ءوز ەلىنىڭ قۇقىق قورعاۋ ورگاندارىنان بوي تاسالاپ, قازاق جەرىندە جاسىرىنۋ ءۇشىن مەملەكەتتىك شەكارامىزدى قاساقانا بۇزاتىندار دا بار. ماسەلەن, وبلىستىق پوليتسيا دەپارتامەنتىنىڭ ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى بىلتىرعى قاراشادا گرۋزيانىڭ 35 جاستاعى ازاماتىن ۇستادى. گرۋزيالىق پوليتسەيلەر وعان 2012 جىلدىڭ جەلتوقسان ايىندا الاياقتىق جاساعانى ءۇشىن ىزدەستىرۋ جاريالاعان ەكەن.
الداۋ مەن ارباۋدىڭ سان الۋان ءتۇرىن مەڭگەرگەن الاياق قاماۋعا الۋ تۇرىندەگى بۇلتارتپاۋ شاراسى تاڭدالسا دا قولعا تۇسپەي كەلگەن. سول سەبەپتەن, تبيليسي سوتى ونى 2017 جىلعى مامىردا سىرتتاي 7 جىلعا باس بوستاندىعىنان ايىرعان. ال بيىلعى ساۋىردە جەرگىلىكتى پوليتسيا قىزمەتكەرلەرى «ىزدەۋ» ارنايى وپەراتسياسى كەزىندە تاعى دا شەتەل ازاماتتارىن قۇرىقتادى.
ولاردىڭ ءبىرى – وزبەكستان رەسپۋبليكاسىنىڭ 38 جاستاعى ازاماتى رەسەي فەدەراتسياسى قىلمىستىق كودەكسىنىڭ 160-بابىنىڭ 4-ءبولىمى بويىنشا (اسا ءىرى كولەمدەگى وزگەنىڭ مۇلكىن يەمدەنۋ) حالىقارالىق ىزدەۋدە بولعان. سول ەلدىڭ تاعى ءبىر ازاماتى وزبەكستان رەسپۋبليكاسى قىلمىستىق كودەكسىنىڭ 165-بابىنا سايكەس (بوپسالاۋشىلىق) ىزدەستىرىلگەن.
تاعى دا دەرەككە جۇگىنسەك, ماۋسىمدا وزبەكستان رەسپۋبليكاسىنىڭ ازاماتى اتىراۋ قالاسىندا ۋاقىتشا تۇرۋ ءۇشىن تىركەلمەك بولعان. الايدا كوشى-قون ءبولىمىنىڭ قىزمەتكەرلەرى حالىققا قىزمەت كورسەتۋ ورتالىعىندا ونىڭ قۇجاتىن تەكسەرگەندە حالىقارالىق ىزدەۋدەگى ازامات ەكەنىن انىقتادى. بەلگىلى بولعانداي, وزبەكستاندىق موردوۆيا رەسپۋبليكاسىندا رەسەي فەدەراتسياسى قىلمىستىق كودەكسىنىڭ 291-بابىنىڭ 1-ءبولىمى بويىنشا ايىپتى دەپ تانىلعان. ءبىر جىل بۇرىن رەسەيلىك قۇقىق قورعاۋ ورگاندارى وعان حالىقارالىق ىزدەۋ جاريالاعان.
ىزدەۋدە جۇرگەن شەتەلدىكتەردىڭ ءتىزىمى مۇنىمەن شەكتەلمەي وتىر. اتىراۋ قالالىق پوليتسيا باسقارماسىنىڭ قىزمەتكەرلەرى 15 ماۋسىمدا وزبەكستان رەسپۋبليكاسىنىڭ 1994 جىلعى ازاماتىن دا ۇستادى. وعان 2016 جىلعى 1 قاڭتاردا قاراقالپاقستان رەسپۋبليكاسىنىڭ ىشكى ىستەر مينيسترلىگى قىلمىستىق كودەكستىڭ 223-بابىنىڭ 2-ءبولىمى بويىنشا (شەتەلگە زاڭسىز شىعۋ نەمەسە وزبەكستان رەسپۋبليكاسىنا زاڭسىز كىرۋ) قىلمىس جاساعانى ءۇشىن مەملەكەتارالىق ىزدەۋ جاريالانعانى انىقتالدى.
بۇدان سوڭ رەسەي فەدەراتسياسىنىڭ 45 جاستاعى ازاماتىنىڭ اتىراۋدا جاسىرىنىپ جۇرگەنى بەلگىلى بولدى. بۇل ازامات تا قاشقىن ەكەن. سەبەبى وعان بيىلعى مامىردا سول ەلدىڭ قىلمىستىق كودەكسىنىڭ 157-بابىنىڭ 1-ءبولىمى بويىنشا (اتا-انانىڭ سوت شەشىمى بويىنشا كامەلەتكە تولماعان بالالاردى, سونداي-اق ون سەگىز جاسقا تولعان مۇگەدەك بالالاردى ۇستاۋعا قاراجات تولەۋدەن قاساقانا جالتارۋى) مەملەكەتارالىق ىزدەۋ جاريالانىپتى.
