تاۋەلسىزدىك تاريحىنداعى تۇڭعىش تىكەلەي سايلاۋعا دايىندىق بارىسىمەن تانىسۋ ماقساتىندا اۋدانعا ارنايى كەلگەن پارلامەنت ءماجىلىسىنىڭ دەپۋتاتى ەكاتەرينا سمىشلياەۆا بىرقاتار ەلدى مەكەندى ارالاپ, ءوڭىر تۇرعىندارىمەن كەزدەستى.
دەنيسوۆ اۋدانىنداعى تەلمان اۋىلدىق وكرۋگىندە وتەتىن اكىم سايلاۋىنا تۇسكەن ەكى ۇمىتكەردىڭ ءبىرى – Nur Otan پارتياسىنىڭ مۇشەسى, اۋداندىق ءبىلىم ءبولىمى ادىستەمەلىك كابينەتىنىڭ مەڭگەرۋشىسى ارمان دابىلوۆ. ول وسى وڭىردەگى انتونوۆ اۋىلىندا تۋىپ-وسكەن. جوعارى وقۋ ورنىن تامامداعان سوڭ, تۋعان جەرگە ورالىپ, ەڭبەك جولىن مۇعالىمدىكتەن باستاعان.
ءماجىلىس دەپۋتاتى ەكاتەرينا سمىشلياەۆا مەن ارمان دابىلوۆ اۋىلدىق وكرۋگتەگى «اگروفيرما وليمپ» جاۋاپكەرشىلىگى شەكتەۋلى سەرىكتەستىگى ۇجىمىمەن كەزدەستى. مۇندا 70-كە جۋىق ادام جۇمىس ىستەيدى. ەڭبەككەرلەردىڭ كوبى اكىم سايلاۋىنا ءبىرىنشى رەت ءتۇسىپ جاتقان ۇمىتكەردى جاقسى بىلەتىن بولىپ شىقتى. ال ءماجىلىس دەپۋتاتى بيىل اۋىلدىق جەرلەردە العاش رەت وتەيىن دەپ وتىرعان تىكەلەي سايلاۋدىڭ ەلىمىزدىڭ ساياسي ومىرىندەگى ەڭ ەلەۋلى وزگەرىس ەكەنىن, مۇنىڭ اۋىلدى دامىتۋداعى ماڭىزى زور ەكەنىن اڭگىمەلەپ, ۇمىتكەرگە قولداۋ ءبىلدىردى.
كەزدەسۋ بارىسىندا Nur Otan پارتياسىنىڭ سايلاۋالدى باعدارلاماسىنىڭ ىسكە اسىرىلۋ بارىسى تالقىلاندى. سونداي-اق ارمان دابىلوۆ ءوزىنىڭ سايلاۋالدى باعدارلاماسىنىڭ نەگىزگى باعىتتارى تۋرالى ايتىپ بەردى. اۋىل تۇرعىندارىنىڭ تاراپىنان كوپتەگەن تىلەكتەر پەن ۇسىنىس ايتىلدى. دەپۋتات پەن ۇمىتكەرگە ءتۇرلى ساۋالدار قويىپ, تۇشىمدى جاۋاپ العان تۇرعىنداردىڭ دەنى الداعى ماڭىزدى ساياسي ناۋقانعا بەلسەنە قاتىساتىندارىن جەتكىزدى.
قوستاناي وبلىسى
