ايماقتار • 13 شىلدە، 2021

بەلگىلەنگەن مەرزىمىنەن بۇرىن بەرىلدى

67 رەت كورسەتىلدى

بيىل الماتى قالاسىندا مەملەكەتتىك تاپسىرىس بويىنشا جاڭادان 8 مەكتەپ جانە 17 جاپسارلاس مەكتەپ سالىنىپ، وقۋ ورنى تاپشىلىعى 75% قىسقارۋى ءتيىس.

حالقى كۇن سايىن كوبەيىپ كەلە جاتقان شاھار ءۇشىن، اسىرەسە، زاماناۋي ءبىلىم وردالارىنىڭ دەر كەزىندە بوي كوتەرۋى اسا ماڭىزدى. مىسالى، الماتى قالالىق №60 مەكتەپ-گيمنازياسىنا «جوندەۋ قۇرىلىس» كومپانياسى قوسىمشا ءۇش قاباتتى عيماراتتى بەلگىلەنگەن مەرزىمىنەن ءبىر اي بۇرىن سالىپ بەردى.

جاقىندا جولىمىز ءتۇسىپ، الماتى قالالىق №60 مەكتەپ-گيمنازياسىنا قوسىمشا سالىنعان ءۇش قاباتتى عيماراتتى بارىپ كوردىك. گيمنازيانىڭ سىرتقى قابىرعاسى زاماناۋي ساپالى قۇرىلىس ماتەريالى – تراۆەنتينمەن كومكەرىلگەن. شەبەرلىكپەن ءتۇزۋ تارتىلعان اقشىل جولاق ءبىرتۇتاس قوڭىرقاي ءتۇس عيماراتتى اشا تۇسكەن. اۋلاعا اق، قىزىل ءتۇستى قالىڭ تاس رەتىمەن قالانىپتى. ەڭسەلى عيماراتتىڭ ىشكى قابىرعالارى كوڭىل سەرگىتەر تۇسپەن بويالىپ، زاماناۋي تالاپقا ساي جاسالعانى جاراسىمدى-اق. سىنىپتار كەڭ، وندا تەرەزەدەن تۇسەتىن جارىقتى بارىنشا پايدالانۋ ءۇشىن كولەمدى ەلەكتروندى تاقتالار ورناتىلىپتى. پارتالارى مەن شكافتارىنىڭ ەنى، بيىكتىگى، جالپى ءپىشىنى ستاندارتقا سايكەس جاسالىنعانى دا بىردەن كوزگە تۇسەدى. وسى يگىلىكتىڭ بارلىعى بالالارىمىز ءۇشىن جاسالىپ جاتقانى قۋانتتى.

نەگىزى قۇرىلىسشى قانداي دا ءبىر نىساننىڭ قابىرعاسىن ءتۇزۋ، ەدەنىن تەگىس، باسپالداعىن ستاندارتقا ساي، ياعني ساپالى اتقارۋ ارقىلى دا پاتريوتتىعىن، حالىققا، مەملەكەتكە ادالدىعىن تانىتادى. سول قۇرىلىسشىنىڭ قولتاڭباسى عيماراتتىڭ ساندىلىگىمەن، ساپاسىمەن ەرەكشەلەنەدى. دەسەك، ىسكەرلىگىمەن ەلىمىزگە تانىمال «قازاقستان رەسپۋبليكاسىنىڭ قۇرمەتتى قۇرىلىسشىسى»، «قۇرمەت» وردەنىنىڭ يەگەرى جاندۋللا ابديمۋراتوۆ باسقاراتىن «جوندەۋ قۇرىلىس» جشس قۇرىلىس كومپانياسى ساپالى جۇمىسىن وسى ءبىلىم ورداسىندا دا كورسەتىپتى. مامىردىڭ سوڭعى كۇندەرىندە ءوزىمىز كۋا بولعان كەزەكتى جۇمىس تارتىبىندەگى كەزدەسۋىندەگى تاپسىرىس بەرۋشىنىڭ ەسكەرتپەلەرىنە قۇرىلىسشىلار وزىندىك پىكىرلەرىن قوسىپ، ەل يگىلىگى ءۇشىن ورتاق كەلىسىمگە كەلىپتى.

قۇرىلىس نىسانىن باستاۋ ءۇشىن بەرىلەتىن ساراپتاما قورىتىندىسى كەيدە التى-توعىز ايعا سوزىلادى. وعان جوبالىق سمەتالىق قۇجاتى دايىن نىسانعا رەسپۋبليكالىق بيۋدجەتتەن قاراجات بولىنگەنشە كەزەگىن كۇتىپ ءبىر جىلعا تاياۋ ۋاقىت جاتىپ قالا­تىنىن تاعى قوسىڭىز. سول ۋاقىتتا قۇرىلىس ماتەريالىنىڭ قۇنى ەسەلەپ وسەدى. وسىنداي ءتۇرلى كەدەرگىلەرگە توقتالماعان كومپانيا قۇرىلىس جۇمىسىن تالاپقا ساي ءارى بەلگىلەنگەن ۋاقىتىنان كەشىكتىرمەي تاپسىرىپ وتىر. بۇل – قۇرىلىسشىلاردىڭ ادال جۇمىسىنىڭ ناتيجەسى. ارينە، دەرەككە دايەكتەمە كەلتىرسەك، قۇرىلىسشىلاردىڭ ۋاقىتپەن ساناسپاي، ۇلكەن جاۋاپكەرشىلىكپەن، ساۋاتتىلىقپەن، مول تاجىريبەگە سۇيەنە ۇيىمداستىرا ءبىلىپ اتقارعان قىرۋار جۇمىسى كورىنەدى. ەڭ باستىسى، جاڭا وقۋ جىلىندا ۋاقىت تالابىنا ساي جارقىراعان مەكتەپ-گيمنازيانىڭ ەسىگىن ايقارا اشىپ، وقۋشىلار مەن مۇعالىمدەردى ريزاشىلىققا بولەگەن قۇرىلىسشىلار ناعىز ازاماتتىعىن كورسەتتى.

الماتى

سوڭعى جاڭالىقتار

ۇقساس جاڭالىقتار