بۇل جونىندە الەۋمەتتىك مەديتسينالىق ساقتاندىرۋ قورىنىڭ نۇر-سۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ جان-جاقتى مالىمەت بەردى.
«2021 جىلعا ارنالعان ساتىپ الۋ جوسپارى بويىنشا ەلوردادا تۇرعىندارعا مەديتسينالىق كومەك كورسەتۋ ءۇشىن 17,2 ملرد تەڭگە, ونىڭ ىشىندە تەگىن كەپىلدەندىرىلگەن مەديتسينالىق كومەك كولەمى اياسىندا 9,2 ملرد تەڭگە, ال مەديتسينالىق ساقتاندىرۋ پاكەتىندەگى مەديتسينالىق قىزمەتتەرگە 8 ملرد تەڭگە قاراستىرىلعان. قازىرگى ۋاقىتتا قور نۇر-سۇلتان قالاسى بويىنشا 108 مەديتسينالىق قىزمەت جەتكىزۋشىمەن شارت جاسالعان, ونىڭ 71-ءى – جەكەمەنشىك كلينيكالار. جىل وتكەن سايىن تۇرعىن حالىققا مەديتسينالىق قىزمەت كورسەتەتىن جەكەمەنشىك قىزمەت جەتكىزۋشىلەر ۇلەسى ارتۋدا. بۇل پاتسيەنتتىڭ ۇزدىك كلينيكانى تاڭداۋىنا مۇمكىندىك بەرەدى», دەدى ن.قابدىقاپاروۆ.
مىندەتتى الەۋمەتتىك مەديتسينالىق ساقتاندىرۋ جۇيەسى ەنگىزىلگەلى بەرى سۇرانىسقا يە كت, مرت, جوعارى تەحنولوگيالىق مەديتسينالىق قىزمەتتەر, كونسۋلتاتسيالىق-دياگنوستيكالىق قىزمەتتەر, گورموندار, ۆيتاميندەر كورسەتكىشتەرىن انىقتايتىن زەرتحانالىق تەكسەرۋلەر, وڭالتۋ قىزمەتتەرى, بۇرىن ۆاريكوز اۋرۋلارىندا اقىلى تۇردە عانا جاسالاتىن ۋلترادىبىستىق ابلاتسيا, ينەكتسيالىق سكلەروتەراپيا, جۇرەك قان تامىرى اۋرۋلارىن انىقتايتىن كوروناراگرافيالىق زەرتتەۋلەر سەكىلدى مەديتسينالىق كومەكتەردى قازىرگى ۋاقىتتا ءمامس جۇيەسى ەنگىزىلگەلى بارلىق ازامات تەگىن جاساتا الادى. مەديتسينالىق ساقتاندىرۋ اياسىندا كورسەتىلەتىن قۇنى قىمبات مەديتسينالىق قىزمەتتەر: انگيوحيرۋرگيا, وفتالمولوگيا, كارديوحيرۋرگيا, نەيروحيرۋرگيا, تراۆماتولوگيا-ورتوپەديا باعىتىندا پاتسيەنتتەرگە جاسالىپ جاتقان وتالار سانى, سونداي-اق ەكو پروتسەدۋرالار سانى ارتتى.
بۇرىن پاتسيەنتتەرگە 45 سىرقات تۇرلەرى بويىنشا دارىلىك پرەپاراتتار قولجەتىمدى بولسا, قازىر 138 سىرقات تۇرلەرى بويىنشا دارىلىك پرەپاراتتاردى تەگىن الۋعا بولادى. سونداي-اق ءمامس جۇيەسىن ەنگىزگەلى بەرى مەديتسينالىق وڭالتۋ شارالارىن قارجىلاندىرۋ ارتقانىن دا ايتا كەتۋ كەرەك. 2021 جىلى مەديتسينالىق وڭالتۋ شارالارىن قارجىلاندىرۋ 2019 جىلمەن سالىستىرعاندا 7,5 ملرد تەڭگەگە دەيىن وسكەن.
