سەنات پەن وبلىستىق ءماسليحاتتار دەپۋتاتتارىنىڭ ءوزارا ءىس-قيمىلىن نىعايتۋدىڭ ماڭىزى زور. سەناتور دۇيسەنعازى ءمۋسيننىڭ شىعىس قازاقستان وبلىستىق ءماسليحاتىنىڭ باسشىلىعىمەن كەزدەسۋى بارىسىندا وسى ماسەلە تۋرالى ايتىلدى. سەنات دەپۋتاتى زاڭ جوبالارىن ساپالى پىسىقتاۋ جانە جەرگىلىكتى جەرلەردەگى پروبلەمالاردى جۇيەلى شەشۋ ءۇشىن بىرلەسكەن جۇمىس قاجەت ەكەنىن اتاپ ءوتتى.
4-ءشى دەڭگەيدەگى بيۋدجەتتى يگەرۋ جانە اۋىلدىق اۋماقتاردى دامىتۋ ماسەلەلەرى – سولاردىڭ ءبىرى. بۇل جونىندە دۇيسەنعازى مۋسين وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ قىزمەتكەرلەرىمەن كەزدەسۋ بارىسىندا اڭگىمە قوزعادى.
سەناتور سونداي-اق ريددەر قالاسىندا بولىپ, وندا ءىرى ورمان ورتىنەن زارداپ شەككەن تۇرعىندارعا ارنالعان ۇيلەر قۇرىلىسىنىڭ بارىسىمەن تانىستى. ول قۇرىلىس ساپاسىن قامتاماسىز ەتۋدىڭ ماڭىزدىلىعىنا مەردىگەرلەردىڭ نازارىن اۋداردى, سونداي-اق 32 تۇرعىن ءۇيدىڭ قۇرىلىسى جوعارى قارقىنمەن ءجۇرىپ جاتقانىن اتاپ ءوتتى. دەپۋتات قالانىڭ الەۋمەتتىك ماڭىزى بار نىساندارىنىڭ قۇرىلىس الاڭدارىندا دا بولدى.
دۇيسەنعازى مۋسين قالا اكىمىمەن كەزدەسۋ بارىسىندا سەمەي قالاسىنىڭ الەۋمەتتىك-ەكونوميكالىق دامۋىنىڭ نەگىزگى ماسەلەلەرىن تالقىلادى. دەپۋتات وڭىردەگى ساپارى بارىسىندا جانە حالىقپەن كەزدەسۋلەرى كەزىندە كوتەرىلگەن بارلىق ماسەلە زاڭ شىعارۋ قىزمەتىندە پايدالانىلاتىنىن ايتتى.
سەنات دەپۋتاتى سۇلتان دۇيسەمبينوۆ الماتى وبلىسىنىڭ تالدىقورعان قالاسىندا بولدى. ول كوپپاتەرلى تۇرعىن ءۇيدىڭ قۇرىلىسىمەن جانە قالالىق ورتالىق قازاندىقتىڭ قايتا جوندەلۋ بارىسىمەن تانىسىپ, قۇرىلىس جۇمىستارىنىڭ ساپاسىن قاتاڭ باقىلاۋ قاجەتتىگىنە جەرگىلىكتى اتقارۋشى ورگانداردىڭ نازارىن اۋداردى.
سۇلتان دۇيسەمبينوۆ سونداي-اق ەركىن اۋىلىنداعى دارىگەرلىك امبۋلاتوريا ۇجىمىمەن كەزدەستى. ول حالىقتىڭ ءال-اۋقاتىن ارتتىرۋ ماقساتىندا قابىلدانعان جاڭا زاڭدار تۋرالى ايتا كەلىپ, كوروناۆيرۋس ينفەكتسياسىنىڭ الدىن الۋ شارالارىنىڭ ماڭىزدىلىعىنا توقتالدى.
«كوروناۆيرۋس پاندەمياسىمەن كۇرەس تاقىرىبىن توسىرقاماي, ۆاكتسينالاۋ جۇرگىزۋگە ەرەكشە نازار اۋدارىپ, حالىققا ۇنەمى اۋقىمدى ءتۇسىندىرۋ جۇمىستارىن جۇرگىزۋ قاجەت», دەدى سۇلتان دۇيسەمبينوۆ.
