ونەر • 22 شىلدە، 2021

ءمۇسىنشى الەمى

46 رەت كورسەتىلدى

ادامنىڭ وي-ءورىسى شارتتىلىقتارمەن قالانسا، ودان ۇلى دۇنيە كۇتۋ بوس اۋرە. ءبىز قالامگەر مەن سۋرەتشىنى عانا شىعارماشىل توپتىڭ وكىلى ەسەبىندى ءبىرىنشى قاتارعا قويامىز. نەگىزىندە، بۇل ءتىزىمنىڭ باسىندا عالىم دا، قۇرىلىسشى دا، ينجەنەر دە تۇرۋى قاجەت. سەبەبى ءاربىر ماماندىق يەسى ءوز سالاسىنىڭ الدى بولۋ ءۇشىن قيالىنا يەك سۇيەۋى مىندەت. ايتپەسە تالعامدى شتامپقا سالۋ يدەيانى مانسۇق ەتەدى.

كەنەپ بەتىندە تاعى ءبىر سۇلبا. تاڭسىق ەمەس، تامىرىن با­سىپ كورسەڭىز ونەردەن الشاق جان ەمەستەي. كيىم كيۋ ادەبى، ۇلكەن كوزىلدىرىگى، شالت قيمىلى ءھام ساۋساقتارىنا دەيىن ونىڭ ومىرىنەن حابار بەرىپ تۇرعانداي. پورترەتكە جان بەرگەن سۋرەتشىنىڭ شەبەرلىگىنە سۇقتانا قاراپ، كەيىپ­كەرىنىڭ كىم ەكەنىن اڭداۋعا بولادى. ادامنىڭ ارتىنا قاراپ-اق الدىنداعى جولىن باعدارلاۋ وڭاي. ءبىزدى وسىنداي پىكىرگە جەتەلەگەن كارتينا يەسىنىڭ شەشىمى ءوز ورنىن تاپقانداي كورىنەدى.

ء«مۇسىنشى ە.مەرگەنوۆتىڭ پورترەتى». تۋىندىنىڭ تولىق اتاۋى وسى. كىمنىڭ قولىنان شىققان دەسەڭىز؟ حالىق سۋرەتشىسى لەونيد لەونتەۆتىڭ ەڭبەگى. شەبەردىڭ جە­كە شىعارماشىلىعىنا توقتا­لۋ­دىڭ قاجەتى جوق شىعار، وي­لى وقىرمان وسى ەسىمنىڭ ءوزىن سۋرەت­كەرلىكتىڭ ۇلكەن ۇلگىسى رەتىن­دە قۇرمەتتەيدى.

ۆەرتيكال فورماتتاعى كەنەپ بەتىنە كورەرمەنگە ارقاسىن بەرىپ تۇرعان ءمۇسىنشى بەينەلەن­گەن. ول – قازاقستان بەينەلەۋ ونە­رىنىڭ تاريحى مەن دامۋىنا ءوز قولتاڭباسىن قالدىرعان الپىسىنشى جىلدارى شىققان تالانتتى بۋىن وكىلى. ماسەلە مۇندا ەمەس. پورترەت ناعىز ءمۇسىنشىنىڭ تۇلعاسىن تارتۋ ەتەدى. جەكە تول­عانىستى ۇستەي وتىرىپ، كەلەسى ءبىر الەمنىڭ ەسىگىن اشادى.

سۋرەتشى ءوز كارتيناسىندا بەيداستۇرلى امالدى قولدانادى. مىنە، ەڭ عاجاپ ءسات. قاراڭىزشى، ءمۇسىنشىنىڭ پورترەتىن ارقاسىنان قاراپ جازعان. ەركىن مەرگەنوۆ باسىن جانىنا بۇرىپ تۇر. ءبىز اتاقتى ءمۇسىنشىنىڭ قىرىنان قارا­عانداعى بايسالدى تانىس بەينەسىن كورەمىز. بۇل جەردە كو­لەمنەن گورى تاڭبا باسىم. قارا شاش پەن قوڭىر جەلەتكە جانە اق جەيدە مەن اشىق ءتۇستى شالبار قاراما-قارسىلىق. ءمۇسىنشىنىڭ ومىردەگى قايشىلىقتارى دەسەك بولاتىنداي.

قانداي دا بولسىن كەزدەيسوق ەلەمەنتتەر جازىلماعان. ءبىرتۇستى جازىقتاعى ءمۇسىننىڭ سۇلباسى ەرەكشە كوڭىل اۋدارتادى، وسى ارقىلى ول فوننان ءبولىنىپ تۇر. وتكىر، كەي جەرلەرى جاتىق سۇلبا تىك­سىزىقتى تورلاردىڭ ىشىنە كىر­گىزىلگەن، سودان ءمۇسىنىمىز ازداپ رابايسىز جانە تۇلعالى كورىنەدى.

شىنتۋايتىندا ەركىن مەر­گە­نوۆ ءمۇسىن ونەرىندە وسىنداي دارا بولعان. ول – اۆانگاردشى جانە مودەرنشى، تۋىندىلارى ەشكىمدى دە بەيجاي قالدىرمايدى. بىرەۋ­لەردى ءتانتى ەتىپ تاڭعالدىرسا، ەن­دى بىرەۋلەردى قابىلداي الما­سا دا، بارلىعىنىڭ جادىندا قا­لىپ ونەر جانە ءومىردىڭ ماڭگىلىك قۇن­­دىلىقتارى تۋرالى ويلانۋعا ماجبۇرلەيدى.

 

سوڭعى جاڭالىقتار

بۇۇ-نىڭ جاھاندىق شارتىنا قوسىلدى

ەكونوميكا • بۇگىن، 00:34

جەتى ءتۇرلى ءسوز

ادەبيەت • كەشە

انتىنا ادال ازامات

قازاقستان • كەشە

ەلوردا كۇنىنە تارتۋ

تەاتر • كەشە

ۇقساس جاڭالىقتار