پرەزيدەنت • 19 شىلدە، 2021

پرەزيدەنت جالعان ۆاكتسينا پاسپورتىن جاساعاندار قاتاڭ جازالاناتىنىن ايتتى

158 رەت كورسەتىلدى

پرەزيدەنت قاسىم-جومارت توقاەۆ ەلدەگى سانيتارلىق-ەپيدەميولوگيالىق احۋال جونىندەگى جۇمىس كەڭەسىندە ۆاكتسيناتسيا پاسپورتتارىن قولدان جاساعاندارعا قاتاڭ جازا قولدانۋدى تاپسىردى، دەپ حابارلايدى Egemen.kz.

«يممۋنداۋ پروتسەسىن تەجەيتىن تاعى ءبىر وزەكتى ماسەلە – جالعان ۆاكتسيناتسيا پاسپورتى. بۇل جاعىمسىز قۇبىلىستىڭ تارالۋىمەن بايلانىستى كەز كەلگەن ارەكەتتى تەز ارادا توقتاتۋ ماڭىزدى. جۇمىس باستالدى، ونى جالعاستىرۋ كەرەك»، دەدى قاسىم-جومارت توقاەۆ.

پرەزيدەنت ىشكى ىستەر مينيسترلىگى جانىنان قوعام وكىلدەرى مەن حالىقتان اقپارات الىپ، وڭدەيتىن ۆەدومستۆوارالىق ارنايى توپ قۇرۋدى تاپسىردى.

«ۆاكتسيناتسيا تولقۇجاتتارىن قولدان جاساۋعا جول بەرگەن ادامدارعا قاتاڭ جازا قولدانۋدى تاپسىرامىن. مەن بۇل ماسەلەنى كەڭەيتىلگەن وتىرىستا كوتەرگەن ەدىم. اڭگىمە ەلدىڭ ۇلتتىق قاۋىپسىزدىگى تۋرالى بولىپ وتىر»، دەدى پرەزيدەنت وتىرىس بارىسىندا.

ەسكە سالساق، پرەزيدەنت قاسىم-جومارت توقاەۆ ەلىمىزدەگى سانيتارلىق-ەپيدەميولوگيالىق احۋال جونىندە جۇمىس كەڭەسىن وتكىزىپ جاتىر.

سوڭعى جاڭالىقتار

ۇقساس جاڭالىقتار