«ەلوردادا COVID-19 بويىنشا قولايسىز ەپيدەميولوگيالىق جاعداي بىلتىرعىداي قۇربان ايت مەرەكەسىن تولىق كولەمدە اتاپ وتۋگە مۇمكىندىك بەرمەي وتىر. قالادا سوڭعى 3 كۇندە تاۋلىگىنە 1000-نان استام كوروناۆيرۋس ينفەكتسياسى تىركەلگەن. وتكەن تاۋلىكتە 1549 جاعداي تىركەلگەن, ءوسىم – 1,9%-دى قۇرادى. سوڭعى اپتادا 7989 COVID-19 جۇقتىرۋ جاعدايى تىركەلدى, بۇل الدىڭعى اپتادان 44,23%-عا جوعارى, جاعدايلاردىڭ ورتاشا تاۋلىكتىك تىركەلۋى 950-دەن 1550-گە دەيىن ءوستى. 100 مىڭ تۇرعىنعا شاققاندا سىرقاتتانۋشىلىقتىڭ اپتالىق كورسەتكىشى 540,7-دەن 672,2-گە دەيىن ءوستى, رەپرودۋكتيۆتىك سانى – 1,3», دەدى سپيكەر نۇر-سۇلتان قالاسىنىڭ اكىمدىگىندەگى بريفينگتە.
ونىڭ ايتۋىنشا, كۇرت ءوسۋدىڭ نەگىزگى سەبەپتەرى دە بۇرىنعىداي حالىقتىڭ شەكتەۋ تالاپتارىن ساقتاماۋى, ماسكا تاقپاۋى, وتكەن مەرەكە كۇندەرى جاپپاي جينالاتىن ورىندارعا بارۋى بولدى.
«بۇعان دەيىن وسىنداي ءوسىم جاڭا جىل, 8 ناۋرىز, 22 ناۋرىز مەرەكەلەرىنەن كەيىن بايقالعان بولاتىن. سونداي-اق ەپيدەميولوگيالىق انامنەزدى جيناۋ كەزىندە قالادان تىس دەمالىس ورىندارى مەن ايماقتارىنا شىعۋ, شومىلۋ كەزىندە ادامداردىڭ توپتالۋىنان الەۋمەتتىك قاشىقتىقتىڭ ساقتالماۋى انىقتالىپ وتىر. جالپى سىرقاتتانۋشىلىقتىڭ 80,4%-ىن ەرەسەكتەر, 16,7%-ىن بالالار جانە 2,9%-ىن جاسوسپىرىمدەر قۇرايدى», دەيدى س. بەيسەنوۆا.
ناۋقاستاردىڭ 22,7% - 30-39 جاستا, 27,6% - 40-59 جاستا, 16,3% - 18-29 جاستا جانە 13,8%-ى 60 جاستان اسقان ەگدە جاستاعى ادامدار.
