2021 جىلى ماۋسىمدا رەسپۋبليكاداعى بازارلار مەن دۇكەندەردە قوي ەتىنىڭ كيلوگراممى 2,3 مىڭ تەڭگەدەن ساتىلدى. بۇل وتكەن جىلمەن سالىستىرعاندا 14,4% -عا قىمبات. ەلىمىزدىڭ ءىرى قالالارى مەن مەگاپوليستەرىنىڭ اراسىنداعى ەڭ جوعارى باعالار نۇر-سۇلتاندا, الماتىدا (كگ ءۇشىن 2,9 مىڭ تەڭگە) جانە قاراعاندىدا (كگ ءۇشىن 2,6 مىڭ تەڭگە) بايقالدى. ەڭ تومەنگى باعا - ورال مەن پەتروپاۆلدا (كەلىسى 1,7 مىڭ تەڭگە) بولدى. بۇل تۋرالى Energyprom.kz ساراپتاما پورتالى جازدى.
قازىرگى ۋاقىتتا ەلىمىزدە ۇساق مالدىڭ انالىق تۇقىمىن ەكسپورتتاۋعا تىيىم سالىنعانىن اتاپ وتكەن ءجون. قر پرەمەر-ءمينيسترىنىڭ رەسمي سايتىنداعى مالىمەتكە سۇيەنسەك, قازاقستاندا جىلىنا 172,4 مىڭ توننا قوي ەتى وندىرىلەدى. ىشكى نارىقتىڭ سۇرانىسى 100,7% قامتىلعان. وسى جىلدىڭ ءتورت ايىندا 538 توننا قوي ەتى نەگىزىنەن ءباا, وزبەكستان, باحرەين جانە رەسەي فەدەراتسياسىنا ەكسپورتتالدى.
قر ۇكىمەتى مۇددەلى مەملەكەتتىك ورگاندارمەن جانە ۇيىمدارمەن بىرلەسىپ, قازاقستاننىڭ قوي وسىرۋشىلەر ۇلتتىق قاۋىمداستىعىنىڭ توراعاسى ا.سادىرباەۆتىڭ تىرى ۇساق مالدىڭ ەكسپورتىنا تولىق تىيىم سالۋ تۋرالى ۇسىنىسىن قاراستىرىپ جاتىر. ىشكى نارىقتا قوي ەتىنىڭ قىمباتتاۋىنىڭ نەگىزگى سەبەبى رەتىندە مالدىڭ ەكسپورتى كورسەتىلگەن.
