بىرىنشىدەن, جازعى وليمپيادا كوپشىلىككە ەرەكشە قۋانىش سىيلاپ, جانكۇيەرلەردى تاعاتسىزداندىرىپ, ورنىندا وتىرعىزبايتىن عالامات جارىستاردىڭ ءبىرى بولاتىن. ۋاقىتىنان ءبىر جىل كەيىن وتكەلى وتىرعان توكيو وليمپياداسى ادامدارعا, جانكۇيەرلەرگە شىن مانىندە قۋانىشتان گورى, ءسال بولسا دا قورقىنىش, ۇرەي اكەلگەنى جاسىرىن ەمەس. ونىڭ باستى سەبەبى – الەمدى بۋىپ تۇرعان ىندەت. بۇل ىندەتتىڭ قاتالدىعىنان دۇنيە ءجۇزىنىڭ بارلىق ەلى, ونىڭ ىشىندە قازاق حالقى دا تالاي مارقاسقا ۇلى مەن قىزىنان ايىرىلدى. جۇرت ىندەتتىڭ بارىسىنا, بالا-شاعاسىنىڭ, ازاماتتارىنىڭ اماندىعىنا الاڭداۋلى. شىنىن ايتقاندا, قازىر حالىقتىڭ كوزىندە بولايىن دەپ جاتقان وليمپياداعا دەگەن قىزىعۋشىلىقتان گورى, كادىمگى قاسقىر كورگەندەي ۇرەي باسىم. مۇنى جاسىرماي ايتۋىمىز كەرەك. نەگە دەسەڭىز, ەرتەڭ, وليمپيادادان كەيىن تاعى دا ەلدىڭ, حالىقتىڭ الدىندا جاۋاپ بەرۋگە تۋرا كەلەدى. ونىڭ ۇستىنە, وليمپياداعا دايىندىق بارىسى ءوز دارەجەسىندە وتپەدى. وعان دا كىنالى سول ‒ ىندەت.
بۇرىن وقۋ-جاتتىعۋ جيىندارى سپورتتىق قۇرىلىستارى بۇكىل الەمدىك دارەجەدە اڭىز بولىپ ايتىلاتىن ەلدەردە وتەتىن. وكىنىشكە قاراي, بۇل جولى ولاي بولمادى. باپكەرلەر مەن سپورتشىلار بارامىن, جاتتىعۋ وتكىزەمىن دەگەن جەرىنە بارا المادى. وعان دا اتىڭ وشكىر ىندەت كەدەرگى. سول سەبەپتى اركىم شاماسى كەلگەنشە, قاشىپ-پىسىپ ءجۇرىپ, تىعىلىپج ءۇرىپ دايىندالدى. ال مۇنىڭ اسەرى بولماي قويمايدى.
جاپونيا ءبىر جىلعا كەشىكتىرىپ بولسا دا وليمپيادانى وتكىزۋگە بەل بۋعانىمەن, توكيو حالقىنىڭ جارتىسىنان كوبى بۇل دودانىڭ وتۋىنە قارسى. ويتكەنى ولار جارىستان كەيىنگى ەلىنىڭ بولاشاعىن ويلايدى. قازىردىڭ وزىندە وليمپياداعا بارىپ, ىندەتپەن اۋىرىپ جاتقان سپورتشىلار بار ەكەنىن ەستىپ جاتىرمىز. 16 كۇن ىشىندە الەمنىڭ تۇكپىر-تۇكپىرىنەن كەلگەن 10 مىڭنان اسا سپورتشى ميداي ارالاسقان سوڭ نە قالادى؟
بۇل ماسەلەنى ايتپاي كەتە المادىم. سەبەبى سپورتشىلارىمىزدىڭ ناتيجەسىنە كوز سالعان كەزدە, «بۇعان نە بولدى؟» دەپ سۇراق قوياتىن, كوڭىلى تولماي جاتاتىن جانكۇيەرلەر كوپ. ولاردىڭ باسىم بولىگى – جارىستى تەك تەلەديداردان كورىپ, راديودان تىڭداپ جۇرگەن جانكۇيەرلەر. ال ءىستىڭ مانىنە بارىپ, بولىپ جاتقان بارلىق وقيعانى زەرتتەپ, عىلىمي تۇرعىدان قاراي الاتىن جانكۇيەرلەر, مەنىڭ ويىمشا, كوپ ەمەس.
