ساۋدا جانە ينتەگراتسيا ءمينيسترى باقىت سۇلتانوۆتىڭ ايتۋىنشا, رەسەيلىك e-commerce الپاۋىتىنا شىعار جولدىڭ اشىلۋى – قازاق كاسىپكەرلەرى ءۇشىن ۇلكەن الەۋەت.
ء«بىزدىڭ تاۋارلار – اياقكيىم, زەرگەرلىك بۇيىمدار جانە اۋىلشارۋاشىلىق ونىمدەرى وسىعان دەيىن دە Ozon-دا ۇسىنىلعان. بىراق Wildberries سياقتى, سايتقا كىرۋ ءۇشىن ءبىزدىڭ كومپانيالار رەسەي فەدەراتسياسىنىڭ اۋماعىندا فيليالدار اشۋعا ءماجبۇر بولدى. بۇل بيزنەس ءۇشىن وتە ىڭعايسىز جانە قىمبات. لوگيستيكانى جەتىلدىرۋ جەرگىلىكتى بيزنەستىڭ Ozon-عا شىعۋىنا ىقپال ەتتى: مامىردان باستاپ ءبىزدىڭ كاسىپكەرلەر رەسەيگە تاۋارلاردى تىكەلەي كليەنتكە وزدەرى نەمەسە ءۇشىنشى تاراپ تاسىمالداۋشىلارىنىڭ كومەگىمەن جەتكىزە الادى», دەيدى مينيستر.
رەسەيلىك كومپانيا جاقىن ارادا قازاقستاندىق بيزنەستىڭ تاۋارلارىن رەسەيگە تاسىمالدايتىن سەرىكتەس-لوگيستەردىڭ ءتىزىمىن ۇسىنباق. وتاندىق تاۋارلاردى رەسەي مەن وزگە دە وڭىرلەرگە جەتكىزۋ ءۇشىن قويماعا ورنالاستىرۋ شارۋاسى دا پىسىقتالىپ جاتىر ەكەن. ۆەدومستۆو باسشىسى باسقا ماركەتپلەيستەرمەن دە كەلىسسوزدەر ءجۇرىپ جاتقانىن ايتادى.
ء«بىزدىڭ مىندەتىمىز – وندىرۋشىلەرىمىز ءۇشىن ءارتۇرلى ساۋدا الاڭدارىنا قولجەتىمدىلىكتى بارىنشا جەڭىلدەتۋ. بۇل ساۋدا ءۇشىن دە, ءوندىرىس ءۇشىن دە جاقسى ىنتالاندىرۋ بولاتىنىنا سەنىمدىمىن», دەيدى سۇلتانوۆ.
Ozon-عا تىركەلۋدىڭ ەش قيىندىعى جوق. الدىمەن seller.ozon.ru سايتىندا ساتۋشى رەتىندە تىركەلەسىز. كومپانيانىڭ جارعىلىق قۇجاتتارىن تىركەگەننەن كەيىن تەكسەرۋدى كۇتۋ قاجەت. كەيىن نارىقتاعى ۇسىنىستاردى قابىلداي باستايسىز. ادامدار ينتەرنەت ارقىلى ساۋدا جاساعاندا ءبىرىنشى كەزەكتە ءونىمنىڭ سىرتقى ءتۇر-سيپاتىنا ەرەكشە نازار اۋداراتىندىقتان ءونىم كارتاسىن جاسايسىز. قويمانىڭ قاي جەردە ورنالاسقانىن, تاۋارلاردى قايدان جەتكىزەتىنىڭىزدى دە كورسەتىپ قويىڭىز. كوپ ۇزاماي العاشقى تاپسىرىستار دا تۇسە باستايدى. تولىق اقپاراتتى global.ozon.ru سايتىنان الۋعا بولادى.
ەسكە سالساق, مينيسترلىك وسىعان دەيىن قازاق كاسىپكەرلەرىنە ونىمدەرىن Amazon پلاتفورماسىندا تىكەلەي ساتىلىمعا شىعارۋ مۇمكىندىگىن ۇسىنعان ەدى. سوڭعى ۋاقىتتارى ەلىمىزدىڭ e-commerce تاراپىنداعى دامۋىندا ءبىرشاما سەرپىلىس بار ەكەنىن اڭعارۋعا بولادى. كاسىپكەرلەردىڭ حالىقارالىق ونلاين نارىقتا ءونىم ساۋدالاي باستاۋى ولاردىڭ وسى باعىتتاعى جۇمىسىن قۇلشىنا ىستەپ, جاقىن كەلەشەكتە وتاندىق پلاتفورمالاردىڭ نەگىزىن قالاپ, دامىتۋعا دەگەن ىقىلاسىن دا وياتارى ءسوزسىز.
«سالانى ءۇش قۇرالدىڭ كومەگىمەن دامىتۋعا بولادى, ءبىرىنشىسى – ەلەكتروندى ساۋداعا ىنتالاندىرۋ جانە شاعىن جانە ورتا بيزنەستى وقىتۋ. ەكىنشىسى – لوگيستيكالىق سەرۆيس پەن جەتكىزۋ قىزمەتىن دامىتۋ. ءۇشىنشىسى – ونلاين-ترانسشەكارالىق ساۋدانى دامىتۋ», دەيدى ساۋدا جانە ينتەگراتسيا ۆيتسە-ءمينيسترى اسەل جاناسوۆا.
ۆەدومستۆو 2025 جىلعا تامان جالپى ساۋداداعى e-commerce ۇلەسىن 15 پايىزعا جەتكىزۋدى كوزدەپ وتىر. مينيسترلىكتىڭ مالىمەتىنشە, بيىل ەلەكتروندى ساۋدا ۇلەسى 9,9 پايىزعا كوتەرىلىپ, 1,4 ترلن تەڭگەنى قۇراسا, 2025 جىلى 15 پايىزعا ءوسىپ, 3,6 ترلن تەڭگە بولماق.
