وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, جىل باسىنان 70 اتا-اناعا قر اكىمشىلىك قۇقىقبۇزۋشىلىق تۋرالى كودەكسىنىڭ 127-بابىمەن (كامەلەتكە تولماعان ادامدى تاربيەلەۋ جانە (نەمەسە) وعان ءبىلىم بەرۋ, ونىڭ قۇقىقتارى مەن مۇددەلەرىن قورعاۋ جونىندەگى مىندەتتەردى ورىنداماۋ) اكىمشىلىك حاتتاما تولتىرىلعان. بالا تاربيەسىمەن اينالىسپاعانى ءۇشىن 2 زاڭدى وكىلدىڭ اتا-انالىق قۇقىعى شەكتەلگەن. ال 3 زاڭدى وكىل وسىنداي قۇقىقتان ايىرىلعان.
«اتىراۋ قالالىق پوليتسيا باسقارماسى يۋۆەنالدى پوليتسيا بولىمشەسىنىڭ ينسپەكتورلارى بۇل اتا-انالاردىڭ كامەلەتكە تولماعان بالالارىن تاربيەلەۋ جانە وعان ءبىلىم بەرۋ, ونىڭ قۇقىقتارى مەن مۇددەلەرىن قورعاۋ جونىندەگى مىندەتتەرىن ورىنداماعانىن انىقتادى. سونداي-اق, قالالىق اكىمدىك جانىنداعى كامەلەتكە تولماعان بالالاردىڭ قۇقىعىن قورعاۋ جونىندەگى كوميسسياعا جاسوسپىرىمدەردىڭ تاربيەسىمەن اينالىسپاعان اتا-انالارعا جانە قاڭعىباستىققا بەيىم جاسوسپىرىمدەرگە قاتىستى 40-قا جۋىق ءىس-قۇجات جولداندى», دەپ حابارلادى دەپارتامەنتتىڭ ءباسپاسوز قىزمەتى.
بەلگىلى بولعانداي, اتىراۋ قالالىق اكىمدىگى جانىنداعى اتالعان كوميسسيانىڭ كەزەكتى وتىرىسىندا بالا تاربيەسىمەن اينالىسپاعان 7 زاڭدى وكىلدىڭ ءىس-قۇجاتى قارالدى. ونىڭ ىشىندە سپيرتتىك ىشىمدىككە اۋەس 40 جاستاعى ازاماتشا بار.
«بۇل ايەلدىڭ ءتورت بالاسى بار. تۇڭعىشى – 18, كەنجەسى 9 جاسقا تولعان. اتالعان ازاماتشا ىشكى ىستەر ورگاندارىنىڭ جايسىز وتباسى ەسەبىندە تۇرادى. وسى كەزگە دەيىن ءبىر مەكەمەدە تۇراقتى جۇمىس ىستەمەگەن. پوليتسيا قىزمەتكەرلەرى وعان قاتىستى ءىس-قۇجاتتاردى كامەلەتكە تولماعانداردىڭ قۇقىعىن قورعاۋ جونىندەگى كوميسسياسىعا بىرنەشە رەت جولداعان. الايدا, 40 جاستاعى ازاماتشا الكوگولدىك ىشىمدىكتى ءىشۋىن توقتاتپاعان. بالالارىنىڭ تاربيەسىمەن اينالىسپاي, تۇزەلۋ جولىنا تۇسپەگەن. ال اناسىنىڭ وسىنداي جولدا جۇرگەنىنىڭ كەسىرىنەن ءجاسوسپىرىم بالالارى بىرنەشە رەت قىلمىس جاساعان», دەپ ءمالىم ەتتى ءباسپاسوز قىزمەتىنەن.
كوميسسيا مۇشەلەرى اتالعان ايەلدى اتا-انالىق قۇقىعىنان ايىرۋعا شەشىم قابىلدادى.