ارينە, سەبەپ ايتۋمەن ءىس بىتپەيتىنىن بىلەمىز. سوندىقتان وسى وليمپياداعا قازاقستاننان اتتانىپ بارا جاتقان جۇزگە تارتا سپورتشىنىڭ اياقالىسىنا بۇگىن وزدەرىڭىز سۇراعان سوڭ, الىستا وتىرىپ وي بىلدىرگىمىز كەلەدى.
توكيو وليمپياداسىنا الەمنىڭ مىقتى دەگەن سپورتشىلارى كەلمەي قالۋى ابدەن مۇمكىن. نەگە دەسەڭىز, ءار ەلدە ءارتۇرلى ساياسات. وليمپيادا بۇكىل الەمدىك جارىس بولعانىمەن, بۇگىندە ءار ەلدىڭ بولاشاعى قىل ۇستىندە تۇر دەسەك تە بولادى. بۇعان ويلى كوزبەن قارايتىن باسشىلار كوپ. كۇنى كەشە عانا اياقتالعان فۋتبولدان ەۋروپا چەمپيوناتىنىڭ وزىندە جەڭىمپازدار قۋانىپ جاتقانىمەن, جالپى وتكەن جارىس, ودان كەيىنگى قالعان ناتيجە, اسىرەسە, ەل اراسىندا تاراعان اۋرۋدىڭ بارىسى بۇگىندە جەر سابالاتىپ وتىر. سوندىقتان وليمپيا ويىندارىنا الەمنىڭ بارلىق مىقتى سپورتشىلارى جينالادى دەپ ايتا المايمىن. سوعان قاراماي, وتكىزگەن جارىستىڭ بارلىعى ۇمىتىلاتىنىن, تەك قانا ناتيجەسى ساقتالاتىنىن ەستەن شىعارماۋىمىز كەرەك. ەندى اقىرى اتقاءمىنىپ, توكيوعا بەت العاننان كەيىن بارلىق سەبەپتى جيىپ قويىپ, سپورتشىلارىمىزعا وليمپيادادا جەڭىمپاز اتانۋ ءۇشىن جاننان باسقانىڭ ءبارىن بەرۋ كەرەك.
بىزدە ءۇمىت ارتار سپورتشىلار كوپ ەمەس. دەگەنمەن, سەنىپ وتىرعان ساڭلاقتارىمىز بار. ارينە, ءبىرىنشى كەزەكتە قامشىبەك قوڭقاباەۆ, بەكزات نۇرداۋلەتوۆ باستاعان بوكسشىلارىمىز تۇرادى. ويتكەنى تاۋەلسىزدىك العاننان بەرى قاتىسقان بارلىق وليمپيادادان ولار التىن جۇلدەسىز ورالىپ كورگەن ەمەس. سول ءداستۇر بيىل دا ساقتالىپ, وليمپ تورىندە كوك تۋىمىزدى جوعارى كوتەرسە ەكەن دەيمىز.
جۇزۋدەن ريو دە جانەيرو وليمپياداسىنىڭ جەڭىمپازى دميتري ءبالانديندى, دزيۋدودان كۇمىس مەدال العان ەلدوس سمەتوۆتى ەلدىڭ ءۇمىتى دەپ باعالايمىن. بۇل سپورتشىلار وسى جولى دا التىنعا لايىق. التىننان ءسال تومەن بولىپ جاتسادا, ولارعا ەشقانداي وكپە جوق. باستىسى, وليمپيادا مەدالىن تاعىپ, ەلگە امان-ەسەن ورالسا دەگەن تىلەگىمىز بار.
تاعى ءبىر كوپ ادام بىلە بەرمەيتىن سپورتشىمىز بار. سپورتتىق گيمناستيكادان ميلاد كاريمي دەگەن ۇلتى باسقا بولعانىمەن, ءوز ەلىمىزدە تۋعان ازامات كەشە عانا اياقتالعان الەم كۋبوگىندا جۇلدەلى ورىنداردان كورىندى. ءتىپتى جەڭىمپاز بولۋعا ءتيىس ەدى. سول ازاماتىمىزعا قامقورلىق جاساپ, ارقادان قاعىپ, بار مۇمكىندىگىمىزدى اياماساق, توكيودان جۇلدە الىپ كەلەتىندەردىڭ ءبىرى سول بولادى دەپ توپشىلايمىن.
