردانىڭ «استاناسى» نۇر-سۇلتاندا گرەكيانىڭ «اريسىمەن» جانە قپل-ءدىڭ ءتورتىنشى ورىن يەگەرى قاراعاندىنىڭ «شاحتەرى» رۋمىنيانىڭ فكسب (ستياۋا) كومانداسىمەن كەزدەستى.

«اريستەن» ايلاسىن اسىردى

جاڭا ءتۋرنيردىڭ شىمىلدىعىن قازاقستاندىق كلۋبتاردان ءبىرىنشى بولىپ «استانا» كلۋبى اشىپ بەردى. ەلورداداعى «استانا ارەنا» ستاديونىندا وتكەن ويىن­دا جەرلەستەرىمىز گرەكيا بىرىنشىلىگىنىڭ بىلتىرعى ماۋسىمىندا ءۇشىنشى ورىن العان «اريس» كلۋبىن قابىلدادى. 100 جىلدان اسا تاريحى بار گرەكيالىق ۇجىمدى ەۋروكۋبوك باسەكەلەرىندەگى تاجىريبەلى كوماندالاردىڭ قاتارىنا قوسۋ قيىن. ويتكەنى بۇل كلۋب اراعا 40 جىل سالىپ گرەكيا بىرىنشىلىگىندە جۇلدەگەرلەر قاتارىنا قوسىلدى. ياعني، ولار كەم دەگەندە وسىنشا ۋاقىت ەۋروپا جاسىل الاڭدارىنداعى ماڭىزدى ءىرى دودالاردا باق سىناماعان.

«استانا» مەن «اريس» اراسىنداعى ويىن ءا دەگەننەن تارتىستى باستالدى دەپ ايتا المايمىز. ەلوردالىق فۋتبولشىلار ەۋروكۋبوك باسەكەلەرىندەگى العاشقى ويىنىن جانكۇيەرسىز وتكىزگەننەن كەيىن بە، الدە قارسىلاستارىن باعالاماي شىقتى ما ەكەن، ايتەۋىر وتە سۇرەڭسىز ويىن كورسەتتى. ءبىرىنشى تايمنىڭ العاشقى مينۋتتارىندا قارسىلاستار «استانا ارەناداعى» جاساندى الاڭعا ۇيرەنىسە الماي، ءبىراز ابىگەرگە ءتۇستى. بۇل – ەلورداعا كەلگەن كەز كەلگەن كلۋبتىڭ باسىنان وتەتىن جاعداي. ء«اريستىڭ» الاڭعا بوي ۇيرەتە الماي جۇرگەنىن بايقاعان «استانا» ويىنشىلارى دەر كەزىندە ەسەپتى اشىپ، باسىمدىقتى ءوز قولدارىنا الۋعا تىرىستى. ءسويتىپ 25-مينۋتتا تيگران بارسەگيان قارسىلاستىڭ ايىپ الاڭىنا دوپپەن ەركىن كىرىپ، ارىپتەسى مارين توماسوۆقا پاس شىعاردى. ەلوردالىق كلۋبتىڭ سۇرمەرگەنى بىردەن سوققى جاساپ، ەسەپ اشتى. ءبىرىنشى تايمدا «اريس» كومانداسىندا دا گول سوعىپ، تارازى باسىن تەڭەستىرەتىن مۇمكىندىك بولدى. الايدا ونىڭ بىردە-ءبىرىن ءتيىمدى پايدالانا المادى. ايتپەسە گرەكيالىق فۋتبولشىلار العاشقى 45 مينۋتتا «استانا» قاقپاسىنا ءۇش سوققى جاساپ، ونىڭ ەكەۋىن قاقپاعا ءدال باعىتتادى.