ءوز ەلىنىڭ قۇقىق قورعاۋ ورگاندارىنان جاسىرىنعانى ازداي, ەندى تاۋەلسىز قازاقستاننىڭ مەملەكەتتىك شەكاراسىن قاساقانا بۇزىپ وتكەن شەتەلدىكتەر دە ۇستالا باستادى. جاقىندا اتىراۋلىق پوليتسەيلەر وسىنداي زاڭسىز ارەكەت جاساعان وزبەكستان رەسپۋبليكاسىنىڭ ەكى ازاماتىن انىقتادى. ونىڭ ءبىرى 2015 جىلدان بەرى وزبەكستان رەسپۋبليكاسى قىلمىستىق كودەكسىنىڭ 223-بابىنىڭ 2-ءبولىمى بويىنشا تىركەلگەن قىلمىستىق ءىس بويىنشا زاڭسىز شەكارادان وتكەنى ءۇشىن ىزدەستىرىلۋدە بولعان. قازىر 27 جاستاعى ازاماتشا ۋاقىتشا ۇستاۋ وقشاۋلاعىشىنا قامالدى. ال 30 جاستاعى ەر ادام وسىدان ءبىر جىل بۇرىن قازاقستان رەسپۋبليكاسىنىڭ اۋماعىنان شىعارىلعان. قۋلىعىنا قۇرىق بويلامايتىن ول ەندى اتى-ءجونىن وزگەرتىپ, ەلىمىزدىڭ مەملەكەتتىك شەكاراسىن قاساقانا كەسىپ وتكەن. قازىر وزبەكستاننىڭ ەكى ازاماتىنا قاتىستى قازاقستان رەسپۋبليكاسى قىلمىستىق كودەكسىنىڭ 392-بابى 1-ءبولىمى بويىنشا سوتقا دەيىنگى تەرگەۋ جۇرگىزىلۋدە.
مۇنداي دەرەكتى جالعاستىرا بەرۋگە بولادى. بىراق ءوز ەلىنىڭ قۇقىق قورعاۋ ورگاندارىنان قاشىپ جۇرگەن شەتەلدىكتەر ءبىزدىڭ ەلىمىزگە نەگە ءۇيىر؟ شەكارادان ۇشقان قۇستان باسقانىڭ ءبارىن قالت جىبەرمەيتىن شەكاراشىلاردىڭ قىراعىلىعى قايدا؟ ەلىمىزگە كولىكتىڭ قاي تۇرىمەن جەتسە دە شەتەلدىكتەر جەر استىمەن وتپەگەن شىعار.
– پوليتسيا قىزمەتكەرلەرى وبلىس اۋماعىندا «ميگرانت», «زاڭسىز كەلۋشى – 2021» جەدەل-پروفيلاكتيكالىق ءىس-شارالارى مەن رەيدتىك تەكسەرىستى ءجيى ۇيىمداستىرادى. ماقسات – قۇقىقتىق ءتارتىپتى قامتاماسىز ەتۋ, زاڭسىز كوشى-قونعا قاتىستى قۇقىق بۇزۋشىلىقتار مەن قىلمىستاردى اشكەرەلەۋ, زاڭسىز كوشى-قون ارنالارىن انىقتاۋ. وسىنداي ءىس-شارالاردىڭ ناتيجەسىندە, جىل باسىنان بەرى كوشى-قون زاڭدىلىعىن بۇزعانى ءۇشىن 4991 ادام اكىمشىلىك جاۋاپكەرشىلىككە تارتىلدى. ونىڭ ىشىندە 3110 شەتەل ازاماتى بار. كوشى-قون زاڭدىلىعىن بۇزعان 100 شەتەلدىك سوت شەشىمىمەن ەل اۋماعىنان تىسقارى شىعارىلدى. كوشى-قون زاڭدىلىعىن بۇزعاندارعا 7 029 743 تەڭگە ايىپپۇل سالىنىپ, تولىقتاي ءوندىرىلدى, – دەيدى وبلىستىق پوليتسيا دەپارتامەنتىنىڭ باستىعى پوليتسيا پولكوۆنيگى قامزا ۇمبەتقاليەۆ.
قازاقستان – تاۋەلسىزدىك جىلدارى مەملەكەتتىك شەكاراسى شەگەندەلگەن ەل. دەمەك, ءوز ەلىندە قىلمىس جاساعانى ءۇشىن حالىقارالىق, مەملەكەتارالىق ىزدەۋ جاريالانعان شەتەلدىكتەر شەكارادان اتتاپ باسپاۋعا ءتيىس. الايدا سوڭدارىنا تۇسكەن قۇقىق قورعاۋ ورگاندارىنىڭ قۇرىعىنان قاشقان شەتەلدىكتەر قازاقستانعا كەلۋگە نەگە سونشا قۇمار؟ قىلمىسكەر شەتەلدىكتەردىڭ ءبىزدىڭ ەلدىڭ اۋماعىنا الشاڭداي باسىپ كىرۋىنىڭ استارىندا نە بار؟
اتىراۋ وبلىسى