الەۋمەتتىك مەديتسينالىق ساقتاندىرۋ قورىنىڭ نۇر-سۇلتان قالاسى بويىنشا فيليالى 2021 جىلى وڭالتۋ قىزمەتتەرىن كورسەتەتىن 45 مەديتسينا ۇيىمىمەن كەلىسىمشارت جاسادى. ولاردىڭ ىشىندە: جەكەمەنشىك – 20, مەملەكەتتىك – 22, رەسپۋبليكالىق 3 مەديتسينا ۇيىمى بار. جىل باسىنان بەرى ەلوردادا 3,23 ملرد تەڭگەدەن اسا سوماعا (ونىڭ ىشىندە كۇندىزگى ستاتسيونارلاردا – 35 584, تاۋلىكتىك ستاتسيونارلاردا – 131 924) وڭالتۋ قىزمەتتەرى كورسەتىلدى. امبۋلاتوريالىق-ەمحانالىق دەڭگەيدە 204 ملن تەڭگە سوماسىنا 252 001 قىزمەت كورسەتىلدى. كوروناۆيرۋس پاندەمياسى وڭالتۋدىڭ قانشالىقتى ماڭىزدى ەكەنىن جانە بۇل باستاما قانشالىقتى ۋاقىتىلى جۇزەگە اسىرىلعانىن كورسەتتى. دەنساۋلىق ساقتاۋ مينيسترلىگىنىڭ №170 بۇيرىعىمەن بەكىتىلگەن مەديتسينالىق قىزمەت تۇرلەرىنىڭ ءتىزىمى بار. ونى دەنساۋلىق ساقتاۋ مينيسترلىگى مەن قوردىڭ رەسمي سايتىنان قاراۋعا بولادى.
سونىمەن قاتار ن.رىسقالي ۇلى 1 شىلدەدەگى جاعداي بويىنشا نۇر-سۇلتان قالاسى تۇرعىندارىنىڭ 82,5%-ى, ياعني 991 653 ەلوردالىق ساقتاندىرىلعانىن, ال 17,5%-ى, 211 مىڭنان اسا قالا تۇرعىنى ساقتاندىرىلماي, ءمامس جۇيەسىنەن تىس قالىپ وتىرعانىن مالىمدەدى.
«وسى جەردە ايتا كەتۋ كەرەك, ساقتاندىرىلماعان ازاماتتار اراسىندا ۇكىمەت قاۋلىسىنا سايكەس ساقتاندىرۋ تولەمدەرىنەن بوساتىلعان شوب قىزمەتكەرلەرى دە بولۋى مۇمكىن. نۇر-سۇلتان قالاسىندا بارلىعى 33 585 شوب سۋبەكتىسى بار. 2021 جىلدىڭ 1 شىلدەسىندەگى جاعداي بويىنشا, ولاردىڭ ىشىندە 2 853 سۋبەكت اقپاراتتىق جۇيەدە جۇمىسكەرلەر ءتىزىمىن ءالى جاڭارتپاعان. وسىلايشا مۇنداي كاسىپورىن جۇمىسكەرلەرى ءمامس جۇيەسىنەن تىس قالۋى مۇمكىن. سوندىقتان شاعىن جانە ورتا بيزنەس وكىلدەرى ازاماتتاردىڭ جەڭىلدىككە يە ساناتىنا جاتاتىن ءوز جۇمىسكەرلەرى تۋرالى دەرەكتى (جسن) msb.fms.kz سايتىنا ەنگىزۋ قاجەت. شوب جۇمىسكەرلەرى قارىز بولىپ, ارتىنشا ونى جويۋ قاجەتتىگى تۋىنداماس ءۇشىن, ولار تۋرالى دەرەكتى Saqtandyry اقپاراتتىق جۇيەسىنە ەنگىزۋ مەرزىمى 2021 جىلدىڭ
1 قازانىنا دەيىن ۇزارتىلدى», دەدى قور فيليالىنىڭ ديرەكتورى.