ەكىنشى تايمدا دا ءبىرىنشى تايمنىڭ ستسەناريى قايتالاندى. ياعني ەكىنشى كەزەڭنىڭ العاشقى مينۋتتارى ويىننىڭ ءبىرىنشى ءبولىمى سياقتى تەڭ جاعدايدا ءوتتى. ال 71-مينۋتتا مارين توماسوۆ ءدۋبلدىڭ اۆتورى اتانىپ، كومانداسىنىڭ ەسەپتەگى باسىمدىعىن ودان ءارى نىعايتا ءتۇستى. ابزال بەيسەبەكوۆتىڭ الىستان اۋەلەتە اسىرعان پاسىنا ءبىرىنشى جەتكەن مارين توماسوۆ بۇل جولى باسپەن تاماشا گول سالدى. ەكىنشى گولدان كەيىن «اريس» باس باپكەرى الاڭعا قوسالقى قۇرامداعى تىڭ ويىنشىلارىن شىعارىپ، تاكتيكالىق وزگەرىس جاساپ، قارىمتا ماتچ الدىندا ءبىر گول سوعىپ الۋدى كوزدەگەن ەدى. الايدا گرەكيالىقتار الاڭعا بەس جاڭا ويىنشى شىعارسا دا، «استانا» قورعاۋشىلارى ولارعا ءبىر گول سوعۋعا دا مۇمكىندىك بەرمەدى. ءتىپتى ويىننىڭ 76-مينۋتىندا لۋكا شيمۋنوۆيچ ويىن ءتارتىبىن بۇزىپ، تورەشى وعان ەكىنشى سارى قاعازىن كورسەتتى. ءسويتىپ ەكى سارى قاعازى قىزىل قاعازعا اينالىپ، قورعاۋشى الاڭنان قۋىلدى. 15 مينۋت بويى ءبىر فۋتبولشىعا كەم ويناعان «استانا» ءبارىبىر قارسىلاستارىنا گول سوعۋ بىلاي تۇرسىن، ايىپ الاڭىنا ەنۋگە دە مۇمكىندىك بەرمەدى. قورىتىندى ەسەپ – 2:0. ەندى قارىمتا كەزدەسۋ الداعى بەيسەنبى، ياعني 29 شىلدەدە گرەكيانىڭ سولونيكي قالاسىندا وتەدى.

جەتى جىلدان كەيىن ورالدى

قاراعاندىنىڭ «شاحتەرى» اراعا جەتى جىل سالىپ ەۋروكۋبوك باسەكەلەرىنە قايتا ورالدى. ەڭ سوڭعى رەت ەۋروپا ليگاسىنىڭ 2014/15 جىلعى ماۋسىمىنىڭ ىرىكتەۋ كەزەڭىنە قاتىسقان «كەنشىلەر» كومانداسى جارىستى ءۇشىنشى اينالىمنان اياقتاعان بولاتىن. العاشقى ەكى ىرىكتەۋ باسەكەسىندە ارمەنيانىڭ «شيراك» كومانداسىن 6:1 ەسەبىمەن جەڭسە، كەيىن ليتۆانىڭ «اتلانتاس» ۇجىمىنان 3:0 ناتيجەسىمەن باسىم ءتۇسىپ، ءۇشىنشى ماتچتا حورۆاتيانىڭ «حايدۋك» كلۋبىنان 5:4 ەسەبىمەن جەڭىلىپ، جارىستى اياقتاعان ەدى.

كەزىندە ەۋروپانى ءدۇر سىلكىندىرگەن قاراعاندىنىڭ «شاحتەرى» سول جەتىستىگىن قايتالاۋ ءۇشىن، رەتى كەلىپ جاتسا ودان دا جوعارى ناتيجەگە قول جەتكىزۋ ماقساتىندا بيىلعى ەۋرودودا بار ونەرىن سالماقشى. بىلتىرعى ەل چەمپيوناتىنىڭ ءتورتىنشى ورىن يەگەرى كونفەرەنتسيالار ليگاسىنداعى العاشقى ويىنىن سىرت الاڭدا رۋمىنيا فۋتبولىنىڭ تاريحىنداعى ەڭ داڭقتى كلۋب «ستياۋامەن» كەزدەستى. بۋحارەستتىڭ كومانداسى ەل بىرىنشىلىگىنىڭ بىلتىرعى ماۋسىمىندا كۇمىس جۇلدەگە قول جەتكىزدى. رۋمىنيا چەمپيونى اتانعان چفر كلۋج كومانداسىنان 9 ۇپايعا قالىپ قويدى.

سونداي-اق «ستياۋا» قازاقستاندىق كوماندالارعا دا، جانكۇيەرلەرگە دە جاقسى تانىس. چەمپيوندار ليگاسىنىڭ 2014/15 جىلعى ىرىكتەۋ كەزەڭىندە اتالعان كوماندا سول كەزدەگى قازاقستان چەمپيونى «اقتوبەمەن» كەزدەسىپ، ەكى ويىن ناتيجەسى بويىنشا 4:3 ەسەبىمەن جەڭىپ كەتكەن ەدى.

