مانشۇك اۋىلى – ەتەك-جەڭى كەڭ پىشىلگەن ەلدى مەكەن. اۋىل شارۋاشىلىعىنا ارنالعان 25868 گەكتار جەر بار, 12 ۇجىمدىق شارۋاشىلىق جۇمىس ىستەيدى. ءبىر سەرىكتەستىك پەن 5 جەكە كاسىپكەر اۋىلداستارىنا جۇمىس تاۋىپ بەرىپ, ناپاقالارىن ايىرىپ وتىر. اۋىلداعى 955 تۇرعىننىڭ 455-ءى داۋىس بەرمەك.
اۋىل اكىمى بولىپ سايلانۋدان اۋىلدىق وكرۋگتىڭ بۇرىنعى اكىمى عاني يساەۆ ءۇمىتتى. اۋىل اكىمى بولىپ تۇرعان كەزىندە ءبىرشاما شارۋانىڭ باسىن قايىرىپتى. جاس ماماندارعا ارنالعان بەس پاتەرلىك جاتاقحانا, بالاباقشا, اۋىل كلۋبى مەن مەكتەبىن جىلۋمەن قامتاماسىز ەتەتىن قازاندىق سالىنعان. اۋىل مەكتەبى كۇردەلى جوندەۋدەن وتكىزىلگەن. تۇرعىندار قازىر جاساندى جامىلعى جابىلعان فۋتبول الاڭى مەن كەڭ دە جارىق ءدامحانانىڭ يگىلىگىن كورىپ ءجۇر.
پارلامەنت ءماجىلىسىنىڭ دەپۋتاتى, Nur Otan پارتياسى دەپۋتاتتىق فراكتسياسىنىڭ مۇشەسى ءمادي ەلۋباەۆ اۋىل اكىمىنە ۇمىتكەرمەن كەزدەسىپ, بىرنەشە الەۋمەتتىك-تۇرمىستىق نىساندى بىرگە ارالاپ كوردى. جەرگىلىكتى اكىمدى سايلاۋعا بايلانىستى ۇيىمداستىرىلعان جيىنعا قاتىسىپ, ساياسي ناۋقاننىڭ ءمان-ماڭىزىن ءتۇسىندىرىپ بەردى.
كەزدەسۋ بارىسىندا اۋىلداعى شاعىن جانە ورتا كاسىپكەرلىكتى دامىتۋ ماسەلەلەرى ەگجەي-تەگجەيلى ءسوز بولدى. ءماجىلىس دەپۋتاتى الداعى سايلاۋدىڭ ءمانى تۋرالى اۋىل تۇرعىندارىنا تاراتىپ ايتا كەلىپ, Nur Otan پارتياسىنىڭ ەلدىڭ الەۋمەتتىك جاعدايىنىڭ جاقسارۋىنا ايانباي اتسالىسىپ جاتقاندىعىنا توقتالدى. اسىرەسە ەل ەكونوميكاسىنىڭ دامۋىنا ايرىقشا كوڭىل ءبولىنىپ وتىر. جاڭا جۇمىس ورىندارىن اشۋ, جۇمىسشىلاردىڭ ەڭبەكاقىلارىنىڭ تولىمدى بولۋى, باسەكەگە قابىلەتتى وتاندىق ءونىمدى كوبەيتۋ, جاڭا ءوندىرىس ورىندارىن اشۋ ماسەلەلەرى – پارتيا العا قويعان مىندەتتەر. جەتەكشى پارتيانىڭ دەمەۋىمەن اركىمنىڭ مۇمكىندىگىنە وراي الدىنان اق جول اشىلىپ, كەڭىستىگى كەڭەيەتىندىگى تىلگە تيەك ەتىلدى. سودان كەيىن اۋىل اكىمدىگىنەن ۇمىتكەر عاني قۋانتاي ۇلى سايلاۋالدى باعدارلاماسىمەن تانىستىردى.
اۋىل تۇرعىندارى ءوز تاڭداۋىن جاساۋعا ىقىلاستى. ولار تۋىپ-وسكەن ەلدى مەكەندەرىنىڭ الداعى تاعدىرىن كىمگە سەنىپ تاپسىراتىنىن ەندى وزدەرى شەشەتىندىگىنە قۋانىشتى.
اقمولا وبلىسى,
تسەلينوگراد اۋدانى
