ء«بىز تالانتتى جاستارىمىزدىڭ تەك «سلاۆيان بازارى» بايقاۋىندا عانا ەمەس باسقا سايىستاردان جەڭىسپەن كەلىپ جاتقانى تۋرالى ماقتانىشپەن ايتامىز. ارينە, بۇل بايقاۋدىڭ ورنى بولەك. جالپى ونەر بايقاۋلارى بىرنەشە ساناتقا بولىنەدى. سونىڭ ىشىندە «سلاۆيان بازارى» ۇزدىك حالىقارالىق بايقاۋلاردىڭ ءبىرى بولىپ سانالادى. جۋىردا عانا ءبىزدىڭ جاس دومبىراشىلارىمىز ۇلىبريتانيادان جەڭىسپەن ورالدى. سونىمەن قاتار كلاسسيكالىق جانردا ءان ايتاتىن انشىلەرىمىز دە ەلىمىزگە ءتۇرلى بايقاۋلاردان جەڭىس اكەلىپ ءجۇر. وسى ورايدا ەسىمە ءتۇسىپ وتىر, كلاسسيكالىق ءان ورىنداۋ بويىنشا تورەالقالار مەن يتاليانىڭ وپەرا انشىلەرى وپەرا جانرىندا ءان ايتۋدى قازاقستاندا ۇيرەنۋ كەرەك دەگەن-تۇعىن. ولار ءبىزدىڭ ارتىستەردىڭ ونەرىنە تاڭقالىستارىن جاسىرمادى», دەدى ا. رايىمقۇلوۆا ZOOM ارقىلى وتكەن ءباسپاسوز ءماسليحاتىندا.
سونداي-اق مينيستر وتاندىق جاس ونەرپازداردىڭ ءتۇرلى حالىقارالىق جوبالارعا قاتىسىپ, ەلىمىزگە جەڭىسپەن ورالاتىنى قۋانتاتىنىن ايتتى.
«جەڭىسكە جەتۋدە مەملەكەتتىك قولداۋ مەن پەداگوگتەردىڭ تىنىمسىز ەڭبەگىنىڭ ارقاسى. ارينە, يمانبەك سەكىلدى تالانتىن وزدىگىنەن مويىنداتىپ جاتقان ونەرپازداردىڭ بارىن جوققا شىعارمايمىز. ءبىز جاس تالانتتارعا قولداۋ كورسەتۋگە ءاردايىم ءازىرمىز», دەيدى ول.
ايتا كەتسەك, بۇعان دەيىن قر مادەنيەت جانە سپورت ءمينيسترى اقتوتى رايىمقۇلوۆا قازاقستاندىق جاس ءانشى, «سلاۆيان بازارى» حالىقارالىق بايقاۋىنىڭ گران-پري يەگەرى رۋحيا بايدۇكەنوۆانى جەڭىسىمەن قۇتتىقتاعان بولاتىن.
