بۇل تۋرالى رەسەيدىڭ تىكەلەي ينۆەستيتسيالار قورىندا ايتىلدى. ولار ءونىمدى تەك ءۇندىستاننىڭ وزىندە عانا ەمەس, سونىمەن قاتار باسقا مەملەكەتتەرگە ەكسپورتتاۋعا جىبەرۋدى جوسپارلاپ وتىر.
ءۇندىستاننىڭ قان سارىسۋى ينستيتۋتى بۇگىندە «كوۆيشيلد» دەپ اتالاتىن «وكسفورد-استرازەنەكا» ۆاكتسيناسىن جاساۋعا قاتىسقان.
«مۇنداي سەرىكتەستىك «سپۋتنيكتى» الەمدە قولدانۋدىڭ تاماشا كورسەتكىشتەرىن جاڭا دەڭگەيگە شىعارادى. بۇل – سەنىمنىڭ وتە ماڭىزدى كورىنىسى. «سپۋتنيكتىڭ» كەڭ كولەمدەگى ءوندىرىسى – ءبىزدىڭ كوۆيدپەن بىرلەسكەن كۇرەسىمىزدىڭ نەگىزگى ەلەمەنتى», دەدى رەسەي تىكەلەي ينۆەستيتسيالار قورىنىڭ باس ديرەكتورى كيريلل دميتريەۆ.
ءۇندىستان وسى جىلدىڭ مامىر ايىنان باستاپ «سپۋتنيكتى» ءوندىرۋ بويىنشا ءىرى حابقا اينالدى. رەسەي تىكەلەي ينۆەستيتسيالار قورى بىرنەشە كومپانيامەن كەلىسىمدەر جاساستى.
«سپۋتنيك V» الەمنىڭ 60-تان استام ەلىندە ماقۇلدانعان, دەگەنمەن ءاۋ باستا ولاردىڭ كوبىسى ۆاكتسينانى قولدانعىسى كەلمەگەن. رەسەيدەن تىس 9 ەلدە بۇل پرەپاراتتىڭ ءوندىرىسى باستالدى. وسىعان وراي, رەسەي قورىنىڭ باسشىلىعى قىركۇيەك-قازان ايلارىندا دۇنيەجۇزىلىك دەنساۋلىق ساقتاۋ ۇيىمى «سپۋتنيك V» ۆاكتسيناسىن تىركەۋى مۇمكىن دەگەن ءۇمىت ءبىلدىردى.
ازىرگە دۇنيەجۇزىلىك دەنساۋلىق ساقتاۋ ۇيىمى دا, ەۋروپالىق رەتتەۋشى دە رەسەيلىك ۆاكتسينانى مويىنداماي وتىر.