ءتورتىنشى وليمپياداسىنا قاتىسىپ وتىرعان ولگا رىپاكوۆا سەكىلدى جەڭىل اتلەتىمىزدى توبەمىزگە كوتەرۋىمىز كەرەك. بۇعان دەيىن ولگا بىردە-ءبىر وليمپيادادان جۇلدەسىز ورالعان جوق. ول ءسوزسىز اتى التىن ارىپپەن جازىلاتىن سپورتشىلاردىڭ قاتارىنا كىرەدى.
سونىمەن قاتار ەلىمىزدەن شىققان ۇزدىك ۆەلوشاباندوزىمىز الەكسەي لۋتسەنكونى جەڭىمپازداردىڭ قاتارىنان كورگىمىز كەلەدى. الەكسەي وعان تولىق لايىق. تۋر دە فرانس ۆەلوبايگەسىندە جەرلەسىمىز العاشقى وندىقتىڭ قاتارىنان ويىپ تۇرىپ ورىن الدى. مۇنداي جەتىستىككە جەتۋ وڭاي ەمەس. سەبەبى بۇل كوپكۇندىك – كەز كەلگەن الەم چەمپيوناتىنان كەم تۇسپەيتىن اتاقتى جارىس. الەكسەي لۋتسەنكو وليمپيادادا الەكساندر ۆينوكۋروۆ سەكىلدى بيىك تۇعىرعا شىعىپ جاتسا نۇر ۇستىنە نۇر بولار ەدى.
باسقا دا سپورتشىلاردان ءۇمىت مول. كىل مىقتىلار جينالاتىن سپورتشىلاردىڭ اراسىنان سۋىرىلىپ شىعۋ وڭاي ەمەس. دەگەنمەن ورەندەرىمىز وزدەرىنە لايىق ونەرلەرىن كورسەتىپ, بۇرىن جەتكەن بيىك بەلەستەردەن ءسال دە بولسا ناتيجەسىن جاقسارتسا دەگەن ارمان بار. ءوزىمىز بارماساق تا, ءبىز دە سولارعا ۇيدە وتىرىپ قول سوعاتىن جانكۇيەرىمىز.
وسى توكيو وليمپياداسىنا دايىندىق بارىسىندا تيمۋر ق ۇلىباەۆ باسقارىپ وتىرعان ۇلتتىق وليمپيادا كوميتەتىماڭداي تەرىن توكتى-اق. ويتكەنى جان-جاقتا ورىن العان قيىن جاعدايعا قاراماستان, سپورتشىلاردى دايىنداۋ, ولارعا وقۋ-جاتتىعۋ جيىندارىن وتكىزۋ, وزدەرىنە لايىقتى سپورتشىلارمەن كەزدەسەتىن جارىستارعا جىبەرۋ كەرەك بولدى. ءتىپتى ارنايى كيىم دايىنداتىپ, سپورتشىلارعا بارلىق قاجەت-قۇرالدارىن بەرۋدىڭ ءوزى ۇلكەن كۇش-جىگەردى قاجەت ەتەتىنى ءسوزسىز. سوندىقتان دا ۇلتتىق وليمپيادا كوميتەتىنىڭ توككەن تەرى دالاعا كەتپەسە ەكەن دەپ ۇيدە تاقىمىمىزدى قىسىپ وتىرعان جايىمىز بار.
ەڭ باستىسى, ءۇمىتسىز ەمەسپىز. جوعارىدا ايتقان, قوس قولدىڭ ساۋساعىمەن سانايتىنداي سپورتشىلاردىڭ ءوزىن توپ باسىنا قويعاندا, قازاقستان بۇرىنعى ءوزى جەتكەن بيىكتەرگە شىعا الادى. امسە, سول بيىكتەردەن ەڭسەمىز تۇسپەي, جارىستىڭ اشىلۋ سالتاناتىندا جەلبىرەپ شىققان كوك تۋىمىز ەلگە قايتاردا دا جەلبىرەپ قايتسىن دەگەن تىلەك بىلدىرەمىن.