نەگىزىنەن, مۇمكىندىگىنە قاراي اي سايىن جارنا تولەپ وتىرعان ءتيىمدى. مىسالى, دەربەس تولەۋشى رەتىندە نەمەسە بىرىڭعاي جيىنتىق تولەم ارقىلى تۇراقتى تۇردە جارنا اۋدارىپ وتىرسا, ءمامس جۇيەسىندەگى مەديتسينالىق قىزمەتتىڭ ءبارى قولجەتىمدى بولادى. ءتىپتى جۇمىسسىز قالسا, رەسمي ورگاندارعا تىركەلگەنى ءجون, بۇل كەزدە 15 سانات توبىنا كىرەدى.
«قىسقاشا تۇسىندىرە كەتسەم, جۇمىس ىستەيتىن ازاماتتارعا جۇمىس بەرۋشى ەڭبەكاقى تولەۋ قورىنان قىزمەتكەر تابىسىنىڭ 2% كولەمىندە اۋدارادى. سونىمەن قاتار جۇمىس بەرۋشى اۋدارىمىنا قوسا, جالدامالى جۇمىسكەرلەردىڭ جالاقىسىنان 2% مولشەرىندە جارنا ۇستاپ قورعا اۋدارادى. بىراق اي سايىن جارنا ۇستالاتىن تابىس كولەمى 10 ەڭ تومەنگى جالاقىدان (نەمەسە 425 مىڭ تەڭگەدەن) اسپاۋى ءتيىس. ياعني اي سايىنعى جارنا مولشەرى 8 500 تەڭگەدەن جوعارى بولماۋى كەرەك. جەكە كاسىپكەرلەر بۇرىنعىشا 1,4 ەڭ تومەنگى جالاقىنىڭ 5%-ىن, ياعني 2 975 تەڭگە تولەيدى. سونىمەن قاتار بىزدە ءوزىن-ءوزى جۇمىسپەن قامتىعاندار دەگەن سانات بار. ولار بۇرىنعىشا 1 ەڭ تومەنگى جالاقىنىڭ 5 پايىزىن, ياعني 2 125 تەڭگە تولەيدى. سەبەبى بيىل ەڭ تومەنگى جالاقى مولشەرى وزگەرگەن جوق. بىرىڭعاي جيىنتىق تولەم تولەۋشى 1 ايلىق ەسەپتىك كورسەتكىش كولەمىندە جارنا اۋدارادى. بيىل اەك مولشەرى وزگەردى. سوندىقتان بۇل سانات ءىرى قالالاردا 2 917 تەڭگە تولەيدى, اۋىلدىق جەرلەردە 0,5 ايلىق ەسەپتىك كورسەتكىش كولەمىندە – 1 458 تەڭگە تولەيدى. قارجىنىڭ 40%-ى – مەديتسينالىق ساقتاندىرۋ قورىنا, 30%-ى – بىرىڭعاي جيناقتاۋشى زەينەتاقى قورىنا, 20%-ى الەۋمەتتىك ساقتاندىرۋ قورىنا اۋدارىلادى, 10% تابىس سالىعى رەتىندە ۇستالادى. ەگەر ازاماتتاردىڭ مارتەبەسى 2021 جىلى ساقتاندىرىلماعان بولىپ شىقسا, الدىڭعى 12 ايدىڭ تولەمدەرىن تەكسەرۋى قاجەت», دەدى ن.قابدىقاپاروۆ.
ەلوردالىقتار 2021 جىل باستالعالى بەرى, ياعني قاڭتار-ماۋسىم ايلارىندا مەديتسينالىق ساقتاندىرۋ ءۇشىن 19,7 ملرد تەڭگە جارنا اۋدارعان, ال ماۋسىم ايىندا ءمامس ءۇشىن 3,5 ملرد تەڭگەدەن اسا جارنا تۇسكەن.
