جازعى اپتاپ ىستىقتا جامبىل وبلىسىندا ءورت سوندىرۋشىلەر مەن قۇتقارۋشىلاردىڭ جۇمىسىنا مۇقتاج ازاماتتار قاتارى ارتا ءتۇستى. كۇن سايىن جەدەل باسقارۋ ورتالىعىنا توتەنشە جاعدايلار تۋرالى 20-دان استام حابارلاما كەلىپ تۇسەدى. بۇل تۋرالى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى.
«ايتالىق, وتكەن تاۋلىكتەردە تالاس اۋدانىنىڭ №12 ءورت ءسوندىرۋ بەكەتىنە تالاس اۋدانىنىڭ تاباقبۇلاق ستانتسياسىنداعى تەپلوۆوزدىڭ ءورتى تۋرالى حابارلاما كەلىپ تۇسكەن. شاقىرۋ ورنىنا ءورت ءسوندىرۋ بەكەتىنىڭ كۇشتەرى مەن قۇرالدارى جىبەرىلدى. ءورت سوندىرۋشىلەردىڭ كاسىبي ءىس-ارەكەتتەرىنىڭ ارقاسىندا ءورت ءبىر ساعات ىشىندە وقشاۋلانىپ, ءبىر جارىم ساعاتتا تولىقتاي سوندىرىلگەن. ءورتتىڭ جالپى اۋدانى 50 شارشى مەتردى قۇرادى. ءورتتىڭ شىعۋ سەبەبى انىقتالۋدا. قازا بولعاندار مەن زارداپ شەككەندەر جوق», دەلىنگەن حابارلامادا.
سول كۇنى الماتى-تاشكەنت تاس جولىندا اۆتوكولىكتىڭ ورتەنگەنى تۋرالى حابارلاما كەلىپ تۇسكەن. وقيعا ورنىنا تاراز قالاسىنىڭ №2 مامانداندىرىلعان ءورت ءسوندىرۋ ءبولىمىنىڭ كۇشتەرى مەن قۇرالدارى دەرەۋ جىبەرىلىپ, ءورتتى ءسوندىرۋ بويىنشا بارلىق قاجەتتى شارالار قابىلدانعان. ءورت ءسوندىرۋشى-قۇتقارۋشىلاردىڭ ءىس-قيمىلدارى ناتيجەسىندە ءتىلسىز جاۋ وقشاۋلانىپ, جويىلعان. ءورتتىڭ شىعۋ سەبەبىن انىقتاۋ بويىنشا شارالار قولعا الىندى. قازا بولعاندار مەن زارداپ شەككەندەر تىركەلمەگەن.
«جامبىل وبلىسى تج دەپارتامەنتى وبلىس جانە قالا تۇرعىندارىنان ءورت نەمەسە توتەنشە جاعداي تۋىنداعان جاعدايدا, ۋاقىت وتكىزبەي شۇعىل تۇردە «101» جانە «112» تەلەفون نومىرلەرىنە قوڭىراۋ شالۋ قاجەتتىگىن ەسكەرتەدى. سونداي-اق شومىلۋ ماۋسىمىندا سۋداعى قاۋىپسىزدىك شارالارىن ۇمىتپاۋدى جانە ءورت قاۋىپسىزدىگى ەرەجەلەرىن قاتاڭ ساقتاۋدى سۇرايدى», دەلىنگەن ۆەدومستۆو حابارلاماسىندا.
