مەملەكەت باسشىسى قاسىم-جومارت توقاەۆ اسا كورنەكتى شىعىستانۋشى جانە ءدىنتانۋشى عالىم, فيلولوگيا عىلىمدارىنىڭ دوكتورى, پروفەسسور, ۇعا اكادەميگى, ديپلومات ءابساتتار قاجى باعىسباي ۇلى دەربىسالىنىڭ دۇنيەدەن وتۋىنە بايلانىستى كوڭىل ايتۋ جەدەلحاتىن جولدادى.
ء«ابساتتار باعىسباي ۇلى ەلىمىز ءۇشىن ەسەلى ەڭبەك ەتتى. ءال-فارابي اتىنداعى قازاق ۇلتتىق ۋنيۆەرسيتەتىنەن باستالعان ۇستازدىق جولى جەمىستى بولدى. ارابتانۋ عىلىمىنىڭ نەگىزىن سالۋشىلاردىڭ ءبىرى رەتىندە عىلىمعا تەرەڭ بويلاپ, مونوگرافيالار مەن قۇندى ەڭبەكتەر جازدى. سونىمەن قاتار ەلىمىزدىڭ سىرتقى ساياساتى سالاسىندا قىزمەت ەتىپ, قازاقستان مەن ساۋد ارابياسى كورولدىگى اراسىنداعى ىنتىماقتاستىق بايلانىستىڭ وركەن جايۋىنا اتسالىستى. قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي بولعان تۇسىندا يسلام ءدىنىنىڭ قۇندىلىقتارىن دارىپتەۋگە, سونداي-اق كونفەسسياارالىق جانە ۇلتارالىق كەلىسىمنىڭ نىعايا تۇسۋىنە قوماقتى ۇلەسىن قوستى. ونەگەلى عۇمىر كەشىپ, سوڭىنا مول عىلىمي مۇرا قالدىرعان ءابساتتار قاجى باعىسباي ۇلىنىڭ جارقىن بەينەسى ۇمىتىلمايدى. حالقىمىز كورنەكتى عالىمنىڭ ەسىمىن ءاردايىم ارداق تۇتادى», دەپ جازىلعان پرەزيدەنتتىڭ جەدەلحاتىندا.