بۇل كەزدەسۋ «شاحتەر» ءۇشىن جەتى جىل بۇرىنعى «اقتوبەنىڭ» ەسەسىن قايتاراتىن تاماشا مۇمكىندىك بولاتىن. الايدا سىرت الاڭدا وتكەن العاشقى ويىندا جەرلەستەرىمىز 1:0 ەسەبىمەن جەڭىلىپ قالدى. ويىنداعى جالعىز ءارى جەڭىس گولىن الاڭ يەلەرىنەن 38-مينۋتتا اندرەي كورديا سالدى. ويىن تولىعىمەن «ستياۋا» فۋتبولشىلارىنىڭ باسىمدىعىمەن وتسە دە، قارسىلاستار يگور شاتسكي قورعاعان قاقپاعا نەبارى ءبىر عانا گول سوعا الدى. «شاحتەر» ءۇشىن سىرت الاڭداعى 1:0 ناتيجەسى جامان ەمەس. بەيسەنبى كۇنى قاراعاندىدا وتەتىن ويىندا ەكى گول ايىرماشىلىعىمەن جەڭىسكە جەتەر بولسا، كەلەسى كەزەڭگە جولداما الادى.

«توبىلدىڭ» جاعدايى قيىن

ەۋرودودا باسەكەلەرىنە 2018/19 جىلعى ماۋسىمنان بەرى قاتىسىپ كەلە جاتقان قوستانايدىڭ «توبىلى» ازىرگە ءوز جانكۇيەرلەرىن جارقىن جەڭىسىمەن قۋانتا الماي ءجۇر. 2018 جىلى ەۋروپا ليگاسىنىڭ ەكىنشى ىرىكتەۋ كەزەڭىندە ارمەنيانىڭ «پيۋنيك» كومانداسىنان جەڭىلىپ، جارىستى ەرتە اياقتاسا، بىلتىرعى باسەكەدە بيۋدجەتى «توبىلدان» الدەقايدا تومەن بولعان ليۋكسەمبۋرگتىڭ «جەنەسس» كومانداسىنان ايلاسىن اسىرا المادى.

بيىل قوستانايدىڭ كلۋبى كونفەرەنتسيا ليگاسىندا باق سىناۋعا مۇمكىندىك الدى. قارسىلاسى – حورۆاتيانىڭ بەدەلدى كلۋبتارىنىڭ ءبىرى «حايدۋك». سپليت قالاسىنىڭ كومانداسى ەۋرودودا تۋرنيرلەرىنە تۇراقتى قاتىسىپ جۇرگەن، تاجىريبەلى كوماندا سانالادى. حورۆاتيا چەمپيوناتىندا «دينامو-زاگرەب»، «ريەكا» جانە «وسيەك» كلۋبتارىنان كەيىنگى ءتورتىنشى ورىنعا جايعاستى. جۇلدەلى ءۇشىنشى ورىنعا بارجوعى ءبىر ۇپاي جەتپەي قالدى.

حورۆاتيادا وتكەن العاشقى ويىندا «توبىل» تاجىريبەلى قارسىلاسىنان 2:0 ەسەبىمەن جەڭىلىپ قالدى. ءبىرىنشى تايمنىڭ 21-مينۋتىندا ەسەپتى اشقان 19 جاستاعى شابۋىلشى مارين ليۋبيچيچ ەكىنشى تايمنىڭ 53-مينۋتىندا ءدۋبلدىڭ اۆتورى اتانىپ، كومانداسىنا ماڭىزدى جەڭىستى سىيلادى. قۇرامىندا ازات نۇرعاليەۆ، اسحات تاعىبەرگەن، سەرىكجان مۇجىقوۆ، الەك­ساندر موكين، زوران توشيچ سەكىلدى ۇزدىك فۋتبولشىلارى بار قوستانايدىڭ كلۋبى سىرت الاڭدا قارسىلاستارىنا قارسى ەشتەڭە ىستەي المادى. بالكىم، قارىمتا كەزدەسۋدە مىنەز كورسەتىپ قالار.

جوعارىداعى ەكى كومانداعا قاراعاندا، «توبىلدىڭ» كەلەسى كەزەڭگە شىعۋ مۇمكىندىگى ازىرشە وتە تومەن بولىپ تۇر. ەندى قوستانايلىقتارعا ءوز الاڭىندا وتەتىن ماتچتا كەم دەگەندە ءۇش گول سوعىپ، وزدەرى قاقپاسىنا ءبىر دە ءبىر گول وتكىزبەۋ كەرەك بولادى. 29 شىلدەدە وتەتىن قارىمتا كەزدەسۋدە «توبىل» ويىنشىلارى ەرلىك جاساي الا ما؟

سوڭعى جاڭالىقتار

ەڭبەكپەن ەسەيگەن ەر

قازاقستان • كەشە

بەيتانىس ساعىنىش

الەم • كەشە

جالعىزدىق ارالى

كينو • كەشە

ەلوردادا قار جاۋادى

قازاقستان • كەشە

بۇگىن ماشينا جاساۋ كۇنى

قازاقستان • كەشە

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار