مەملەكەتتىك ساتىپ الۋ پورتالىنا مونيتورينگ جۇرگىزگەن دەپارتامەنت ماماندارى جارتى جىل ىشىندە 580 ملن تەڭگەدەن استام قارجىنى بيۋدجەت قورجىنىنا قايتارىپ بەرگەن. پرەۆەنتسيا جانە پاراساتتىلىق باسقارماسىنىڭ باسشىسى رۇستەم بولاتتىڭ ايتۋىنشا, جىل باسىنان بەرى 174 لوت بويىنشا 100-دەن استام تاپسىرىس بەرۋشىگە ۇسىنىمدار جوعارى باعامەن جىبەرىلىپ وتىرعان.
– بىرىڭعاي ساتىپ الۋ تەرەزەسى پورتالىن مونيتورينگىلەۋ, ەڭ الدىمەن, سىبايلاس جەمقورلىقتىڭ الدىن الۋ جانە دەر كەزىندە ەسكەرتۋ تەتىگى بولىپ سانالادى. سونداي-اق بيۋدجەتتى يگەرۋدىڭ باستاپقى كەزەڭىندە سىبايلاس جەمقورلىق تاۋەكەلدەرىن جويۋعا مۇمكىندىك بەرەدى. بۇل سالىق تولەۋشىلەردىڭ اقشاسىن ۇنەمدەپ قانا قويماي, لاۋازىمدى تۇلعالاردىڭ وسى قاراجاتتى ۇتىمدى جوسپارلاپ, يگەرۋدەگى جاۋاپكەرشىلىگىن ارتتىرۋعا مۇمكىندىك بەرەدى. سوندىقتان وسى باعىتتا جۇمىستى ساپالى جالعاستىرۋ قاجەت, – دەدى وبلىستىق سىبايلاس جەمقورلىققا قارسى دەپارتامەنتتىڭ باسشىسى قۋانىش بەكباسوۆ.
جيىن بارىسىندا مەملەكەت باسشىسىنىڭ 2020 جىلعى 1 قىركۇيەكتەگى جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىن ورىنداۋ بارىسىندا وبلىس بويىنشا 500-دەن استام مەملەكەتتىك مەكەمەدە سىبايلاس جەمقورلىق تاۋەكەلدەرىن انىقتاۋ ماقساتىنداعى ىشكى تالداۋ شارالارى جۇرگىزىلگەنى ايتىلدى. ولاردىڭ ىشىندە قالا جانە اۋدان اكىمدىكتەرى, وبلىستىق باسقارمالار, سونداي-اق اۋىلدار مەن اۋىلدىق وكرۋگ اكىمدەرىنىڭ اپپاراتتارى بار. ناتيجەسىندە, 613 سىبايلاس جەمقورلىق تاۋەكەلى انىقتالىپ, مەملەكەتتىك ورگاندارعا انىقتالعان كەلەڭسىزدىكتى جويۋ تۋرالى 1 مىڭعا جۋىق ۇسىنىمحات جىبەرىلگەن.
– بۇل شارالار سالالىق زاڭداردىڭ كەمشىن تۇستارىن انىقتاۋعا, سونداي-اق مەملەكەتتىك ورگاندار قىزمەتىندەگى ىشكى ولقىلىقتاردى دەر كەزىندە كورە بىلۋگە مۇمكىندىك بەرەدى. سونداي-اق الداعى ۋاقىتتا مەملەكەتتىك ورگاندارداعى سىبايلاس جەمقورلىق تاۋەكەلدەرىنىڭ تۋىنداۋ مۇمكىندىگىن ايتارلىقتاي تومەندەتۋى ءتيىس, – دەدى دەپارتامەنت باسشىسى.
قۋانىش بەكباسوۆ الداعى ۋاقىتتا سىبايلاس جەمقورلىقتىڭ الدىن الۋ, ەسكەرتۋ شارالارىنا باسىمدىق بەرىلەتىنىن اتاپ ءوتتى. دەپارتامەنت باسشىسىنىڭ سوزىنشە, جىل باسىنان بەرى ءتۇرلى دەڭگەيدەگى مەملەكەتتىك ورگاندارعا قىلمىستىڭ جانە باسقا دا قۇقىق بۇزۋشىلىقتاردىڭ سەبەپ-سالدارلارىن جويۋ جونىندە 27 ۇسىنىسحات جىبەرىلگەن. ولاردىڭ بەسەۋى جەكەلەگەن باسشىلارعا قاتىستى ەكەن.
العاشقى جارتىجىلدىقتا اتالعان دەپارتامەنتتىڭ ماماندارى 42 قىلمىستىڭ بەتىن اشقان. ونىڭ 39-ى سىبايلاس جەمقورلىققا قاتىستى قىلمىس سانالادى. بۇل ىستەردى تەرگەۋ بارىسىندا قىلمىسكەرلەردىڭ مەملەكەتكە 707 ملن تەڭگە زيان كەلتىرگەنى انىقتالىپ وتىر.
– بۇگىنگە دەيىن 706 ملن تەڭگە قايتا ءوندىرىلىپ الىندى. 22 ادام قىلمىستىق جاۋاپكەرشىلىككە تارتىلدى. ونىڭ ىشىندە 2 وبلىستىق, 3 قالالىق جانە 2 اۋداندىق دەڭگەيدەگى 7 مەملەكەتتىك مەكەمەنىڭ باسشىسى بار, – دەدى ق.بەكباسوۆ.
قوستاناي وبلىسى
