كوروناۆيرۋس • 24 شىلدە، 2021

ج. بەكشين الماتىدا كارانتيننىڭ نەلىكتەن كۇشەيتىلگەنىن ءتۇسىندىردى

الماتى حالقىنىڭ يممۋندىق قابات جەتكىلىكتى مولشەردە قالىپتاسقان جوق. بۇگىندە ول 40%-دى قۇرايدى. ۆاكتسينا قارقىنىنىڭ جەتكىلىكسىزدىگى جانە ناۋقاستار سانىنىڭ ارتۋى سالدارىنان قالادا كارانتيندىك شارالار كۇشەيتىلدى. الماتى قالاسىنىڭ باس سانيتارلىق دارىگەرى جانداربەك بەكشين وڭىرلىك كوممۋنيكاتسيالار قىزمەتىندە وتكەن شۇعىل بريفينگتە اتالعان شەكتەۋلەردىڭ نەدەن تۋىنداعانىن ءتۇسىندىردى، دەپ حابارلايدى Egemen.kz.

ايناش ەسالى

جانداربەك بەكشيننىڭ ايتۋىنشا، الماتى قالاسىندا كۆي بويىنشا ەپيدەميولوگيالىق جاعداي كۇرت ناشارلاعان. وتكەن تاۋلىكتە مەگاپوليستە 1 080 ادۆم ىندەت جۇقتىرعان.

«مۇنداي ءوسىم دەنساۋلىق ساقتاۋ جۇيەسىنە، مەديتسينا قىزمەتكەرلەرىنە قيىندىق تۋدىرادى. ويتكەنى يممۋندىق قابات ءالى دە جەتىلمەگەن. قالاداعى جاعدايدى تۇراقتاندىرۋ ءۇشىن بىزگە حالىقتىڭ 70% ۆاكتسينا الۋ قاجەت. بۇگىندە بىزدەگى مالىمەت بويىنشا يممۋندىق قابات 40%-دى قۇرايدى. كوروناۆيرۋستىڭ تارالۋى يممۋندالماعان جانە اۋىرماعان ازاماتتار اراسىندا ءجۇرىپ جاتىر»، دەدى ج. بەكشين.

الماتىنىڭ باس سانيتارلىق دارىگەرى ۆيرۋس جۇقتىرعانداردىڭ ءوسۋى «دەلتا» كوروناۆيرۋس نۇسقاسىنىڭ تارالۋىنان دەدى. بۇل شتامم وتە جۇقپالى ءارى اۋىر كلينيكالىق كورىنىستەردى تۋدىرادى.

«سوڭعى اپتادا «سيمپتومدىق» ناۋقاستاردىڭ ۇلەس سالماعىنىڭ 88%-دان 90%-عا دەيىن ءوسۋى بايقالدى. كۆي اۋرۋشاڭدىعى 1،4 ەسە ءوستى، تاۋلىكتىك ءوسىم 1%-دان استى. بۇل اسا قاتاڭ شەكتەۋ شارالارىن ەنگىزۋدى تالاپ ەتەتىن قوعامدا كۆي تارالۋىنىڭ ءوسۋ قارقىنىن كورسەتەدى»، دەدى ج. بەكشين.

بريفينگ بارىسىندا مەگاپوليستىڭ باس سانيتارلىق دارىگەرى الماتىلىقتاردى ەكپە الۋعا شاقىردى. سەبەبى ەكپەلەردىڭ تيىمدىلىگى 90%-دان اسادى.

ء«بىز قايتادان اۋىرعان ازاماتتارعا مونيتورينگ جۇرگىزەمىز. بۇگىندە بىزدە ۆاكتسينانىڭ تولىق تسيكلىنان كەيىن 178 ادام اۋىرىپ قالدى. سەبەبى بارلىق ۆاكتسينالار ءجۇز پايىز قورعاۋدى قامتاماسىز ەتپەيدى جانە دەنەنىڭ دە ەرەكشەلىكتەرىن ەسكەرۋ قاجەت. ءبىز اۋىرىپ ساۋىققاندارعا 6 ايدان كەيىن ۆاكتسينادان ءوتۋدى ۇسىنامىز. بۇل يممۋنيتەتتى كۇشەيتەدى»، دەدى ج. بەكشين.

باس سانيتارلىق دارىگەر دەلتا شتامىنىڭ جۇقپالى بولۋى بۇرىن «بريتاندىق» كوروناۆيرۋس شتامىنان الدەقايدا جوعارى ەكەنىن ايتتى.

«ەگەر وتكەن جىلى نەگىزگى «ۋحان» شتامى سيمپتومداردىڭ 50%-نا دەيىن بەرىلسە، «بريتاندىق» شتامم بويىنشا سيمپتومدار 60%-عا دەيىن ءوستى. «دەلتا» بەلگىلەرى 88-90%-دى قۇرايدى. ينفەكتسيالىق ستاتسيونارلاردىڭ جاعدايى كۇردەلى. وسىعان بايلانىستى ءبىز ينفەكتسيانى بولدىرماۋعا مۇمكىندىك بەرەتىن جاڭا قاۋلى قابىلدادىق»، دەپ ءتۇسىندىردى ج. بەكشين.

سانيتارلىق-ەپيدەميولوگيالىق دەپارتامەنت باسشىسى قالا تۇرعىندارىن بەتپەردە رەجيمىن ساقتاۋعا، بۇقارالىق ءىس-شارالارعا قاتىسپاۋعا شاقىردى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز