كوروناۆيرۋس • 19 شىلدە، 2021

الماتىدا «قىزىل» مارتەبەسى بار 65 ادامعا ايىپپۇل سالىندى

64 رەت كورسەتىلدى

وكىنىشكە وراي، الماتىداعى ەپيدەميالىق احۋال ۋشىعىپ بارادى. بۇل ۆاكتسينالانباعاندار مەن بۇرىن اۋىرماعانداردىڭ دەلتا شتامىن جۇقتىرۋىنان تۋىنداپ جاتقان جاعداي. كۆي-ءدىڭ ودان ءارى تارالۋىن بولدىرماۋ جونىندەگى قالالىق شتاب وتىرىسىندا احۋالدى تۇراقتاندىرۋ شارالارى قارالدى، دەپ حابارلايدى Egemen.kz.

قالانىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتى بويىنشا، بيىل الماتىدا 65 878 ادام ىندەت جۇقتىرعان. وتكەن 2 اپتادا بۇرىڭعى 2 اپتامەن سالىستىرعاندا كۆي دەرتى 2،6 ەسەگە ارتقان، تاۋلىكتىك ءوسىم 1%-دان استام. 1-18 شىلدە ارالىعىندا كۆي-ءدىڭ 10 093 جاعدايى تىركەلدى، بۇل 10700 جاعدايدىڭ پەسسيميستىك بولجامىنا سايكەس كەلۋدە.

دەرتتىڭ ءوسۋ سەبەبى بەلگىلى – 18 ماۋسىمنان باستاپ قالادا «دەلتا» نۇسقاسى تارالا باستادى، ول وتە جۇقپالى ءارى تەز تارايدى، كلينيكالىق كورىنىستەرى تىم اۋىر.

سوڭعى 7 كۇندە «سيمپتومدى» پاتسيەنتتەردىڭ ۇلەس سالماعى بۇرىنعى 7 كۇندەگى 88%-دان 90%-عا دەيىن ءوستى، بۇل وتكەن جىلى ەپيدەميانىڭ ءبىرىنشى تولقىنى كەزىندە COVID-19-دىڭ ۋحان نۇسقاسىنىڭ 50%-نا قارسى.

سوڭعى 2 اپتاداعى جاس قۇرامىن تالداۋبالالار مەن جاسوسپىرىمدەردە ۆيرۋستىڭ دەلتا نۇسقاسىنىڭ تەز جۇعاتىنىن كورسەتتى. 14 جاسقا دەيىنگى بالالاردىڭ ۇلەس سالماعى 1%-عا ءوستى جانە جوعارى بولىپ قالۋدا – 14%. 20 جاستان 40 جاسقا دەيىنگى ازاماتتاردىڭ دەرت جۇقتىرۋى تومەندەدى، 39%-دان 37،5%-عا دەيىن. 40-59 جاستاعى ناۋقاستاردىڭ ۇلەس سالماعى جوعارى – 25%. ال، 60 جاستاعى ادامدار اراسىندا جۇقتىرعانداردىڭ ۇلەسى 1،1%-عا وسكەن.

جۇمىسپەن قامتۋ بويىنشا سوڭعى 14 كۇندە كۆي ءوزىن-ءوزى جۇمىسپەن قامتىعاندار اراسىندا جوعارى – 41%، ءتۇرلى جشس، جك، اق جۇمىسشىلارى اراسىندا – 17%، زەينەتكەرلەر اراسىندا – 16،4%، مەكتەپ وقۋشىلارى اراسىندا – 9،2%، مەكتەپ جاسىنا دەيىنگى بالالار اراسىندا 6،4%، جالپى اۋىرعاندار سانىنىڭ 90%-ى.

سوڭعى 7 كۇندە كۆي ءجيى جۇعاتىن جەرلەر: ساۋدا نىساندارى – 40%، قوعامدىق كولىك – 20%، وتباسىلىق بايلانىس – 19%، بازارلار – 16%.

الماتىدا 2282 قاتىسۋشى Ashyq جوباسى بويىنشا جۇمىس ىستەيدى. 9-14 شىلدە ارالىعىندا نىسانداردا QR-كودىن (تىركەۋ) پايدالانىپ كەلۋشىلەردى تىركەۋدىڭ مينيمالدى سانىن جۇرگىزبەگەن فاكتىلەر انىقتالمادى. 100 قاتىسۋشى – Ashyq جوباسىنىڭ كوشباسشىلارى. 26 ءساۋىر مەن 14 شىلدە ارالىعىندا 211 جاۋاپسىز قاتىسۋشى جوبادان شىعارىلدى.

9-14 شىلدە ارالىعىندا Ashyq-تا سكانەرلەۋ كەزىندە «قىزىل» مارتەبەسى بار 31 ادامعا ءوزىن-ءوزى وقشاۋلاۋ رەجيمىن بۇزعانى ءۇشىن 30 اەك ايىپپۇل سالىندى. جالپى العاندا، 28 ءساۋىر مەن 14 شىلدە ارالىعىندا ءوزىن-ءوزى وقشاۋلاۋ رەجيمىن بۇزعانى ءۇشىن «قىزىل» مارتەبەگە يە 65 ادامعا 30 اەك كولەمىندە ايىپپۇل سالىندى.

ءتارتىپ بۇزۋشىلار كوبىنەسە قوعامدىق تاماقتانۋ ورىندارىنا كىرۋگە تىرىسادى، مۇندا 58 ادامنان «قىزىل» جانە 13 ادامنان «سارى» مارتەبە انىقتالعان. سوسو كىرە بەرىسىندە 28 ادامنىڭ «قىزىل» جانە 110 ادامنىڭ «سارى» مارتەبەسى بەلگىلى بولدى. «قىزىل» مارتەبەسى بار 9 ادام الماتى اۋەجايىنا وتپەكشى بولدى.

سوندىقتان كۆي-ءدىڭ ودان ءارى تارالۋىن بولدىرماۋ جونىندەگى قالالىق شتاب امبۋلاتوريالىق ەمدەلىپ جاتقان قالا تۇرعىندارىن ءوزىن-ءوزى وقشاۋلاۋ رەجيمىن بۇزباۋعا جانە قوعام الدىندا ازاماتتىق جاۋاپكەرشىلىك تانىتۋعا شاقىرادى. ۆيرۋس جۇقتىرعان ادامدارمەن بايلانىستا بولعان تۇلعالار ءوزىن-ءوزى وقشاۋلاۋ رەجيمىن ساقتاۋى جانە باسقا ادامدارعا جۇقتىرماس ءۇشىن ادامدار كوپ جينالاتىن ورىندارعا بارماۋلارى ءتيىس.

 

 

 

الماتى

سوڭعى جاڭالىقتار

ۇقساس جاڭالىقتار