كەلەسى كۇنى وبلىستىق ۆەتەريناريا باسقارماسى دەنيسوۆ اۋدانىنداعى سۆەردلوۆ اۋىلدىق وكرۋگىنە قاراستى پريرەچنىي اۋىلىنداعى مال بورداقىلاۋمەن اينالىساتىن «التاي» سەرىكتەستىگىنە تيەسىلى ءىرى قارالاردان ءسىبىر جاراسىنىڭ قوزدىرعىشى تابىلعانىن مالىمدەدى. ىرگەلى شارۋاشىلىقتىڭ 20 شاقتى مالى قىرىلىپ قالعان سوڭ, 30 ماۋسىمدا ۆەتەرينارلار پتر ادىسىمەن دياگنوستيكالىق زەرتتەۋ جۇرگىزگەن. وبلىستىق سانيتارلىق-ەپيدەميالىق باقىلاۋ دەپارتامەنتىنە قاراستى اسا قاۋىپتى ينفەكتسيالار ءبولىمىنىڭ باستىعى ليۋدميلا نالوبينانىڭ سوزىنشە, ىندەت وشاعىنا دەر كەزىندە اۋرۋدىڭ تارالۋىن بولدىرماۋ شارالارى جاسالىپ, ولەكسەلەردى ارنايى ينسينەراتورلارعا اپارىپ ورتەۋ, مالداردى قامايتىن ورىندار مەن ولەكسەلەر جاتقان جەرلەردى زارارسىزداندىرۋ جۇمىستارى جۇرگىزىلگەن. وبلىس ورتالىعىنداعى ينفەكتسيالىق ستاتسيونارعا تۇسكەن ءۇش ادام ءسىبىر جاراسىن وسى شارالاردىڭ ىشىندە ءجۇرىپ جۇقتىرىپ الۋى دا مۇمكىن.
– ناۋقاستار قازىر ارنايى ەم الىپ جاتىر. بۇل ادامدار پريرەچنىي اۋىلىنداعى جاۋاپكەرشىلىگى شەكتەۋلى سەرىكتەستىگىندە جۇمىس ىستەگەن. ولار ءسىبىر جاراسىن مال باعىپ ءجۇرىپ نەمەسە مال سويىپ, ونى مۇشەلەپ جاتقاندا جۇقتىرۋى مۇمكىن. ەپيدەميولوگتەر مەن ۆەتەرينار دارىگەرلەر ءسىبىر جاراسىنىڭ قوزدىرعىشىن انىقتاپ, ىندەت وشاعىندا ەپيدەميا مەن ەپيزووتياعا قارسى پروفيلاكتيكالىق ءىس-شارالاردى جۇرگىزىپ جاتىر. ىندەت شارپىعان اۋماقتا بولعان ادامدار انىقتالدى, ولاردىڭ ءبارى باكتەرياعا قارسى پروفيلاكتيكالىق ەم الىپ جاتىر. ودان كەيىن ولارعا ءسىبىر جاراسىنا قارسى ۆاكتسينا ەگىلەدى. بۇدان وزگە ىندەت وشاعى انىقتالعان جوق. ادەتتە قاۋىپتى ىندەت ءسىبىر جاراسىنان قىرىلعان مال كومىلگەن جەرلەردەن جۇعادى. وكىنىشكە قاراي, مال باعۋعا تىيىم سالىنعانىنا قاراماستان, تۇرعىندار مۇنداي جەرلەردى جايىلىمعا اينالدىرىپ الاتىن جاعدايلار ءجيى كەزدەسەدى. الايدا بۇل فەرمانىڭ ماڭايىندا ەسكى ءسىبىر جاراسىنىڭ كومىندىلەرى جوق. سوندىقتان ىندەتتىڭ تارالۋىنا كۇننىڭ اپتاپ ىستىعى سەبەپ بولۋى ابدەن مۇمكىن, – دەدى ل.نالوبينا.
ۆەتەرينار مامانداردىڭ بولجامىنشا, جىرتقىش اڭ-قۇستار مەن دالا كەمىرگىشتەرى ءسىبىر جاراسى باتسيلاسىنىڭ سپورالارىن باسقا جاقتان اكەلۋى ابدەن مۇمكىن.
قازىر «التاي» سەرىكتەستىگىنىڭ مەنشىگىندەگى ءتورت مالقورا مەن ونىڭ ماڭايى تولىق زارارسىزداندىرىلىپ, قورانىڭ قابىرعالارى مەن شارباقتارىن, مالعا جەمشوپ بەرەتىن اقىرلاردى اقتاۋ جۇمىستارى اياقتالدى. مۇنىڭ سىرتىندا, ىندەت وشاعىنداعى قورالاردىڭ بارلىعى, مال جايىلاتىن الاڭدار مەن جازعى مال تۇراقتارى, سونداي-اق مال قىرىلعان ورىندار ەكى رەت زارار-
سىزداندىرىلعان.
وبلىستىق ۆەتەريناريا باسقارماسىنىڭ رەسمي مالىمەتى بويىنشا, دەنيسوۆ اۋدانىنىڭ باسقا ەلدى مەكەندەرىندە, جالپى قوستاناي وبلىسىندا ەپيزووتيالىق جاعداي تۇراقتى. 12 شىلدەدەن كەيىن ىندەت وشاعىنىڭ ماڭايىندا مال ءولىمى تىركەلگەن جوق. قازىر ىندەت وشاعى كارانتينگە جابىلدى. ۆاكتسينا ەگىلگەن مالدىڭ ءبارى ۆەتەرينار مامانداردىڭ باقىلاۋىندا. ىندەت تولىق جويىلىپ, قورىتىندى زارارسىزداندىرۋ جۇرگىزىلگەننەن كەيىن 15 كۇن وتكەن سوڭ كارانتين الىنادى.
قوستاناي وبلىسى