سەنات دەپۋتاتتارى ناريمان تورەعاليەۆ پەن ءلاززات رىسبەكوۆا باتىس قازاقستان وبلىسىنداعى سىرىم, تەرەكتى جانە بايتەرەك اۋداندارىنىڭ شارۋا قوجالىقتارىندا بولىپ, ولاردىڭ باسشىلارىمەن جانە قىزمەتكەرلەرىمەن كەزدەستى.
سەناتورلار فەرمەرلەرمەن جۇزدەسۋ كەزىندە جەمشوپ دايىنداۋ جۇمىستارىنىڭ بارىسىن تالقىلادى. كەزدەسۋ بارىسىندا جەمشوپ جينايتىن تەحنيكا باعاسىنىڭ ءوسۋى ماسەلەسى كوتەرىلدى. دەپۋتاتتار بۇل ماسەلە ەل باسشىلىعىنىڭ باقىلاۋىندا ەكەنىن جانە سەناتورلار ءوز تاراپىنان تۋىنداعان پروبلەمالاردى شەشۋگە بەلسەندى تۇردە جاردەمدەسەتىنىن ايتتى. فەرمەرلەر سونىمەن قاتار سۋبسيديالار بەرۋ ەرەجەلەرى ءجيى وزگەرىپ وتىراتىندىعىنا دا الاڭداۋشىلىق ءبىلدىردى. بۇل اۋىل شارۋاشىلىعى تاۋار وندىرۋشىلەرى ءۇشىن قولايسىزدىقتار تۋعىزادى جانە ءوز قىزمەتىن جوسپارلاۋعا مۇمكىندىك بەرمەيدى. دەپۋتاتتار بۇل ماسەلەنى سەناتتا قاراۋعا ۋادە بەردى.
ناريمان تورەعاليەۆ پەن ءلاززات رىسبەكوۆا ءبورلى جانە شىڭعىرلاۋ اۋداندارىندا دا بولدى. سەناتورلار اۋىل تۇرعىندارىمەن كەزدەسۋ بارىسىندا ولارعا وتكەن سەسسيا بارىسىندا قابىلدانعان زاڭداردىڭ نەگىزگى ەرەجەلەرى تۋرالى ايتىپ بەردى. دەپۋتاتتار سونداي-اق جول, كوپپاتەرلى ءۇي جانە سپورت كەشەنى قۇرىلىستارىنىڭ بارىسىمەن تانىستى.
دەپۋتاتتاردىڭ وڭىرلەرگە ساپارى اياسىندا سەناتورلار نۇرتورە ءجۇسىپ پەن سۇلتانبەك ماكەجانوۆ ءال-فارابي اتىنداعى قازاق ۇلتتىق ۋنيۆەرسيتەتىندە بولدى. دەپۋتاتتار ساپار بارىسىندا جوعارى وقۋ ورنىنىڭ عىلىمي-وقىتۋشىلىق قۇرامىمەن جانە باسشىلىعىمەن كەزدەسىپ, ۋنيۆەرسيتەتتىڭ ماتەريالدىق-تەحنيكالىق بازاسىمەن تانىستى.
نۇرتورە ءجۇسىپ كەزدەسۋ بارىسىندا وتكەن سەسسيادا قابىلدانعان, ەل ازاماتتارىنىڭ ءومىر ءسۇرۋ ساپاسى مەن ءال-اۋقاتىن جاقسارتۋعا, ءبىلىم مەن عىلىم سالاسىن دامىتۋعا باعىتتالعان زاڭدار تۋرالى پەداگوگتەرگە ايتىپ بەردى.
سۇلتانبەك ماكەجانوۆ جوعارى وقۋ ورىندارى مەن جوعارى وقۋ ورنىنان كەيىنگى ءبىلىم بەرۋ ۇيىمدارىندا زاڭ ءبىلىمىنىڭ ساپاسىن ارتتىرۋ جونىندەگى ءوز ۇسىنىستارىن ءبولىستى.
سەناتورلار سونداي-اق قازىرگى پاندەميا جاعدايىندا وزەكتى ماسەلەلەردى ۋاقتىلى تالداۋ, وقۋ ورىندارىنىڭ ەرەكشەلىكتەرىن ەسكەرەتىن نەعۇرلىم وڭتايلى شارالاردى قابىلداۋ جانە ءبىلىم بەرۋ جۇيەسىنە قاتىسۋشىلاردىڭ ءبارىن – وقۋشىلاردى, اتا-انالاردى, پەداگوگتەردى قولداۋ – ءبىلىم بەرۋ سالاسىنىڭ باستى مىندەتتەرىنىڭ ءبىرى ەكەنىن اتاپ ءوتتى.
